Şirvan ölkənin sənaye şəhərlərindən sayılır. Kürün sağ sahilində, əlverişli coğrafi mövqedə yerləşən şəhər 1930-cu ilədək Ərəbşahverdi, Qırxçıraq, Yekaterinserd, Zubovka, Papanino adlanıb. XX əsrin əvvəllərində kiçik bir yaşayış məntəqəsi olan indiki Şirvan Zubovka qəsəbəsi və Papanino dəmiryol stansiyasını əhatə edirdi.
1930-cu ildə Zubovka rayonu yaradılır və eyni adlı rayonun mərkəzinə çevrilir. 1938-ci ildə qəsəbənin adından işğalçı çar ordusunun generalı Zubovun adı götürülür və ona yerli inqilabçının - Əli Bayramlının adı verilir. 1963-cü ildə şəhər statusu alan Əli Bayramlı 2008-ci ildə Şirvan adlanır. Onu da qeyd edək ki, respublikamızın qərb istiqamətinə gedən dəmir yolu və avtomobil yolları da buradan keçib gedir. Həmin yolların keçdiyi indiki Hacıqabul 1990-cı ilə kimi Şirvan şəhərinin tabeliyində olmuşdur.
Şirvan şəhərinin əsaslı inkişafı 1950-ci illərdən başlanır. Həmin vaxt burada neft və qaz yataqları kəşf edilmiş, "Şirvanneft" Neft və Qazçıxarma İdarəsi yaradılmışdır. Amma şəhərə şöhrət gətirən keçmiş SSRİ-də, eləcə də Avropada açıq havada tikilən ilk İstilik-Elektrik Stansiyası olmuşdur. 1958-ci ildə inşasına başlanan stansiyanın birinci bloku 1962-ci ildə işə salınmışdır. Zaqafqaziyanın (Cənubi Qafqazın) vahid enerji sasteminə qoşulan stansiya qonşu Gürcüstana və Ermənistana da elektrik enerjisi verilmişdir.
Sonra şəhərdə bir-birinin ardınca süni dəri, pambıqtəmizləmə, yağ ekstraksiyası, dəmir-beton məmulatları, saxsı boru, məişət cihazlarını avtomatik idarəetmə qurğuları, nərəbalıqartırma zavodları və digər müəssisələr tikilib istifadəyə verilmişdir. Bu müəssisələr hesabına şəhər aydan-aya, ildən-ilə böyümüş və nəticədə yaxın ərazidə, boz dağların ətəyində "Təzə şəhər" salınmışdır. Respublikamızın ayrı-ayrı rayonlarından, eləcə də keçmiş SSRİ-nin müxtəlif yerlərindən işləmək üçün buraya axın-axın gənclər gəlmişlər. Onların çoxu talelərini bu şəhərə bağlamışdır. Beləliklə, Şirvan şəhəri neftçilər, energetiklər, gənclər şəhəri kimi şöhrət tapmışdır.
90-cı illərin məlum hadisələri Şirvan şəhərindən də yan keçməmişdir. İdarə və müəssisələr, zavodlar fəaliyyətini dayandırmış, onilliklər boyu tikilib qurulanlar dağıdılmışdır. Ataların belə bir kəlamı var: "Yaman günün ömrü az olar". Ulu Öndər Heydər Əliyev 1993-cü ilin iyununda hakimiyyətə qayıtdıqdan sonra müstəqilliyini yenicə bərpa etmiş Azərbaycan inkişaf etməyə başladı. Neftdən gələn gəlirlər 2004-cü ildən başlayaraq, regionların dirçəldilməsinə də yönəldildi. Bundan Şirvan şəhərinə də pay düşdü. Qısa müddətdə şəhərdə Cənub Elektrik Stansiyası, Olimpiya İdman Kompleksi, Müalicə-Diaqnostika Mərkəzi, təhsil və istehsal müəssisələri, çoxmərtəbəli yaşayış evləri, ictimai binalar inşa edildi, parklar, xiyabanlar salındı. Şəhərin yaşıllaşdırılması diqqət mərkəzində saxlanıldı. Şəhər əhalisinin içməli suya, elektrik enerjisinə, təbii qaza olan ehtiyaclarının ödənilməsi üçün tədbirlər həyata keçirildi. Yollar çəkildi, şəhərin işıqlandırma sistemi yeniləndi. Şirvanda özünəməxsus cəhətlərdən biri də ayrı-ayrı məhəllələrdə inşa edilən mərasim evləri, söhbətgahlardır. Artıq bir neçə ildir "İDEA" İctimai Birliyi şəhərdə "Bizim həyət" layihəsi çərçivəsində abad məhəllələr və yaşıllıqlar salır.
Şirvan Şəhər İcra Hakimiyyəti başçısının 15 mart 2024-cü il tarixli sərəncamı ilə "Şirvan şəhərinin 2024 - 2028-ci illər üçün Yeniləşən Şirvan sosial-iqtisadi inkişaf proqramı" təsdiq edilmişdir. Proqramda 13 prioritet istiqamət müəyyən olunmuşdur.
Hazırda şəhərin şərqində Mənzil İnşaat Dövlət Agentliyinin (MİDA) həyata keçirdiyi layihə çərçivəsində ümumi ərazisi 8,11 hektar yaşayış kompleksi tikilir. 11-i onikimərtəbəli, 14-ü doqquzmərtəbəli olmaqla 25 yaşayış binasının inşa olunduğu kompleksdə 960 şagirdlik tam orta məktəb, uşaq bağçası və digər sosial əhəmiyyətli obyektlər də tikilir. Artıq 4 binada inşaat işləri başa çatıb.
Qeyd etmək lazımdır ki, MİDA tərəfindən kompleksdə görülən işlərin keyfiyyətinə ciddi nəzarət olunur. Bu məqsədlə tikintidə iştirak edən şirkətlərin məsul işçiləri ilə demək olar hər gün görüşlər keçirilir, ətraflı söhbətlər aparılır. Onlara izah edilir ki, Azərbaycan seysmik zonada yerləşdiyi üçün burada aparılan işlərə çox məsuliyyətlə yanaşılmalıdır.
Seyran CAVADOV,
"Azərbaycan"
jpg_1771399129.jpg)
