Xankəndi zirvəsində İƏT-in orta və uzunmüddətli inkişaf prioritetləri müəyyən edildi

Azərbaycan İqtisadi Əməkdaşlıq Təşkilatının 17-ci Zirvə görüşünə uğurla ev sahibliyi etdi. Toplantının Xankəndi şəhərində baş tutmasının xüsusi əhəmiyyəti var. Belə ki, işğaldan azad olunmuş ərazilərimizdə yüksək səviyyəli beynəlxalq toplantıların keçirilməsi artıq ənənə halını alıb. Açılış mərasimində Prezident İlham Əliyev də Şuşada 2023-cü ildə ECO-nun Nazirlər Şurasının, 2024-cü ildə Türk Dövlətləri Təşkilatının ilk qeyri-rəsmi Zirvə görüşünü, həmçinin bu ilin mayında Laçında Azərbaycan, Türkiyə və Pakistan rəhbərlərinin üçtərəfli Zirvə görüşünü xüsusi qeyd etdi.

Bu vacib toplantının məhz Xankəndidə keçirilməsi siyasi nöqteyi-nəzərdən əhəmiyyətlidir. Bu, Azərbaycanın qələbəsinin İƏT platformasından təqdimatı və ölkəmizin növbəti diplomatik uğuru oldu. Zirvə görüşündə uğurla həyata keçirilən bərpa quruculuq prosesinə diqqət çəkən dövlət başçımız həmçinin Ermənistandan deportasiya olunmuş Qərbi azərbaycanlıların hüquqlarının təmin olunması məsələsini də gündəmə gətirdi. İƏT platformasından da bəyan olundu ki, Qərbi azərbaycanlıların Ermənistandakı öz dədə-baba torpağına sülh yolu ilə qayıdışının təmin edilməsi sahəsində səylər bundan sonra da davam etdiriləcək.

Məlum olduğu kimi, İqtisadi Əməkdaşlıq Təşkilatı Azərbaycanın ən fəal təmsil olunduğu qurumlardandır. Təşkilatın əsas məqsədi ortaq din və mentalitet birliyi olan üzv ölkələrin iqtisadi əməkdaşlığını artırmaqdır. Azərbaycanın təşəbbüsü ilə bu il ilk dəfə ECO Həftəsi keçirildi. Şuşada ECO-nun Biznes-Forumu, Ağdamda Gənclər Forumu, Laçında isə Qadınlar Forumu təşkil edildi. Yeri gəlmişkən, ECO-nun Tədqiqat Mərkəzi də Azərbaycanda yerləşəcək. Dövlət başçımız Təmiz Enerji Mərkəzinin fəaliyyətə başlamasının təmin olunması istiqamətində işlərin davam etdiyini diqqətə çatdırdı. Həmçinin 2026-cı il Şuşa şəhəri “ECO-nun Turizm paytaxtı” elan edilib.

İƏT-in 17-ci Zirvə görüşündə iqtisadi sahədə əməkdaşlığı dərinləşdirmək üçün səmərəli müzakirələr aparıldı. Azərbaycanda mövcud olan əlverişli investisiya mühiti əlaqələri genişləndirməyə zəmin yaradır. Zirvə görüşündə də bəyan olundu ki, son 20 il ərzində Azərbaycan iqtisadiyyatına 350 milyard ABŞ dollarına yaxın sərmayə qoyulub ki, bunun da yarısı xarici sərmayədir.

İƏT-ə üzv ölkələr həm də nəqliyyat sahəsində əməkdaşlıqda maraqlıdır. Belə ki, Azərbaycan ərazisindən keçən Şərq-Qərb və Şimal-Cənub nəqliyyat dəhlizlərindən ECO-ya üzv ölkələrin əksəriyyəti istifadə edir.

Xankəndi zirvəsi münaqişə və mübahisələrin əksər hissəsinin məhz İƏT-ə üzv ölkələrin ərazisində baş verdiyi bir vaxtda keçirildiyindən dialoq imkanlarının genişlənməsi baxımından mühüm əhəmiyyət kəsb edir.

Liderlər də bir daha bəyan etdi ki, sülh və inkişafın bünövrəsi iqtisadi əməkdaşlığa söykənir. Bu mənada üzv ölkələrin təşkilat daxilində tərəfdaşlığı zərurətə çevrilib. Qarşıdakı 10 ildə İƏT-in 2035-ci ilə qədər yeni strateji məqsədləri də təşkilat daxilində həmrəyliyin möhkəmlənməsini nəzərdə tutur.

Nigar MƏMMƏDOVA,

Milli Məclisin deputatı