Özbəkistan 28 növ nadir metalların sənaye istehsalını təşkil edəcək. AZƏRTAC rəsmi UZA agentliyinə istinadla xəbər verir ki, bu barədə Prezident Şavkat Mirziyoyevin sədrliyi ilə keçirilən müşavirədə məlumat verilib.
Qeyd olunub ki, Prezident Şavkat Mirziyoyev mühüm sənaye mineralları üçün xammal bazasının inkişaf etdirilməsi və yüksək əlavə dəyərli məhsulların istehsalı ilə bağlı təqdimatı nəzərdən keçirib.
Müşavirədə bildirilib ki, qlobal miqyasda texnoloji metallara və vacib minerallara tələbat əhəmiyyətli dərəcədə artır. Bu xammal və məhsullar elektrotexnika, maşınqayırma, aviasiya, energetika, tibb və digər yüksəktexnologiyalı sektorlarda əvəzolunmazdır, Onlar, həmçinin iqtisadi təhlükəsizliyin və sənaye rəqabət qabiliyyətinin təmin edilməsində getdikcə daha vacib rol oynayır.
Prezident Mirziyoyev diqqətə çatdırıb ki, Özbəkistanın bu sahədə böyük potensialı var. Bununla belə, Özbəkistan Texnoloji Metallar Zavodunun fəaliyyəti hazırda volfram və molibden istehsalı ilə məhdudlaşır. Bu kontekstdə yeni yataqların işlənməsi, zənginləşdirmə müəssisələrinin, hidrometallurgiya və pirometallurgiya zavodlarının tikintisi yolu ilə 28 növ vacib mineralın sənaye istehsalını təşkil etmək potensialı var.
Təqdimatda 2026-2030-cu illər üçün bu potensialdan tam istifadə planları müzakirə edilib. Xüsusilə, ümumi dəyəri 4,2 milyard dollar olan 120 layihənin həyata keçirilməsi planlaşdırılır. Qeyd edilib ki, bu, sənayenin dəyərini 2028-ci ilə qədər 1 milyard dollara, 2030-cu ilə qədər isə 2 milyard dollara çatdıracaq.
Təkcə bu il ümumi dəyəri 166 milyon dollar olan 12 layihənin istifadəyə verilməsi planlaşdırılır. Bu layihələr üç yeni növ metalın - yüksək təmizlikli selen, tellur və reniumun, eləcə də toz metallurgiyası əsaslı avtomobil komponentləri və sulfat turşusu da daxil olmaqla 21 növ idxalı əvəz edən məhsulların istehsalını təmin edəcək. Bundan əlavə, yeni istehsal güclərinin işə salınması yüzlərlə iş yeri yaradacaq, büdcə gəlirlərini artıracaq və ixrac imkanlarını genişləndirəcək.
Volfram və molibden emalında tam “xammal-emal-hazır məhsul” zəncirinin inkişafına xüsusi diqqət yetirilib. Bu, təkcə konsentratlar və yarımfabrikatlar deyil, həm də metal tozları, ərintilər, çubuqlar, məftillər, sənaye hissələri və digər hazır məhsullar kimi yüksək əlavə dəyərli məhsulların istehsalına imkan verəcək.
677jpg_1781134810.jpg)
jpg_1781598705.jpg)
