- Sosial mediada şəxsi məlumatlarım icazəsiz paylaşılıb, ünvanıma böhtan xarakterli sözlər yazılıb. Bununla bağlı hansı hüquqi addımlar ata bilərəm?
L.CƏLİLLİ,
Şəmkir rayonu
Sualınıza təfərrüatlı şəkildə cavab verilməsi məqsədilə bildiririk ki, Azərbaycan Respublikasının Konstitusiyasının 46-cı maddəsinə əsasən, hər kəsin öz şərəf və ləyaqətini müdafiə etmək hüququ vardır. Şəxsiyyətin ləyaqəti dövlət tərəfindən qorunur. Konstitusiyamızın 47-ci maddəsində göstərilir ki, hər kəsin fikir və söz azadlığı vardır. Bununla belə fikir və söz azadlığından sui-istifadə edərək insanlara böhtan atılması cinayət məsuliyyətinin yaranması üçün əsasdır. Cinayət Məcəlləsinin 147-ci maddəsi böhtanın nə demək olduğunu müəyyən etməklə belə hərəkətlərə yol vermiş şəxslər üçün cinayət məsuliyyəti də nəzərdə tutur. Böhtan dedikdə yalan olduğunu bilə-bilə hər hansı şəxsin şərəf və ləyaqətini ləkələyən və ya onu nüfuzdan salan məlumatları kütləvi çıxışlarda, kütləvi nümayiş etdirilən əsərdə, mediada və ya kütləvi nümayiş etdirildiyi halda internet informasiya ehtiyatında yayma başa düşülür və 1000-1500 manatadək miqdarda cərimə ilə və ya 240 saatdan 480 saatadək müddətə ictimai işlər və ya 1 ilədək müddətə islah işləri və ya 6 ayadək müddətə azadlıqdan məhrum etmə ilə cəzalandırılır.
Bəzi hallarda sosial şəbəkələrdə qeydiyyatdan keçmiş şəxslər saxta profil hesabı açaraq öz ad və soyadlarını gizlədirlər. Lakin saxta profil adlarından istifadə edən şəxslər bir sıra hallarda anonim olduqları üçün cəzasız qalacaqlarını güman edərək digər şəxsləri sosial mediada təhqir etməkdən çəkinmirlər. Belə hallarda Cinayət Məcəlləsinin 148-1-ci maddəsinə əsasən məsuliyyət nəzərdə tutulmuşdur. Belə ki, internet informasiya ehtiyatında saxta istifadəçi adlar, profil və ya hesablardan istifadə edərək kütləvi nümayiş etdirməklə böhtan atma və ya təhqir etmə 1000-2000 manatadək miqdarda cərimə və ya 360 saatdan 480 saatadək müddətə ictimai işlər və ya 2 ilədək müddətə islah işləri və ya 1 ilədək müddətə azadlıqdan məhrum etmə ilə cəzalandırılır.
Cinayət-Prosessual Məcəllənin 37-ci maddəsinə müvafiq olaraq, böhtan cinayəti üzrə cinayət təqibi xüsusi ittiham qaydasında aparılır. Xüsusi ittiham qaydasında cinayət təqibi zərər çəkmiş şəxsin məhkəməyə şikayəti əsasında həyata keçirilir. "Xüsusi ittiham qaydasında şikayətlərə dair işlərə baxılması üzrə məhkəmə təcrübəsi haqqında" Azərbaycan Respublikası Ali Məhkəməsi Plenumunun 21.03.2014-cü il tarixli 3 nömrəli qərarına əsasən, böhtan cinayətinə həmin məlumatları internet informasiya ehtiyatlarında yaymış şəxsin Azərbaycan Respublikasında axırıncı yaşayış yeri üzrə fəaliyyət göstərən məhkəmə tərəfindən baxılır.
- Bacıma əmlak bağışlamaq istəyirəm, amma hüquqi yollarını dəqiq bilmirəm. Hara müraciət etməliyəm, hansı sənədlər lazımdır?
Cavidan MƏHƏRRƏMOĞLU,
Sumqayıt şəhəri
Sualınıza cavab olaraq bildiririk ki, əmlakın bağışlanması ilə bağlı məsələlər Azərbaycan Respublikasının Mülki Məcəlləsi, "Notariat haqqında" Qanun və "Notariat hərəkətlərinin aparılması qaydaları haqqında Təlimatın təsdiq edilməsi barədə" Nazirlər Kabinetinin 11.09.2000-ci il tarixli 167 nömrəli qərarı əsasında tənzimlənir. Sualınızdan bağışlamaq istədiyiniz əmlakın daşınar, yoxsa daşınmaz əmlak olması bəlli olmadığından bu tip sualların verilməsi təcrübəsi nəzərə alınaraq, suala daşınmaz əmlakın bağışlanılması prizmasından cavab veriləcəkdir.
Qeyd etdiklərinizdən göründüyü kimi, bağışlama sizin yaxın qohumunuz olan bacınıza ediləcəkdir. "Yaxın qohum" amili bağışlama müqaviləsinin rəsmiləşdirilməsi üçün mühüm əhəmiyyət kəsb edir. Beləliklə, bunun üçün siz istənilən notariat ofisinə və ya istənilən "ASAN xidmət" mərkəzində fəaliyyət göstərən notariat ofisinə yaxınlaşa bilərsiniz. Bağışlama üçün siz bağışlayan şəxs olaraq bağışlanılacaq daşınmaz əmlak üzərində mülkiyyət hüququnu təsdiq edən sənədi (çıxarış); daşınmaz əmlak üzərində yüklülüyün və ya həbsin olub-olmaması barədə Əmlak Məsələləri Dövlət Komitəsi yanında Daşınmaz Əmlakın Dövlət Reyestri Xidmətinin verdiyi arayışı; əgər siz nikahdasınızsa, nikah haqqında şəhadətnamənizi; əmlakın bağışlanmasına ərinizin notariat qaydasında təsdiq edilmiş razılığını; varsa, yaşayış ünvanında yaşayış yeri üzrə qeydiyyatda olması barədə qeydiyyatda olan yetkinlik yaşına çatmış bütün ailə üzvlərinin notariat qaydasında təsdiq edilmiş razılığını; bacınızla qohumluq münasibətlərini təsdiq edən sənədləri (vətəndaşlıq vəziyyəti aktlarının dövlət qeydiyyatı orqanının verdiyi sənədləri) notariusa təqdim etməlisiniz. Notariusun yanında rəsmiləşdirmə zamanı siz və bacınızın (və ya sizin notariat qaydasında təsdiq edilmiş etibarnamə əsasında onun nümayəndələrinin) iştirakı zəruridir.
Bağışlama yaxın qohumunuz olan bacınıza edildiyi üçün "Dövlət rüsumu haqqında" qanuna əsasən, 25 manat məbləğində dövlət rüsumu ödənilir.
Sualları cavablandırdı:
Fərhad NƏCƏFOV,
Azərbaycan Respublikası Vəkillər Kollegiyasının üzvü
jpg_1739084738.jpg)
