Bir şərtlə ki, fəaliyyət səmərəli olsun
Son illər inkişafının yeni mərhələsini yaşayan Qəbələ rayonunda təhsilin maddi-texniki bazasının möhkəmləndirilməsi, tədrisin keyfiyyətinin yüksəldilməsi və yeni texnologiyaların tətbiqi ilə əlaqədar xeyli iş görülüb. Əsaslı təmir işləri ilə yanaşı, yeni məktəb binalarının tikintisi xüsusi qeyd edilməlidir. Regionların sosial-iqtisadi inkişafına dair Dövlət Proqramına uyğun olaraq Nic qəsəbəsində 360, Tola kəndində 180, Topbağ və Solquca kəndlərinin hər birində 80 şagirdlik yeni məktəb binaları tikilib istifadəyə verilib, Vəndam qəsəbəsindəki 1 nömrəli tam orta məktəb əsaslı təmir edilib. Kiçik Pirəli kəndində isə 180 yerlik tam orta məktəb binasının inşası davam edir.
Son illər Heydər Əliyev Fondunun xətti ilə rayonun Çarxana, Daşlıca, Əmirvan, Tüntül, Abrix, Kürd, Kiçik Əmili, Dızaxlı kəndlərində və Nic qəsəbəsində ümumilikdə 1840 şagird yeri olan yeni və hər cür müasir avadanlıqla təmin edilmiş məktəb binaları istifadəyə verilib. Tədrisin keyfiyyətli aparılması, innovativ təhsil mühitinin formalaşdırılması və yüksək göstəricilərə nail olunması üçün yaradılan şəraitin rolu danılmazdır. Bunun nəticəsidir ki, Qəbələnin təhsil göstəriciləri ildən-ilə yaxşılaşır. Elə ötən il Günel Ağayeva Qəbələ şəhər 4 nömrəli tam orta məktəbi qızıl medalla bitirib. Mirzəbəyli və Çarxana kənd tam orta məktəblərinin müəllimləri Məlahət Rəsulovanın və Ruhiyyə Tahirovanın, həmçinin Vəndam qəsəbə 3 nömrəli tam orta məktəbin müəllimi Zülfinaz Eyyubovanın qabaqcıl iş təcrübəsi rayon məktəbləri arasında geniş yayılır. Məlikli kənd tam orta məktəbin direktoru Dursun Göyüşovun ölkə Prezidenti İlham Əliyevin sərəncamı ilə "Tərəqqi" medalına layiq görülməsi də qazanılan uğurlar sırasındadır.
Yüksək təhsil göstəricilərinə nail olmağa çalışan tədris ocaqlarından şəhər 1, 2, 4, Nic qəsəbə 2, Vəndam qəsəbə 1, 2 nömrəli və Xırxatala, Əmirvan, Soltannuxa, Nohurqışlaq tam orta məktəblərini də qeyd etmək olar.
Qəbələ məktəbliləri müxtəlif respublika müsabiqələrində və fənn olimpiadalarında uğurla çıxış edirlər. Məlikli kənd tam orta məktəbin X sinif şagirdi Sevinc Hüseynova ulu öndər Heydər Əliyevin 90 illiyinə həsr olunmuş respublika inşa müsabiqəsində fərqlənərək Təhsil Nazirliyinin Fəxri fərmanına və pul mükafatına layiq görülüb. S.Hüseynovanın inşası ən yaxşı inşalar sırasında xüsusi kitaba salınıb. Əlbəttə, bu, gələcək həyata böyük arzularla baxan bir gənc üçün qürurverici göstəricidir. Qadir Mövlanov (Zalam kəndi), Əmrah Məmmədov (şəhər 3 nömrəli məktəb) və Mənzər Mehdiyeva (Kiçik Əmili kəndi) isə respublika rəsm müsabiqəsində uğurla iştirak ediblər. Qadir Mövlanovun çəkdiyi əsərlər may ayında Qəbələ şəhərində keçirilən beynəlxalq rəsm sərgisində də nümayiş etdirilib. Belə yaradıcılıq və təhsil uğurlarından çox nümunə gətirmək olar. Ən başlıcası isə, şagirdlərin bilik və bacarıqlarının üzə çıxarılması üçün gərəkli işlərin görülməsidir. Hazırda Qəbələ məktəblərində 43 kompyuter sinfi fəaliyyət göstərir ki, onların da 17-si internet şəbəkəsinə qoşulub.
Rayon təhsil şöbəsindən aldığımız məlumata görə, Qəbələ şəhər 5 nömrəli tam orta, Ziring, Yengicə kənd ümumi orta məktəbləri üçün yeni binaların tikintisi planlaşdırılıb.
Bəzi çətinliklər də var. Maddi-texniki və tədris bazasının çatışmazlığına görə rayon məktəblərinin 15-i iki növbədə fəaliyyət göstərir.
Qəzalı vəziyyətdə olan Bılıx, Çığatelli tam orta, Zərgərli kənd ibtidai məktəblərinin tikintiyə və əsaslı təmirə ehtiyacı var. Rayonun 24 məktəbində yeni qurulmuş qazanxanalara xidmət təşkilatının olmaması qış mövsümündə çətinliklər yaradır.
Qəbələ Rayon Təhsil Şöbəsinin müdiri Oqtay Əliyev söhbət əsnasında onu da qeyd etdi ki, rayonun 3 məktəbində I-VI siniflərdə udi, 6 məktəbdə isə I-IX siniflərdə ləzgi dili tədris olunur. Lazımi dərsliklərin mövcudluğu tədrisin keyfiyyətinə də təsir edir.
Artıq 2012-2013-cü tədris ili də başa çatıb. İlboyu çəkilən zəhmətin nəticələri qazanılan göstəricilərlə şərtlənir. Dərs ilinin birinci yarısının müvəffəqiyyət göstəricisi 98,9 faiz, keyfiyyət göstəricisi isə 58,9 faiz olub. Ən dəqiq göstəricilər isə məzunların ali məktəblərlə bağlı soraqları gələndə məlum olacaq. Onda bilinəcək ki, çəkilən zəhmət nə qədər fayda verib.
Telman NƏZƏRLİ,
"Azərbaycan"
