Şəhər icra hakimiyyətinin başçısı Niyazi Bayramovun rəhbərliyi ilə Gəncənin nümayəndə heyəti Çin Xalq Respublikasına səfər edib. Nümayəndə heyətinin tərkibində Milli Məclisin deputatı, “Gəncə Avtomobil Zavodu” İstehsalat Birliyi Müşahidə Şurasının sədri Xanlar Fətiyev, eləcə də Azərbaycanın Çindəki səfirliyinin nümayəndələri olmuşlar.
Səfər çərçivəsində nümayəndə heyəti Çindao şəhərində merin müavini Qen Tao ilə görüşmüşdür. Görüşdə bildirilmişdir ki, son illər Azərbaycan Prezidenti İlham Əliyev və Çin Xalq Respublikasının Sədri Si Cinpin tərəfindən həyata keçirilən siyasət nəticəsində Azərbaycan-Çin münasibətləri bütün sahələr üzrə inkişaf edərək yeni mərhələyə yüksəlmişdir. Prezident İlham Əliyevin ötən ilin aprelində Çinə dövlət səfəri zamanı hərtərəfli strateji tərəfdaşlıq münasibətlərinin qurulması iki ölkə arasında əlaqələrdə yeni səhifə açmışdır.
Qen Tao demişdir ki, Azərbaycan nümayəndə heyətinin bu səfəri 2023-cü ildə Şanxay Əməkdaşlıq Təşkilatı tərəfindən Çindaoda təşkil olunmuş “Xalq diplomatiyası və qardaşlaşmış şəhərlər” forumu çərçivəsində imzalanmış əməkdaşlıq sazişindən sonra ilk səfərdir. O, məlumat vermişdir ki, 10 milyondan artıq əhalisi olan Çindao Çinin iri beynəlxalq liman şəhərlərindən biri və əsas turizm və sənaye mərkəzlərindəndir. Şəhərin 50-yə yaxın ölkənin 90-dan çox şəhəri ilə əlaqələri mövcuddur. Qen Tao həmçinin vurğulamışdır ki, son illər Azərbaycan ilə ticarət əlaqələri genişlənmişdir. Çindaoda artıq 5 ildir “Azərbaycan Ticarət Evi” fəaliyyət göstərir. Azərbaycan tərəfi şəhərdə keçirilən beynəlxalq sərgilərdə də fəal iştirak edir. Bundan əlavə, Çindao ilə Bakı arasında dəmir yolu və avtomobil nəqliyyatı vasitəsilə yükdaşımalar həyata keçirilir. Gəncənin zəngin mədəni və ədəbi irsə malik olduğunu qeyd edən Qen Tao iki şəhər arasında iqtisadi, ticarət, mədəni, humanitar və turizm sahələrində əməkdaşlıq üçün geniş potensialın olduğunu bildirmişdir.
Niyazi Bayramov isə öz növbəsində Gəncənin tarixi-mədəni irsi və sosial-iqtisadi inkişafı barədə ətraflı məlumat vermişdir. Bildirmişdir ki, şəhərdə 3 ali təhsil və 3 orta ixtisas təhsili məktəbləri, iri sənaye müəssisələri, o cümlədən “Gəncə Avtomobil Zavodu” İstehsalat Birliyi, “Azəralüminium” MMC, “Gəncə Şərab-2”, “SemSan” və “Parıltı Halı” kimi müəssisələr fəaliyyət göstərir. Diqqətə çatdırılmışdır ki, Gəncə 2016-cı ildə Avropanın Gənclər Paytaxtı, 2017-ci ildə MDB-nin Mədəniyyət Paytaxtı, 2019-cu ildə Avropanın İdman Şəhəri, 2025-ci ildə isə MDB Ölkələrinin İdman Paytaxtı seçilmişdir.
Şəhər rəhbəri həmçinin Çindao ilə ticarət-iqtisadi və mədəni-humanitar əməkdaşlığın daha da genişləndirilməsinin vacibliyini vur-ğulamışdır. Qeyd etmişdir ki, Gəncənin dünyanın müxtəlif ölkələrinin bir çox şəhəri ilə qardaşlıq və əməkdaşlıq əlaqələri mövcuddur və bu, qarşılıqlı təcrübə mübadiləsi üçün geniş imkanlar açır. Niyazi Bayramov Çindao rəhbərliyini Gəncəyə rəsmi səfərə dəvət etmişdir.
Nümayəndə heyəti səfər çərçivəsində dünyaca məşhur “Hisense” şirkətinin baş ofisinə baş çəkmiş, Çinin ən iri 10 elektrotexnika şirkəti siyahısına daxil olan müəssisənin məişət texnikası, yüksək texnologiyalar sahəsində nailiyyətləri ilə tanış olmuşdur.
S.YUNİSOĞLU,
“Azərbaycan”
jpg_1777411814.jpg)
