Laçın-Xankəndi yolunun Şuşa ərazisindən keçən hissəsi 60 gündür ki, azərbaycanlı ekofəalların, könüllü gənclərin və qeyri-hökumət təşkilatlarının (QHT) nümayəndələrinin dinc aksiyasının keçirildiyi məkandır.
Havanın soyuq, qarlı, şaxtalı keçməsi aksiya iştirakçılarına mane ola bilmir. Çünki onlar qəlblərindəki Vətən təəssübkeşliyinin, torpaq sevgisinin hərarəti, gücü ilə bu aksiyaya başlayıblar. İctimai fəalların tələbləri Azərbaycan ərazilərində faydalı qazıntı yataqlarının qanunsuz istismarının dayandırılması, "Qızılbulaq" və "Dəmirli" yataqlarında monitorinqin keçirilməsinə icazə verilməsidir. Aksiya iştirakçılarının haqlı tələblərindən biri də Ermənistanın Laçın yolundan hərbi məqsədlərlə istifadəsinə son qoyulmasıdır.
Heç kəsə sirr deyil ki, Ermənistan üçtərəfli Bəyanata əməl etmir. Həmin bəyanatın əksinə olaraq Vətən müharibəsindən sonra Ermənistan tərəfi Laçın-Xankəndi yolundan hərbi məqsədlər, minaların, silah-sursatın və talan olunan təbii sərvətlərin daşınması üçün istifadə edib, Azərbaycana qarşı təxribatlar törədib.
Aksiya iştirakçıları iki aya yaxındır ki, səhər saatlarında hər yeni günə Azərbaycanın Dövlət Himnini səsləndirməklə başlayırlar. Günboyu mütəmadi olaraq, Azərbaycan, rus və ingilis dillərində plakatlar qaldırır, "Azərbaycan oyaqdır, sərvətinə dayaqdır!", "Ekoloji cinayətə son!" və başqa şüarlar söyləyirlər.
Laçın-Xankəndi yolunda aksiyaya ötən il dekabrın 12-dən başlanılıb. Bir neçə gün qabaq - 2022-ci il dekabrın 3-də və 7-də Rusiya sülhməramlı kontingentinin komandanlığı ilə aparılmış müzakirələrin nəticəsinə görə Azərbaycanın İqtisadiyyat, Ekologiya və Təbii Sərvətlər nazirlikləri, İqtisadiyyat Nazirliyi yanında Əmlak Məsələləri Dövlət Xidməti və "AzerGold" Qapalı Səhmdar Cəmiyyətinin mütəxəssislərindən ibarət heyət Rusiya sülhməramlı kontingentinin müvəqqəti yerləşdirildiyi Azərbaycan ərazilərində faydalı qazıntı yataqlarının qanunsuz istismarı, bundan irəli gələn ekoloji və digər fəsadlarla bağlı ilkin monitorinq həyata keçirməli idi. Sülhməramlıların hərəkətsizliyi nəticəsində monitorinqin reallaşmamasını Azərbaycan vətəndaş cəmiyyətinin nümayəndələri, ekofəallar və könüllü gənclər etirazla qarşıladılar. Və Azərbaycan ərazilərində faydalı qazıntı yataqlarının qanunsuz istismarının dayandırılması, "Qızılbulaq" və "Dəmirli" yataqlarında monitorinqin aparılmasına icazə verilməsi, Ermənistanın Laçın yolundan hərbi məqsədlərlə istifadəsinə son qoyulması tələblərini irəli sürdülər.
Bunu özlərinin vətəndaşlıq borcları hesab edən aksiya iştirakçıları - ekofəallar, könüllü gənclər, qeyri-hökumət təşkilatlarının nümayəndələri düşmənin məkrlərinə, yalanlarına, qarayaxmalarına qarşı da ayıq-sayıqdırlar. Aksiya başladığı vaxtdan bəri gün ərzində Laçın-Xankəndi yolu təyinatı üzrə - humanitar məqsədlər üçün açıqdır, indiyədək heç bir məhdudiyyət müşahidə olunmayıb.
