Bilmək istəyirəm

- Qaz xətləri çəkilərkən əgər hər hansı bir evin və yaxud obyektin  qapısından keçirsə, boru hündürlüyə qaldırılaraq çəkilməlidir, yoxsa torpağın altından keçirilməlidir? Hər dəfə kəndə gedəndə darvazaların qarşısından keçən borunun torpaq altında olması məni narahat edir, çünki üzərindən maşın da keçir, bəzən yağışlı-qarlı havada  su da yığılır. Bu, texniki normalara uyğundurmu? Bilmək istədiyim odur ki, qeyd etdiyim hallarda boru qayda-qanunla necə çəkilməlidir?

Minurə BABAYEVA,

Ağsu rayonu

- Qanunvericiliyə - "Qaz təchizatında mühafizə zonaları və təhlükəsizlik tədbirləri Qaydalarının təsdiq edilməsi haqqında" Azərbaycan Respublikası Nazirlər Kabinetinin Qərarına əsasən, qaz kəmərləri binaların divarı boyu çəkilərkən qapı və pəncərə boşluqları ilə kəsişməməlidir. Yüksəktəzyiqli qaz kəmərləri yalnız qapı, pəncərə və sair boşluğu olmayan bütöv divarlarla və ya istehsalat binalarının yuxarı mərtəbələrinin pəncərələrinin üstü ilə çəkilə bilər. Yəni qaz borusunun birbaşa qapıdan və ya pəncərədən keçirilməsi qadağandır. Əgər belə bir vəziyyət yaranarsa, boru ya divarın bütöv hissəsindən, ya da torpağın altından, xüsusi futlyarda keçirilməlidir. Qapıdan və ya pəncərədən borunun keçirilməsi yalnız istisna hallarda, texniki əsaslandırma olduqda və müvafiq normativ tələblərə uyğun olaraq mümkündür, lakin əsas prinsip - qapı və pəncərə boşluqları ilə kəsişmənin yolverilməzliyidir. Bu qaydanın pozulması inzibati məsuliyyətə səbəb ola bilər. Praktikada təhlükəsizlik və istismar qaydalarına uyğun olaraq, qaz boruları qapıdan keçməməli, ya divarın bütöv hissəsindən, ya da yeraltı xüsusi qoruyucu futlyarda çəkilməlidir. Beləliklə, sualınıza cavab olaraq bildiririk ki, əgər normativlərə uyğun çəkilmişdirsə, qaz borusunun torpaq altından çəkilməsi qanunvericiliklə qadağan deyildir.

- Yaşadığımız mənzil özəlləşdirilib. Qonşularda da  özəlləşmiş mənzildir. Amma Mənzil-Kommunal İstismar Sahəsinin (MKİS)  işçiləri hər həftə qapı-qapı gəzərək "ev pulu" tələb edirlər. Bu hərəkət nə dərəcədə doğrudur? Biz onların tələbini yerinə yetirməyə məcburuq? MKİS, demək olar ki, heç kimlə müqavilə bağlamayıb. Qanuna görə, bu məsələ necə tənzimlənir?

Yeganə XUDİYEVA,

Bakı şəhəri

  - Azərbaycan Respublikasının Mənzil Məcəlləsinin tələbinə uyğun olaraq, özəlləşdirilmiş mənzillərin (evlərin) mülkiyyətçiləri yalnız xidmət göstərən təşkilatla yazılı müqavilə bağladıqları halda, həmin təşkilata "ev pulu" və digər xidmət haqları ödəməyə borcludurlar. Dövlət mənzil-istismar və təmir-tikinti təşkilatları (el arasında - "JEK"-lər) özəlləşdirilmiş mənzillərə yalnız müqavilə əsasında xidmət göstərə bilər və sakinlər istənilən təşkilatı sərbəst seçmək hüququna malikdirlər. Müqavilə olmadan Mənzil Kommunal İdarəsinin pul tələb etməsi qanunsuzdur və sakinlər bu tələbi yerinə yetirməyə məcbur deyillər. Praktikada yalnız müqavilə bağlandıqdan sonra xidmət haqqı ödənilməlidir və bu, Mənzil Məcəlləsi və aidiyyəti qərarlarla təsdiqlənir.

Sualları cavablandırdı:

Fərhad NƏCƏFOV,

Azərbaycan Respublikası Vəkillər Kollegiyasının üzvü