Naib Qarayevlə xoş bir mərasimdə tanış oldum. Şəmkirdə gənclər ordu sıralarına yola salınırdı. Geniş həyətdə qələbəlik idi. Mahnı, musiqi sədaları, şən, çoşqun rəqslər ətrafı bürümüşdü. Əsl bayram əhval-ruhiyyəsi yaşanırdı. Ağsaqqallar, ziyalılar, valideynlər çağırışçılara uğurlar arzuladılar.
Gülərüzlü gənclər isə üçrəngli bayrağımızı öpərək avtobuslara doluşdular. Naib Qarayev gedənlərə əl edəndə dedim:
- Bəs sən getmirsən?
- Mən öz borcumu yerinə yetirmişəm, amma yenə gedəcəyəm, - gülümsünüb dedi. - Bu dəfə müddətdən artıq xidmət etməyə. Atam Zakirin qisasını almaq üçün. Torpaqlar azad olunmamış qayıdan deyiləm.
Şəhid ailəsinin qonağı da oldum. Evləri Şəmkirin mərkəzində, ikimərtəbəli binanın ikinci mərtəbəsində yerləşir.
İşıqlı-yaraşıqlı otağın baş tərəfində zərif güllərlə haşiyələnən bir zabitin şəkli diqqətimi cəlb etdi.
- Atamdır - dedi, - 1991-ci ildə, yanvarın 16-da Kəlbəcərdə şəhid olub.
Anası Maral xanım enli pəncərənin qabağındakı stolda süfrə açıb, pürrəngi çay gətirəndən sonra söhbətə qoşuldu:
- Atası Zakir Qarayev 1955-ci ildə Könüllü kəndində anadan olub. Azərbaycan Neft Akademiyasını bitirib Tümendə mühəndis işləyirdi. Erməni namərdləri baş qaldıranda Vətənə qayıtdı. Bir müddət Nərimanlı kəndində icra nümayəndəsi işləyib. 1990-cı ildə gördü ki, torpaqlar əldən gedir, dözmədi. Könüllü olaraq cəbhəyə yola düşdü...
Həyat yoldaşı Maral xanım iki oğulla kirayə mənzildə qalırdı. Zöhrab Bakıda oxuyurdu. Naim isə anadangəlmə şikəst idi. Taleyin gedişinə baxın. 1991-ci il yanvarın 16-da Zakir Qarayevdən bəd xəbər alınan gün üçüncü oğlu Naib dünyaya gəldi.
Zakirin övladları da özü kimi qeyrətli çıxdı. Böyük oğlu Zöhrab əvvəlcə C.Naxçıvanski adına liseydə oxudu. Sonra da Heydər Əliyev adına Hərbi akademiyanı bitirdi. O da atası kimi əsl Vətən vurğunu idi. Leytenant rütbəsində hərbi xidmətə başladı. İndi baş leytenantdır. Ağdam bölgəsində artilleriya taqımının komandiridir.
Naib Qarayev də şəhid atanın, zabit qardaşın yolu ilə gedir. Söz düşəndə deyir ki, Allah məni ona görə atamın faciəli günündə, yəni - yanvarın 16-da dünyaya gətirib ki, onun qisasını alım. Alacağam da!
Naib Gəncədə texniki peşə liseyini bitirib. Bakıda idman məktəbində oxuyub. Peşəsi, sənəti var. Di gəl ki, heç yana yovuşmurdu. Fikri, xəyalı həmişə cəbhə bölgəsində idi. Vaxtı yetişən kimi əsgərliyə getdi. Beyləqanda "N" saylı hərbi hissədə sürücü işlədi, manqa komandiri oldu. Özü də necə komandir?! Günlərin birində anası Maral xanım hərbi hissədən təşəkkür məktubu aldı. Hərbi hissənin komandiri, polkovnik-leytenant Davud Məhərrəmov yazırdı: "Sizin övladınız Qarayev Naib Zakir oğlu bizim hərbi hissədə xidmət edir. O özünü nizam-intizamlı, bacarıqlı, təşəbbüskar, hərbi nizamnamənin və qanunların tələblərini layiqincə dərk edən, komandirin və rəislərin əmr və göstərişlərini vaxtında, dəqiq yerinə yetirən, beləliklə də hərbi xidmətə əsl vətəndaş münasibəti göstərən bir işçi kimi tanınmışdır. Naibin kollektivdə yüksək nüfuzu vardır. Daim hərbi biliyini təkmilləşdirir. Silah və texnikanın sirlərinə həvəslə yiyələnir.
Ana Vətənimizin azadlığının, müstəqilliyinin və ərazi bütövlüyünün təhlükə altında olduğu bir vaxtda nümunəvi oğul tərbiyə edib Vətənin müdafiəsi üçün hərbi xidmətə göndərdiyinizə görə sizə ürəkdən təşəkkür edirik".
