Rusiya Prezidenti Vladimir Putin Asiya-Sakit Okean İqtisadi Əməkdaşlıq Təşkilatının (APEC) sammitində iştirak etmək üçün Çinin Şençjen şəhərində səfərdədir. Səfərin əsas məqamı Rusiya, ABŞ və Çin liderlərinin noyabrın 19-da keçirilməsi planlaşdırılan ilk üçtərəfli görüşü olacaq.
AZƏRTAC xəbər verir ki, Rusiya lideri noyabrın 18-də Çinin Sədri Si Cinpin ilə danışıqlar aparıb. Söhbət iki saatdan çox davam edib. Tərəflər əvvəlcə nümayəndə heyətləri ilə iqtisadi əməkdaşlıq müzakirə ediblər, sonra isə müzakirəni kiçik qrup şəklində işgüzar səhər yeməyi formatında davam etdiriblər.
Danışıqlardan sonra Putin Moskva Dövlət Universiteti və Pekin Texnologiya İnstitutunun birgə ali təhsil müəssisəsində tələbələr və müəllim heyəti qarşısında çıxış edib. O, Çin lideri ilə söhbəti genişməzmunlu adlandırıb, tərəflərin elm və təhsil sahəsində əməkdaşlığı da müzakirə etdiklərini bildirib.
ABŞ Prezidenti Donald Trampla əsas siyasi danışıqlar noyabrın 19-da keçiriləcək. Rusiya Prezidentinin köməkçisi Yuri Uşakovun sözlərinə görə, üçtərəfli görüş yerli vaxtla saat 14:30-da başlayacaq. Görüş Şençjen şəhərindəki dövlət qonaq evində baş tutacaq. Moskva, Pekin və Vaşinqton görüş barədə məlumatı təsdiqləyib.
Rusiya xarici işlər nazirinin müavini Sergey Ryabkovun sözlərinə görə, görüşün ehtimal olunan mövzuları arasında Ukrayna münaqişəsinin həlli ilə bağlı dialoqun davam etdirilməsi də var. Uşakovun sözlərinə görə, tərəflər üçtərəfli danışıqlardan sonra Birgə Bəyanat üzərində də işləyirlər.
Vladimir Putin və Donald Tramp arasında Şençjendə keçiriləcək ayrıca görüş də müzakirə olunur. Uşakov bildirib ki, ikitərəfli gündəliyə Ukrayna münaqişəsinin həlli, Amerikanın təklifləri və Rusiyanın təşəbbüsləri daxildir. Görüşün formatı və vaxtı razılaşdırılır.