İllər idi ki, Qarabağ əsirlikdəydi. Bu cənnət diyarın dağlarına, daşlarına həsrət idik. Könlümüz o dağlardan, o yurdlardan keçsə də, özümüz həsrətin oduna yanırdıq. Mahnıların qanadında, muğamların sədasında gedirdik Qarabağa... Qarabağı yağı işğalından azad etməyin isə bircə yolu var idi - müharibə. Müharibədə qalib gəlmək üçün isə güclü iqtisadiyyata və qüdrətli orduya sahib olmaq lazım idi...
Bu düsturu da hamıdan yaxşı Azərbaycan Respublikasının Prezidenti İlham Əliyev bilirdi. Hakimiyyətə gəldiyi gündən xalqa "işğalda olan bütün torpaqlarımız azad ediləcək" mesajını verən Prezident səbirlə davranırdı. Nəyi necə, nə vaxt etmək lazım olduğunu dəqiq bilən dövlətimizin başçısı əvvəl ölkənin iqtisadiyyatını gücləndirib regionun lider dövlətinə çevirdi. Daha sonra isə bizi zəfərə aparan qüdrətli Azərbaycan Ordusunu yaratdı. 27 sentyabr 2020-ci ildə başlanan Vətən müharibəsi torpaq davası ilə yanaşı, həm də bir şərəf, ləyaqət, qürur savaşı idi...
44 günlük Vətən müharibəsində qurduğu ordu ilə Prezident İlham Əliyev xalqımızı zəfərə apardı. Ruhumuzun başı üzərində dolandığı, əbədi olaraq könlümüzü verdiyimiz Qarabağın hər qarışından qanları ilə qəhrəmanlıq dastanı yazan Azərbaycan əsgəri keçdi!
30 illik işğal dövründə düşmən yalnız yurdlarımızı dağıtmaqla kifayətlənməmişdi. Azərbaycanlılara məxsus minillik tarixi yadigarları, mənəvi kimliyimizi təsdiq edən milli-mədəni abidələrimizin izini silməyə, müqəddəs dini ocaqlarımızı, inanc yerlərimizi də tamamilə dağıdıb məhv etməyə çalışmışdı. İşğalçılar üzərində qazanılan möhtəşəm Zəfərdən sonra Qarabağda böyük quruculuğa start verildi. Aparılan qruculuq işləri milli-mənəvi dəyərlərin bərpası ilə başladı.
Prezident İlham Əliyev, birinci xanım Mehriban Əliyeva və qızları Leyla Əliyevanın 14 yanvar 2021-ci ildə Şuşaya ilk səfərləri zamanı Şuşanın işğalı zamanı güllələnmiş və sonradan Bakıya gətirilmiş Azərbaycanın üç dahi şəxsiyyəti - Üzeyir bəy Hacıbəyli, Bülbül və Natəvanın heykəllərini Şuşaya apardılar. Ziyarət etdikləri ünvanların hamısı - Şuşa Realnı Məktəbi, Yuxarı Gövhər ağa, Aşağı Gövhər ağa, Saatlı məscidləri, Qazançı kilsəsi, Bülbülün ev-muzeyi, Vaqifin türbəsi, tarixi dəyər daşıyan Cıdır düzü, milli-mənəvi dəyərlərimizi simvolizə edən abidələr idi. Prezident və ailəsi ziyarət etdikləri məscidlərə Məkkədən gətirilmiş "Qurani-Şərif" kitablarını hədiyyə verir, dualar edirdilər. Bu nə demək idi? Bununla Qarabağın xilaskarı bütün dünyaya mesaj verirdi ki, bizim üçün xalqımızı formalaşdıran milli-mənəvi dəyərlər hər şeydən üstündür.
