Elm adamıyam. 1992-ci ildə bağçılıq-yoldaşlıq təsərrüfatının
üzvü kimi mənə Ləhiş bağ massivində torpaq sahəsi ayrılıb. 12 sot torpaq sahəsinə
orderim var. İndi torpağa dair çıxarış almaq istəyirəm, amma Daşınmaz Əmlakın
Dövlət Kadastrı və Reyestri (DƏDKR) imtina yazıb ki, ərazinin hasarı yoxdur.
İkinci dəfə "Asan xidmət"ə müraciət etdim. Əraziyə baxış keçirildi.
Dedilər ki, yanından yol keçir, hasar yoxdur, koordinatları göstərə bilmərik.
Yenə imtina cavabı aldım. Məsələ ilə bağlı məhkəməyə müraciət edə bilərəm?
A.Əliyev,
Bakı şəhəri
Daşınmaz əmlak üzərində hüquqların dövlət qeydiyyatı üçün əsaslar
və qaydalar "Daşınmaz əmlakın dövlət reyestri haqqında" Azərbaycan
Respublikasının Qanununa müvafiq tənzimlənir. Həmin əsaslar 2007-ci il mayın
22-dək müvafiq icra hakimiyyəti orqanlarının nəzdində olan bağ təsərrüfatı idarələri
tərəfindən vətəndaşlara ayrılmış bağ sahələrinə dair verilən icarə müqavilələri,
sərəncamlar və orderlər, kollektiv bağçılıq-yoldaşlıq təsərrüfatının üzvlərinin
siyahısına müvafiq olaraq verilmiş üzvlük kitabçası və ya üzvlərin iclasının
protokolundan çıxarışdır. Qeyd olunan sənədlərdən başqa, siz "Daşınmaz əmlakın
dövlət reyestri haqqında" qanunun 10.2-ci maddəsinə əsasən, torpaq sahəsinin
planı və ölçüsü; torpaq sahəsində bina, qurğu, tikililərin və digər daşınmaz əmlak
(onların tərkib hissələri) yerləşirsə, onların texniki pasportu, plan-cizgisi və
dövlət rüsumunun ödənilməsi barədə sənədi hüquqlarınızın qeydiyyatı ilə bağlı
DƏDKR-ə ünvanlanacaq ərizəyə əlavə etməlisiniz.
Əgər torpaq sahəsinin plan və ölçüsü yoxdursa, onun alınması
üçün siz "Daşınmaz əmlakın dövlət reyestri haqqında" qanunun 6.1.5-ci
maddəsinə əsasən, mərzçəkmə işlərinin görülməsi ilə bağlı DƏDKR-ə müraciət etməlisiniz.
Göründüyü kimi, vətəndaşdan yuxarıda qeyd olunan sənədlərdən
başqa digər - hasar çəkilməsi və s. kimi
işlərin görülməsinə dair sənədlər tələb oluna bilməz.
Vətəndaş üçün tələb, dediyimiz kimi, adıçəkilən qanunun 8-10-cu maddələrində qeyd olunan sənəd
və qaydalardır.
Əgər müraciətiniz yuxarıdakı meyarlara cavab verməsinə
baxmayaraq, inzibati orqandan imtina cavabı almısınızsa, siz inzibati
prosessual qanunvericiliyə uyğun olaraq, həmin qurumdan Bakı İnzibati Məhkəməsinə
şikayət edərək inzibati orqanın üzərinə öhdəlik qoyulması ilə bağlı tələb irəli
sürə bilərsiniz. Əlavə edək ki, əgər əlinizdə torpağın plan-cizgisi yoxdursa,
bununla bağlı dövlət arxivinə də müraciət edilə bilər.
Məhkəmə bir qayda olaraq orqanın üzərinə qeydiyyat üçün əsas
olan sənədlərin qəbul olunması və həmin şəxsin əmlak hüquqlarının tanınması barədə
öhdəlik qoyur və qərar vətəndaşın xeyrinə çıxarıldığı halda bunun əsasında
torpağa dair çıxarış verilir.
Universiteti 2023-cü ildə bitirmişəm. 9 aya yaxındır ki, işləyirəm.
Bilmək istəyirəm ki, əyani təhsil illərim əmək stajında nəzərə alınmalıdırmı?
Sualınızla bağlı bildiririk ki, Əmək Məcəlləsində "əmək
stajı" və "əmək stajına daxil olan dövrlər"in anlayışları verilməsə
də, məcəllənin bir sıra maddələrinin təhlilinə və ölkəmizdə oturuşmuş təcrübəyə
əsasən, "əmək stajına daxil olan dövr" dedikdə işçinin faktiki olaraq
işlədiyi dövr nəzərə alınır. Məsələn, Əmək Məcəlləsinin əlavə məzuniyyətlərin
müddətləri və onun verilməsi ilə bağlı məsələləri tənzimləyən 116-cı maddəsinə əsasən,
əmək stajına görə əlavə məzuniyyətin müddəti işçinin müəssisədə işəgötürənlə əmək
müqaviləsi bağlayaraq faktiki olaraq işlədiyi dövrə əsasən müəyyən edilir.
Bundan başqa, şəxsə gələcəkdə pensiya təyinatı ilə bağlı "sığorta
stajı" anlayışı da nəzərə alınmalıdır. Belə ki, sığorta stajına daxil edilən
iş və ya digər fəaliyyət müddətləri "Əmək pensiyaları haqqında" Azərbaycan
Respublikası Qanununun 21-ci maddəsilə tənzimlənir. Həmin maddədə isə əyani təhsil
müddətinin sosial sığorta stajına daxil edilməsi nəzərdə tutulmamışdır.
Qeyd olunan normaların mahiyyətindən də göründüyü kimi, əmək
stajının müddəti işçinin faktiki işlədiyi dövrlə məhdudlaşdırılmışdır və təhsil
dövrü iş stajını təşkil edən müddətə daxil edilməmişdir.
Sualları cavablandırdı:
Fərhad NƏCƏFOV,
Azərbaycan Respublikası Vəkillər Kollegiyasının üzvü
