Hazırda uşaqlar arasında əsasən mövsümi virus infeksiyaları yayılıb. Bunlara influenza virusları, RSV (respirator sinsitial virus), adenoviruslar, rinoviruslar və enteroviruslar daxildir. Xüsusilə məktəbəqədər və ibtidai sinif yaş qrupunda həmin infeksiyaların yayılması daha geniş müşahidə edilir.
Bunu AZƏRTAC-a açıqlamasında Azərbaycan Tibb Universitetinin dosenti, tibb üzrə fəlsəfə doktoru, həkim-pediatr Nigar Bayramova deyib.
Həkim-pediatrın sözlərinə görə, infeksiyaların əlamətləri virusun növündən və uşağın yaşından asılı olaraq dəyişə bilər. Ən çox rast gəlinən simptomlar qızdırma, burun axması və öskürək, boğaz ağrısı, halsızlıq, iştahsızlıq, bəzi hallarda qusma, ishal və dəri səpkiləridir. Kiçikyaşlı uşaqlarda virus infeksiyaları daha ağır keçə və susuzlaşma riski yarada bilər.
Qeyd olunub ki, aşağıdakı əlamətlər olduqda mütləq pediatra müraciət edilməlidir:
• Qızdırmanın 38,5°C-dən yüksək olması və 2–3 gündən çox davam etməsi,
• Tənəffüsün çətinləşməsi, sürətli və ya çətin nəfəsalma,
• Qusma və ishal fonunda maye qəbulunun azalması,
• Uşağın letargik olması, ətrafla marağının azalması,
• Dəri səpkilərinin qızdırma ilə birlikdə sürətlə yayılması,
• Belə hallar ağırlaşma riskindən xəbər verə bilər.
Mütəxəssisin sözlərinə görə, virus infeksiyalarına yoluxmanın qarşısının alınması üçün profilaktika xüsusilə önəmlidir. Valideynlərə tövsiyə olunur ki, uşaqlara əl yuma vərdişi aşılansın, qapalı və sıx məkanlarda təmas məhdudlaşdırılsın, xəstə uşaqlar məktəbə və bağçaya göndərilməsin, uşaqlar yaşına uyğun, balanslı qidalansın, yuxu rejimi qorunsun, peyvənd təqviminə ciddi əməl edilsin.
N.Bayramova valideynlərə tövsiyə verərək deyib: “Virus infeksiyalarında antibiotiklərin təsiri yoxdur. Antibiotiklərin səbəbsiz istifadəsi bağırsaq mikrobiotasını pozur, antibiotik müqavimətinə yol açır, uşağın immun sisteminə mənfi təsir göstərir. Antibiotik yalnız həkim göstərişi ilə, bakterial infeksiya sübut olunduqda istifadə edilməlidir. Virus infeksiyaları uşaqlıq dövründə qaçılmazdır, lakin erkən tanıma, düzgün qulluq və panikaya düşmədən həkimə müraciət ağırlaşmaların qarşısını alır. Ən önəmlisi, valideynlər sosial mediada yayılan qeyri-dəqiq məlumatlara deyil, peşəkar tibbi məsləhətlərə güvənməlidirlər”.
jpg_1770119508.jpg)