Dövlət başçısı İlham Əliyevin, birinci xanım Mehriban Əliyevanın işğaldan azad olunan torpaqlarımıza hər səfəri Qarabağın bərpa və quruculuq sahəsinin yeni səhifəsi kimi tariximizdə əbədiləşir. 2023-cü ilin mayında Prezident İlham Əliyev və Birinci xanım Mehriban Əliyevanın yenidən qurulan Ağdama səfəri Ağdam Muğam Mərkəzinin təməlqoyması ilə muğamsevərlərin yaddaşında əbədiləşmişdi. Üstündən çox keçməmiş kinozal, kitabxana və iki rəqs zalı, 474 yerlik konsert zalı, müxtəlif mədəni tədbirlər, o cümlədən muğam konsertləri təşkil etmək üçün hərtərəfli şərait, 15 dərs otağı, sərgi salonu, iclas zalı, kafe olan mərkəz istifadəyə verildi. Onu da qeyd edək ki, Muğam Mərkəzinin ərazisində 615 tamaşaçı tutumu olan açıq amfiteatr da inşa edilib. Bu mərkəz Qarabağ bölgəsində qədim muğam sənəti incisinin işğaldan əvvəlki şöhrətinin bərpası, tədrisi və təbliğində, gənc nəsildə muğama sevginin aşılanmasında mühüm rol oynayacaq. Qeyd edək ki, muğamın təbliği və inkişafı istiqamətində dövlətimiz tərəfindən görülən işlərə birinci xanım Mehriban Əliyevanın rəhbərlik etdiyi Heydər Əliyev Fondu da mühüm töhfələr verir. Fondun təşkilatçılığı və dəstəyi ilə bu istiqamətdə respublika və beynəlxalq əhəmiyyətli ənənəvi layihələr həyata keçirilir. Həmin layihələrin nəticəsidir ki, Azərbaycan muğamı UNESCO-nun "Bəşəriyyətin şifahi və qeyri-maddi mədəni irsinin şah əsərləri" siyahısına salınıb.
Tariximizin minillik yaddaşından süzülüb gələn, könüllərdə məskən salan, xalqın adında əbədiləşən mənəviyyat abidəsi, xalqın milli kimliyini dünyaya təqdim edən səsdir muğam. Muğam onu yaradan və yaşadan xalqın həyat qaynağı, yaşam mənbəyidir. Muğam xalq musiqisi təfəkkürünün dərin mənalı, aydın və səlis ifadəli yaradıcılıq məhsuludur. Ağdamda Muğam Mərkəzinin açılışı, əslində, dövlətimizin milli dəyərlərə verdiyi qiymətin ən gözəl nümunəsidir.
İgidlərimiz qəhrəmanlıq musiqilərindən, muğamlardan, təsniflərimizdən öyrəndilər vətəni sevməyi, vətən uğrunda candan keçməyin fəlsəfəsini. Ən çətin anlarda, amansız döyüşlərin getdiyi vaxtlarda vətən nəqməsi oxudu mərd oğullarımız. Valideynlərlə, məktəbdə müəllimlərlə yanaşı, ruhumuza hopan qəhrəmanlıq mahnıları oğullarımıza vətəni sevdirdi...
Muğam Mərkəzinin açılışı münasibətilə Azərbaycan xalqını ürəkdən təbrik edən dövlət başçısı xüsusi olaraq vurğuladı: "Bütün bunlar cəmiyyətdə birmənalı qəbul edilir: siyasi iradə, iqtisadi güc, müstəqil siyasət, güclü ordu, vətənpərvərlik və gənc nəsil - milli ruhda tərbiyə olunan, bu torpaqları heç vaxt görməyən gənc nəsil. Bu torpaqları heç vaxt görməyənlərin, müharibədə iştirak edənlərin əksəriyyəti işğal dövründə doğulmuş insanlar idi. Onları doğma torpağa çəkən o tarixi bağlar - bütün bu və digər amillər bizim Qələbəmizi şərtləndirdi və biz mütləq və tam Qələbə qazandıq. Nə bizdən qabaqkı onilliklər ərzində, nə bizdən sonrakı dörd il yarım ərzində heç kim mütləq və tam Qələbə qazanmamışdır və elə görünür ki, qazanmayacaq. Bunu mən müqayisə üçün demirəm. Amma dünyada hər şey müqayisə ilə ölçülür. Biz 44 gün ərzində hər gün irəli gedirdik, hər gün itkilər verirdik, şəhidlər verdik. Allah bütün şəhidlərimizə rəhmət eləsin! Hər gün yeni uğurlar əldə edirdik, hər gün hansısa kəndləri azad edirdik. Bu, bizə əlavə ruh verirdi, əlavə güc verirdi. Xalqımız tam birləşdi. Bu, mənə Ali Baş Komandan kimi əlavə mənəvi ruh verirdi. Bu, bizim hamımızın Qələbəsidir. Azərbaycan xalqı bu Qələbəni əldə etməklə öz tarixi böyüklüyünü bütün dünyaya nümayiş etdirdi".
Prezident İlham Əliyev bütün dünyaya sübut etdi ki, biz Qarabağda silah səsini kəsib sülh nəğməsi oxuyan xalqıq. Bu gün Qarabağın hər qarışına yeni nəfəs verilir. Düşmənin xarabazara çevirdiyi Qarabağ əsl cənnətə dönüb. Cənnət görmək istəyən Qarabağa gəlsin!
Elşən QƏNİYEV,
"Azərbaycan"
jpg_1749076194.jpg)
