WUF13 iştirakçı ölkələrə şəhərsalma təcrübələrini bölüşmək üçün geniş imkan verəcək
Ötən əsrin əvvəlindən başlanan urbanizasiya prosesi bu gün də davam edir. İnkişaf etmiş ölkələr üzrə şəhərlərdə yaşayan əhalinin səviyyəsi 90 faizdən yuxarıdır və həmin ölkələrdə bu proses, demək olar ki, başa çatıb. Lakin inkişaf etməkdə olan və geridə qalan ölkələrdə isə urbanizasiya prosesləri davam edir.
Hazırda iqtisadi cəhətdən geridə qalan ölkələrdən inkişaf etmiş ölkələrə insanların kütləvi köç etməsi üzündən mədəniyyətlərarası ziddiyyətlərin baş verməsinin şahidi oluruq. İş və yaxşı yaşamaq üçün insanların şəhərlərə üz tutması meqapolislərdə ciddi sosial problemlərin meydana gəlməsi ilə müşahidə edilir, başqa sözlə, artan əhalinin iş, təhsil, səhiyyə və mənzillə təminatı ciddi sıxıntılara gətirib çıxarır. Bunun üçün dünya səviyyəsində şəhərsalmada yeni qaydalardan istifadə olunması, təcrübə mübadiləsinin aparılması zərurəti yaranır və belə qlobal məsələlərin həllinə Birləşmiş Millətlər Təşkilatı səviyyəsində diqqət yetirilir.
Məlum olduğu kimi, gələn ay Bakıda Dünya Şəhərsalma Forumunun 13-cü sessiyası (WUF13) keçiriləcək. Belə bir mötəbər tədbirin ölkəmizdə keçirilməsi BMT səviyyəsində Azərbaycana göstərilən etimadın göstəricisidir. Digər tərəfdən, ölkəmizin dünyada şəhərsalma ilə bağlı həllərin öyrənilməsinə ehtiyacı var. 30 illik erməni işğalı nəticəsində şəhər və kəndlərimiz xarabazarlığa çevrilib. İndi biz həmin dağılmış yaşayış məntəqələrini müasir şəhərsalma təcrübəsindən istifadə edərək yenidən qururuq.
Bu beynəlxalq tədbirlə əlaqədar ölkə ictimaiyyətinin forum barədə məlumatlandırılması məqsədilə müxtəlif şəhərlərdə WUF13 festivallarının keçirilməsinə başlanılıb. Bu çərçivədə günün birinci yarısı tədbirin keçirildiyi şəhərlərdə WUF13 ilə bağlı məlumatlandırma sessiyaları təşkil ediləcək. Axşam saat 18:00-da isə festival açıq havada keçirilərək ictimai proqramlarla yekunlaşacaq.
Festivalın açılışı dünən Bakıda Dənizkənarı Bulvar ərazisində yerləşən Saat Qülləsi meydanında baş tutub. Növbəti tədbirlərin aprelin 29-da Sumqayıtın Göyərçin Parkında, aprelin 30-da Quba şəhərinin Nizami Parkında, mayın 2-də Lənkəran şəhərinin Qala Xiyabanı Parkında, mayın 4-də Qəbələ şəhərinin Heydər Əliyev Parkında, mayın 5-də Şəki şəhərinin Bəxtiyar Vahabzadə Parkında, mayın 6-da Mingəçevir şəhərinin Heydər Əliyev meydanında, mayın 8-də Gəncənin Heydər Əliyev adına meydanında keçirilməsi nəzərdə tutulur. Festival marafonu mayın 10-da Xankəndi şəhərinin Zəfər meydanında davam edəcək. Mayın 13-də isə Bakıda Dənizkənarı Bulvar ərazisində yerləşən Saat Qülləsi meydanında xüsusi tədbirlə başa çatacaq.
Bunlardan savayı, WUF13-ə hazırlıqla bağlı Dövlət Şəhərsalma və Arxitektura Komitəsi və BMT-nin Məskunlaşma Proqramının birgə təşəbbüsü olan Azərbaycan Şəhərsalma Kampaniyası (AUC2026) çərçivəsində Gənclər və İdman Nazirliyinin təşkilatçılığı ilə "Gənclər şəhərlər üçün" mövzusunda milli səviyyəli müzakirələrin ilkin məlumatlandırma görüşü keçirilib. Ölkədə fəaliyyət göstərən 33 Gənclər Evində keçən bu müzakirələrin əsas məqsədi gənclərin şəhərsalma və şəhər inkişafı proseslərində fəal iştirakını təşviq etmək olub. Bu çərçivədə gənclərlə şəhər mobilliyi, inklüziv ictimai məkanlar, davamlı şəhər inkişafı və urban problemlər üzrə müzakirələr aparılıb. Eyni zamanda ideyalar toplanıb və ilkin həll təklifləri formalaşdırılıb.
Forumun tarixində ilk dəfə olaraq Bakıda Liderlərin Zirvə Görüşü də keçiriləcək. Azərbaycan hökumətinin təşəbbüsü ilə təşkil olunan bu görüş dünyanın müxtəlif ölkələrindən dövlət və hökumət başçılarını, eləcə də yüksəksəviyyəli liderləri Bakıda bir araya gətirəcək. "Zirvə görüşü şəhərlərin gələcəyinə dair strateji prioritetləri müəyyənləşdirmək, beynəlxalq əməkdaşlığı gücləndirmək və Yeni Şəhərsalma Gündəliyinə töhfə vermək məqsədi daşıyır. Bu təşəbbüslər bir daha göstərir ki, mənzil təminatı və şəhərsalma artıq yalnız texniki məsələ deyil, qlobal səviyyədə strateji əhəmiyyət daşıyan və yüksəksəviyyəli liderlik tələb edən sahədir", - deyə WUF13-ün milli koordinatoru Anar Quliyev bildirib.
Bir sözlə, tədbirə qatılacaq ölkələr üçün WUF13 öz şəhərsalma təcrübələrini təqdim etmək, innovativ yanaşmaları bölüşmək və qlobal dialoqa töhfə vermək baxımından geniş imkan yaradacaq.
Rüstəm KAMAL,
"Azərbaycan"