Ermənistanın Laçın-Xankəndi yolunda keçirilən aksiya nəticəsində bu yolun bağlanması, bölgədə humanitar fəlakət yaşanması kimi beynəlxalq aləmə sırımağa çalışdıqları yalanların müqabilində, Azərbaycan hər zamankı kimi öz doğru, haqq mövqeyində dayanır. İşğalçı, təcavüzkar ermənilərin uydurmalarına, riyakarlıqlarına, əslində, inanan yoxdur. Laçın-Xankəndi yolunda ekofəallarımızın, könüllü gənclərimizin, QHT nümayəndələrimizin keçirdiyi dinc aksiya barədə qərəzli məlumatlar verən bir sıra ermənipərəst xarici mətbuat orqanlarının məqsədi təsiri altında olduqları erməni lobbisinin tapşırıqlarını yerinə yetirmək, onlara yarınmaqdır.
Aksiya iştirakçıları Xankəndidən Laçın istiqamətinə doğru hərəkət edən Rusiya sülhməramlılarına, Beynəlxalq Qırmızı Xaç Komitəsinə (BQXK) məxsus avtomobillərin maneəsiz keçidinə şərait yaradırlar. Bununla da etirazçıların guya Xankəndi-Laçın yolunu bağladıqları, təminat avtomobillərini buraxmadıqları ilə bağlı Ermənistan mətbuatında yayılan xəbərlərin böhtan olduğunu sübut edirlər.
İndiyədək etiraz aksiyasını izləmək üçün Laçın-Xankəndi yoluna səfər edən Türkiyə, Rusiya, Böyük Britaniya, İspaniya, İtaliya və Macarıstandan olan KİV nümayəndələri də bunun şahidi olublar. Fevralın 4-dən Qarabağda və Şərqi Zəngəzurda üçgünlük səfərdə olan 12 ölkənin - ABŞ, Böyük Britaniya, İrlandiya, Belçika, Almaniya, Fransa, Danimarka, Niderland, İtaliya, İspaniya, Braziliya və Rusiyanın tanınmış səyyahlarının daxil olduğu 30 nəfərlik heyət Laçın-Xankəndi yolunun Şuşa ərazisindən keçən hissəsində iki aydır ki, fasiləsiz davam edən aksiyanın iştirakçıları ilə də görüşüb, söhbət ediblər. Beynəlxalq səyyahlar onların Azərbaycanın suveren ərazisində mədəni sərvətlərinin Ermənistan tərəfindən qanunsuz istismar edilməsinə, talanmasına və daşınmasına, eyni zamanda bu yoldan hərbi məqsədlər, minaların, silah-sursatın keçirilməsi üçün istifadə olunmasına etiraz etdiklərini, Laçın-Xankəndi yolunun humanitar məqsədlər üçün açıq olduğunu öz gözləri ilə görüblər.
Azərbaycanlı aksiya iştirakçıları ölkələrində düşmənin əl-qol açmasına, bir daha təxribatlar törətməsinə, yenidən nahaq qanlar tökməsinə yol verməməkdə israrlıdırlar. Onlar Azərbaycanın sərvətlərinin yadlar tərəfindən talanıb daşınmasına, ərazilərinin yeni minalarla çirkləndirilməsinə, təhlükəli məkana çevrilməsinə etiraz edirlər. İstəyirlər ki, 2020-ci ildə 44 günlük Vətən müharibəsində qəhrəman Azərbaycan Ordusunun azad etdiyi yurdlarımızda həyat yenidən canlansın. Azərbaycan dövləti və xalqı bunun üçün - Qarabağ və Şərqi Zəngəzurun yenidən qurulması üçün geniş tikinti-quruculuq işləri həyata keçirir.
Zöhrə FƏRƏCOVA,
"Azərbaycan"
