Noyabrın 6-da Ankaradakı “CSO Ada” mərkəzində Birinci və İkinci Qarabağ müharibələrinin qəhrəmanlarına həsr olunmuş və türk dilinə dublyaj edilmiş “Köhnə çamadanlar” filminin premyerası olub.

AZƏRTAC xəbər verir ki, bu ekran əsərinin nümayişi Azərbaycanın Zəfər Gününün dördüncü ildönümünə həsr olunub.

Tədbirə Türkiyənin Mədəniyyət və Turizm Nazirliyi, Ankara Qazi Universiteti, paytaxtın Altındağ rayon bələdiyyəsi, qardaş ölkənin bir sıra ictimai təşkilat və strukturları dəstək verib.

OYUN inklüziv teatrı ilə “RS Production” şirkətinin birgə istehsalı olan bədii filmin çəkilişləri DOST İnklüziv İnkişaf və Yaradıcılıq Mərkəzi və Azərbaycan Əmək və Əhalinin Sosial Müdafiəsi Nazirliyinin dəstəyi ilə həyata keçirilib.

Layihənin rejissoru və müəllifi Səidə Haqverdiyeva AZƏRTAC-a müsahibəsində bildirib ki, film real hadisələrə əsaslanır və Birinci və İkinci Qarabağ müharibələri illərində səkkiz qadının taleyindən bəhs edir.

“Şəhid anaları, bacıları, həyat yoldaşları, həkimlər, əsirlər, məcburi köçkünlərin müxtəlif taleləri müharibənin mürəkkəb psixoloji ab-havasını çatdıran vahid ssenaridə bir-birini tamamlayır”, - deyə layihə müəllifi qeyd edib.

Onun sözlərinə görə, film hərbi əməliyyatların acı və dramatikliyinə baxmayaraq, Azərbaycan qadınlarının Qələbəyə inamını bir an belə itirmədiyini nümayiş etdirir.

O, bu lentin yaradılmasında verdikləri töhfəyə görə bütün layihə iştirakçılarına təşəkkür edib.

Filmin rejissoru Şahmar Səfəroğlu, quruluşçu rəssamı Əfşan Əsədova, bəstəkarı Vüqar Camalzadədir. Filmə peşəkar aktyorlarla yanaşı, erməni işğalının şahidləri, Qarabağ müharibəsi veteranları, hərbi qulluqçular da cəlb olunub. Rolları Xalq artistləri Məmməd Səfa, Pərvanə Qurbanova, əməkdar artistlər Gülzar Qurbanova, Şəfəq Əliyeva, Nəsibə Eldarova, aktyorlar Ülviyyə Əliyeva, Qızılgül Quliyeva, Aqil M. Quliyev və başqaları ifa ediblər.

Rejissorun sözlərinə görə, filmin ideyasını xarici tamaşaçılara daha dəqiq çatdırmaq üçün Azərbaycan və ingilis dillərində subtitrlər hazırlanıb.

Rejissor yaradıcılıq planlarını da bölüşüb, Qarabağ müharibəsi mövzusunda yeni film çəkməyi planlaşdırdığını bildirib. “Köhnə çamadanlar” filmi mənim peşəkar kinoda ilk işimdir, amma bununla kifayətlənmək fikrində deyiləm. “Qurd” (Canavar) adlanacaq, ssenarisi artıq hazır olan yeni filmin hazırlanması barədə ictimaiyyətə məlumat vermək istərdim”, - deyə o qeyd edib.

Tədbirdə iştirak edən Azərbaycan-Türkiyə Dostluq, Əməkdaşlıq və Həmrəylik Fondunun (TADEV) rəhbəri, professor Aygün Attar xalqımıza Qələbə sevincinə və ölkəmizin tarixi torpaqlarının erməni işğalından azad edilməsinə görə Prezident, Silahlı Qüvvələrin Ali Baş Komandanı İlham Əliyevə və Azərbaycan Ordusunun şəxsi heyətinə minnətdarlığını bildirib.

Onun sözlərinə görə, işğal dövrünün tarixi həqiqətlərinin ictimaiyyətə çatdırılması iki qardaş ölkənin birliyi üçün xüsusi əhəmiyyət kəsb edir. “Azərbaycanın Zəfər Gününə həsr olunmuş hər bir tədbir bizə xüsusi sevinc bəxş edir”, - deyən professor, həmçinin “Köhnə çamadanlar” filminin müəlliflərinə təşəkkürünü bildirib.

Türkiyə Böyük Millət Məclisinin deputatları, qardaş ölkənin Mədəniyyət və Turizm Nazirliyi, ticarət palatalarının və ictimai təşkilatların nümayəndələri tədbir iştirakçıları qarşısında çıxış ediblər.

Premyera ərəfəsində “Qadın, Sülh, Qələbə” adlı sərgi açılıb.