Xidmət müddəti bitəndə Naib qayıdıb gəldi. Xoş-beşdən sonra əsas sözü bu oldu ki, torpağımız düşmən tapdağından azad olunmamış evdə otura bilmərəm. Bəzi haylı-küylü məclisləri, əhlikef gəncləri görəndə dözə bilmirəm. Əlbəttə, yaşamaq lazımdır, amma əbəs demirlər ki, öncə Vətəndir. Gəlin əvvəlcə onu azad edək, torpaqları qaytaraq, şəhidlərin qisasını alaq, sonra başıuca, iftixarla yaşayaq.
Maral ana deyir ki, əsgərlik böyük məktəb imiş, əsl kamillik məktəbi! Cavan uşaqlar qayıdıb gələndə tanımaq olmur. Ətə-qana dolur, kişiləşirlər. Danışıqları, düşüncələri, həyata baxışları tamam dəyişir. Sevinirsən ki, inamlı, etibarlı, güclü-qüvvətli arxan, dayağın var.
Naib ərizə verib, sənədləri hazırdır. Bu gün-sabah müddətdən artıq xidmət etməyə gedəcək.
Qabaqda hələ bir xeyir iş də var. Ülkər adlı nişanlısı var. Təzə sahədə iş yerini rahatlayan kimi toy edəcək.
Zakirin ocağında daha bir qol-qanad yaranır. O qanlı-qadalı illərdə qeyrətli ata sanki bir çinar idi. Qəfil zərbədən yıxıldı, şəhid oldu. İndi onun yerində iki güclü-qüvvətli palıd ucalır. Kimsə əyə bilməz onları. Bir az da obrazlı desək ulu öndər Heydər Əliyevin şah əsəri olan Azərbaycanda daha güclü-qüvvətli, daha sadiq səviyyəli, daha mütəşəkkil nəsil yetişib.
Səfərbərlik və hərbi xidmətə çağırış üzrə Şəmkir rayon şöbəsinin rəis əvəzi, polkovnik Həsrət İsmayılov da dedi ki, ölkəmizin iqtisadi qüdrəti və beynəlxalq aləmdə nüfuzu çoxaldıqca gənclərin hərbi işə meyili artır. Xüsusən səfərbərlik və hərbi xidmətə çağırış üzrə vahid dövlət xidməti sistemi yaranandan sonra bir sıra süni maneələr, bürokratik əngəllər aradan qaldırılır. Çağırışdan yayınma hallarının kökü kəsilib. Rayonda hərbi vətənpərvərlik tərbiyəsinə xüsusi fikir verilir. Mədəni-maarif müəssisələrində, gənclər mərkəzində, digər təşkilatlarda sistemli surətdə geniş iş aparılır.
Şəmkir rayonu torpaqlarımız uğrunda gedən döyüşlərdə 169 nəfər şəhid verib, 40 nəfər itkin düşüb, İsgəndər Aznaurov və Zaur Sarıyev Milli Qəhrəman adına layiq görülüblər. Onların mübariz həyatları gənclərə əsl nümunədir. Rayonda 47 məktəb şəhid adını daşıyır, Kür qəsəbəsində xatirə muzeyi yaradılıb. Onlarca yerdə büst və abidələr ucaldılıb. Şəhidlər xiyabanı and yerinə çevrilib. Məktəblərin və mədəniyyət ocaqlarının, demək olar, hamısında xatirə guşələri yaradılıb. Hər il "Şahin" və "Cəsurlar" hərbi idman oyunlarında minlərlə gənc iştirak edir. Xüsusilə fərqlənənlərə fəxri fərmanlar və hədiyyələr verilir. "N" saylı hərbi hissədə əsgər və zabitlərlə gənclərin görüşləri təşkil olunur. Bütün bunların nəticəsidir ki, hərbi təmayüllü ali təhsil ocaqlarına gedənlərin sayı ilbəil artır. Ulu öndər Heydər Əliyevin 90 illik yubileyi ilə əlaqədar bir sıra məktəblərdə keçirilən "Vətən cəsurları sevir" adlı inşa yazı müsabiqələrində gənclərin ürək sözləri çox mətləblərdən xəbər verir. Onlar yazırlar ki, cənab Heydər Əliyevin yolunu uğurla davam etdirən Prezident İlham Əliyevin müdrik siyasətini ürəkdən dəstəkləyir, doğma torpaqlarımızı işğaldan azad etməyə tam hazırıq.
Gənclərin arzusu, amalı belədir. Mən bu sözləri Naib Qarayevlə və Şəmkir rayonunun neçə-neçə yetirməsi ilə söhbət zamanı da dönə-dönə eşitmişəm.
Əhməd İSAYEV,
"Azərbaycan"
