Hazırda Balakən rayonunda 44 min arı ailəsi var və bu işlə 1200 nəfərdən artıq insan məşğul olur. Arıçılığa yenicə başlayan və bu sahəni inkişaf etdirmək üçün səy göstərənlərin sayı da kifayət qədərdir. Dünyanın əksər ölkələrində olduğu kimi, Balakən arıçıları da ötən ilin payız aylarında ciddi sınaqla qarşılaşdılar və arı ailələrinin 40-50 faizi məhv oldu. Bu, biz arıçılar üçün böyük bir imtahan idi.
Bu fikirləri AZƏRTAC-ın bölgə müxbirinə açıqlamasında Balakən Rayon Arıçılar Birliyinin sədri Elvin Hüseynov bildirib. O, xəstəliklərə qarşı ciddi mübarizə tədbirlərinin görüldüyünü və itkilərin yerli arıçıların əlbirliyi ilə doldurulmağa başlandığını qeyd edib.
Son günlər kütləvi informasiya vasitələrində və sosial şəbəkələrdə ölkədə arıçılığın mövcud vəziyyəti, xüsusilə xaricdən gətirilən arı ailələrində xəstəliklərin aşkarlanması məsələsi geniş müzakirə olunur. Bu baxımdan, ölkəmizin şimal-qərb qapısı sayılan Balakən arıçılarının qayğıları başadüşüləndir. Payızdan başlayan xəstəliklər rayonda xeyli arı ailəsinin tələf olması ilə nəticələnsə də, təcrübəli mütəxəssislərin səyi ilə problem tədricən aradan qalxır.
Elvin Hüseynov bildirib ki, tələfata əsasən varroatoz (gənə) parazitinin sürətlə yayılması səbəb olub: “Etiraf edək ki, istifadə edilən bəzi preparatlar əvvəlki kimi səmərə vermir. Bu səbəbdən arı ailələrində turşularla müalicə üsullarına üstünlük verdik”.
O, həmçinin xaricdən gətirilən arı ailələrində xəstəliklərin sürətlə yayıla bilmə ehtimalını nəzərə alaraq, bütün arıçıları həmrəy olmağa çağırıb.
Qırx ildən çoxdur arıçılıqla məşğul olan İmran Bədəlov ötən ilin payızından bəri təsərrüfatında baş verənlərdən danışır. O, uzun illərin zəhməti ilə arı ailələrinin sayını 400-ə çatdırsa da, xəstəlik nəticəsində onların yarısının məhv olduğunu deyir. Nəticədə arıçıya 30 min manatdan çox zərər dəyib. Lakin təcrübəli arıçı ümidini itirmir: “40 illik fəaliyyətim dövründə bu qədər geniş vüsət alan xəstəlik olmamışdı. Adətən avqust ayında gənəyə qarşı müxtəlif vasitələrlə mübarizə aparardıq. Bu il isə bir yox, bir neçə xəstəlik eyni vaxtda peyda oldu. Gənə həddindən artıq çoxaldı, arıların immuniteti zəiflədi və viruslar yayılaraq onları məhv etdi”.
İ.Bədəlov hazırda yaz-yay ayları üçün daha sağlam arılar yetişdirdiyini və mövsüm ərzində itkiləri tam bərpa etməyə çalışacağını vurğulayıb.
Rayon Arıçılar Birliyinin sədri Elvin Hüseynov respublika arıçılarına müraciət edərək, təsərrüfatlarda birgə praktiki təlimlərin keçirilməsini təklif edir: “Xəstəliklər yerində araşdırılmalı və müzakirə olunmalıdır. Bu sahəyə yeni gələn hər kəs mütəxəssis nəzarəti altında bir neçə aylıq təlimlərə cəlb olunmalıdır. Yalnız müsbət rəy aldıqdan sonra həmin şəxslərin arı ailələrinə sahib olması təmin edilməlidir. Aparılan müşahidələr göstərir ki, müvafiq layihələr çərçivəsində arı alan yeni başlayanların təcrübəsizliyi xəstəliklərin daha sürətlə yayılmasına rəvac verir”.
