Bəzi plastik növlərini həzm edə bilən bir neçə bakteriya ştamı müəyyən edilib. Mikrobioloqlar müəyyən edilmiş bakteriyaları yeni növ qablaşdırma materialının hazırlanmasında istifadə etməyi qərara alıblar. Plastikin yaradılmasında polimerlərdən istifadə edilir. Onlaın kimyəvi yol ilə parçalanması isə böyük enerji sərfiyyatını tələb edir. Buna alternativ qismində alimlər polimerlərin kimyəvi əlaqələrini xüsusi ferment sayəsində parçalamağa qadir olan bakteriyalara müraciət ediblər. Bakteriyaların bu prosesə vaxtından əvvəl başlamamaları üçün mütəxəssislər “Bacillus subtilis” adlı bakteriya növünü ən geniş yayılmış plastik materiallardan biri olan termoplastik poliuretana yerləşdiriblər.
Mütəxəssislərin istifadə etmiş olduqları bu üsul bakteriyaların, plastik materialın yalnız təkrar emalı zamanı aktivləşmələrinə imkan verir. “Bacillus subtilis” adlı bakteriya növünün əsas özəlliyi ondan ibarətdir ki, o, insanın termoplastik poliuretan tərkibli məhsuldan istifadə etdiyi müddətcə yatmış şəkildə olur. Məhsulun təkrar emalı zamanı isə bu bakteriya yuxudan oyanır və polimerlərin parçalanması prosesinə start verir.
Daha öncə güman edilirdi ki, plastikdə bioloji materialın istifadəsi plastik materialın dözümlülük özəlliklərini zəiflədəcək. Lakin mütəxəssislər əks effektə nail olublar. Məlum olub ki, tərkibində bakteriya sporunu birləşdirən plastik material digər analoqlardan daha dözümlüdür. Bu isə bakteriyaların su keçirməyən səthləri ilə bağlıdır. Belə ki, onların səthləri polimer birləşmələri ilə qarşılıqlı əlaqədə olurlar və həmin birləşmələri daha da bərkidirlər. Yeni istehsalat növünün nə zaman kütləvi hal alacağı barədə məlumat verilməyib.

Ülkər XASPOLADOVA,
“Azərbaycan”