Adətən biz Qəbələdə Beynəlxalq Musiqi Festivalını yay aylarında təşkil edirdik. Ancaq bizə belə bir təklif gəldi ki, maraqlı qış festivalı keçirək. Çünki son illər ölkəmizdə qış turizmi sürətlə inkişaf edir. Qəbələyə istər Bakıdan, bölgələrdən, istərsə də xaricdən çox sayda qonaq gəlir. Festivalla bağlı dünyaşöhrətli müğənnimiz Yusif Eyvazova müraciət etdik və o da İtaliyadan, İspaniyadan öz dostlarını, məşhur ifaçıları dəvət etdi. Festivalın açılışında onların iştirakı ilə çox maraqlı konsert proqramını izlədik.
Bu sözləri AZƏRTAC-ın bölgə müxbirinə müsahibəsində Qəbələ “Qış nağılı” Beynəlxalq Musiqi Festivalının bədii rəhbəri, Üzeyir Hacıbəyli adına Bakı Musiqi Akademiyasının rektoru, Xalq artisti Fərhad Bədəlbəyli söyləyib.
Bu kimi festivalların keçirilməsinin ölkəmiz üçün böyük əhəmiyyət kəsb etdiyini vurğulayan festivalın bədii rəhbəri deyib: “Xarici dövlətlərdən təşrif buyuran qonaqlar, festival iştirakçıları ölkəmizin mədəniyyəti, incəsənəti ilə birbaşa tanış olurlar. Musiqinin gücü o qədər qüdrətli və sərhədsizdir ki, bu festivalda dünyanın müxtəlif ölkələrindən gələn məşhur solistlər və ansamblların ifası ilə biz mənəvi yaxınlığımızı hiss edirik. Festivalın əsas məqsədi də məhz bundan ibarətdir.
Ona görə də mən, ilk növbədə, Heydər Əliyev Fonduna, onun rəhbəri, Birinci vitse-prezident Mehriban Əliyevaya çox böyük təşəkkürümü bildirirəm. Fond həmişə bizi dəstəkləyir. On beş il ərzində keçirilən bütün festivallar məhz Heydər Əliyev Fondunun adı ilə bağlıdır. Bu dəfə də dəstəklədilər, təşkilati məsələlərdə bizə çox böyük kömək göstərdilər. Eyni zamanda, festivalı dəstəklədiyinə görə rəhbəri olduğum Bakı Musiqi Akademiyasının kollektivinə və “Gilan”a da təşəkkürümüzü bildiririk. Çox şadam ki, bizim tələbələrimiz də festivalda fəal iştirak edirlər. Dövlət Akademik Opera və Balet Teatrının Simfonik Orkestrinin ifaçılarının yarısı bizim tələbələrdir”.
Builki festivalın da əlamətdar hadisə ilə yadda qalacağını vurğulayan Fərhad Bədəlbəyli deyib: “Bu il dahi bəstəkar Üzeyir Hacıbəylinin 140 illiyidir. Sentyabrda bu yubileyi təntənə ilə qeyd edəcəyik. Məhz ona görə də festivalımız ölməz bəstəkarın “Koroğlu” operasından “Uvertüra” ilə başlandı. Çox şadam ki, növbəti konsertlərdə məşhur bəstəkarımız Qara Qarayevin, həmçinin Avropa bəstəkarlarının əsərləri ifa olunacaq. Əminəm ki, festivalımız bu soyuq qış günlərində musiqisevərlərə isti, xoş ovqat bəxş edəcək”.
