Qara Dəniz İqtisadi Əməkdaşlıq Təşkilatının Parlament Assambleyası (QDİƏT PA) yalnız region ölkələrini bir araya gətirmir, eyni zamanda, gənc nəsillər arasında dialoqu təşviq edərək, xalqlarımızın daha sıx inteqrasiyasına töhfə verir.
AZƏRTAC xəbər verir ki, bunu Şimali Makedoniya Respublikası Assambleyasının prezidenti Afrim Qaşin QDİƏT PA-nın Bakıda keçirilən 65-ci plenar sessiyasının açılış mərasimində deyib.
O qeyd edib ki, assambleya siyasi dialoqun mümkünlüyünün, hətta sabit və firavan gələcəyin qurulması üçün yeganə və ən doğru yol olduğunun bariz sübutudur. Bu dialoq ortaq məqsədləri, ümumi dəyərləri və sabitliyə olan birgə inamı əks etdirir.
“Şimali Makedoniya Respublikası regional sabitliyə, Avropaya inteqrasiyaya və iqtisadi əməkdaşlığın gücləndirilməsinə sadiqdir. Biz parlament demokratiyasını ölkələrimiz arasında davamlı və dərin münasibətlərin qurulmasının əsas vasitələrindən biri hesab edirik. Çalışırıq ki, gənc nəslimiz öz potensialını doğma regionda reallaşdırsın, burada qalsın, uğur qazansın. Bu, yalnız dayanıqlı siyasətlərin həyata keçirilməsi ilə mümkündür. Elə buna görə də, gənclərə sərmayə yatırmaq, onlara şərait yaratmaq bizim üçün strateji hədəfdir”, - deyə Afrim Qaşin bildirib.
Onun sözlərinə görə, nəqliyyat əlaqələrinin gücləndirilməsi, ətraf mühitin mühafizəsi, yoxsulluğa qarşı mübarizə və mədəniyyətlərarası əlaqələrin qurulması sahəsində də mühüm işlər görülür. “Bu yolla biz daha güclü, bir-birinə bağlı və davamlı inkişaf edən Qara dəniz regionu iqtisadi icması yarada bilərik. Parlamentlər burada mühüm rol oynayır – bu qurum nəinki regional gündəmi izləyir, eyni zamanda onu istiqamətləndirir, formalaşdırır. Buna görə də biz assambleyanın gündəliyini tam dəstəkləyir, onun uğurlu icrası üçün fəal şəkildə töhfə verməyə hazır olduğumuzu bildiririk”, - deyə o əlavə edib.
jpg_1776066584.jpg)
jpg_1775472819.jpg)
