Ərazilərin işğaldan azad edilməsi uğrunda 44 günlük Vətən müharibəsində qazanılan tarixi Qələbə fonunda Azərbaycanın beynəlxalq aləmdə mövqeyi möhkəmlənir ki, bu da Bakının Afrika ölkələri ilə münasibətlərində də özünü göstərir.
AZƏRTAC xəbər verir ki, bu fikri Türkiyənin Uludağ Universitetinin İqtisadiyyat və idarəetmə fakültəsinin professoru Mehmet Yüce deyib.
O, Azərbaycanın Qoşulmama Hərəkatına uğurlu sədrlik dövrünü qeyd edib, Bakının Afrika dövlətlərinin problemlərinin həllinə töhfə verməkdə davam etdiyini vurğulayıb.
Ekspert Prezident İlham Əliyevin 2023-cü ilin martında Qoşulmama Hərəkatının COVID-19-la Mübarizə üzrə Təmas Qrupunun Zirvə toplantısındakı çıxışını xatırladıb və burada Azərbaycan rəhbərinin diqqəti neokolonializmə doğru artan tendensiyaya yönəltdiyini vurğulayıb.
Türkiyəli professor Qoşulmama Hərəkatını “bəşər tarixinin bu biabırçı səhifəsini tamamilə çevirmək üçün qüvvələri birləşdirməyə” çağıran Azərbaycan dövlət başçısının sözlərini xatırladıb. O deyib: “Prezident İlham Əliyev vurğuladı ki, Fransa hökuməti Yeni Kaledoniya əhalisinin və Fransanın dənizaşırı icma və ərazilərində yaşayan digər xalqların hüquqlarına hörmət etməlidir”. M.Yuce qeyd edib ki, Bakının Afrika ölkələri ilə münasibətləri Qərbin “ikili standartlar” siyasəti, o cümlədən Parisin açıq-aşkar qərəzli kursu fonunda inkişaf edir.
“Bakının çoxvektorlu və balanslaşdırılmış siyasəti Afrikada Azərbaycana dəstəyin artmasına səbəb olub”, - deyən türkiyəli universitet professoru planetin ikinci ən böyük qitəsində Azərbaycanın diplomatik nümayəndəliklərinin sayının artdığını qeyd edib.
M.Yücenin sözlərinə görə, 2019-2023-cü illərdə Bakının Qoşulmama Hərəkatına sədrliyi tərəflər arasında sıx təmasların qurulmasına və qarşılıqlı dəstəyin artmasına töhfə verib. O əlavə edib: “Təsadüfi deyil ki, Afrika ölkələri BMT-də Parisin ermənipərəst təşəbbüsünün iflasa uğramasına səbəb olan Qarabağla bağlı Fransanın qətnamə layihəsinə qarşı çıxıblar”.
Ekspert qeyd edib ki, Azərbaycanın Afrika üzrə müasir siyasətinin prioritet istiqamətləri zəif inkişaf etmiş və inkişaf etməkdə olan ölkələrin energetika, kənd təsərrüfatı sektoru və infrastrukturunun inkişafına töhfə verilməsini ehtiva edir.
“Azərbaycan Dövlət Neft Şirkəti Afrikaya investisiyaları artırır, yeni neft və qaz layihələrinə maraq göstərir”, - deyən türk professor Bakının Afrika ölkələrinə yardımlarını, o cümlədən Heydər Əliyev Fondu vasitəsilə çoxsaylı humanitar dəstək aksiyalarını xatırladıb.
Onun fikrincə, Bakının Afrika siyasəti Ankaranın bu qitədə münasibətlər qurmaq kursu ilə üst-üstə düşür.
M.Yüce hesab edir ki, Azərbaycan və Türkiyə müxtəlif qlobal platformalarda, təşkilatlarda və beynəlxalq əlaqələr sistemində bir-birini fəal şəkildə dəstəkləyir. Buna misal olaraq, ekspert Somali Prezidenti Həsən Şeyx Məhəmmədin Bakıya səfərinin nəticələrini, Türkiyənin bu Afrika ölkəsinə dəstək vermək üçün aktiv addımlarını göstərib.
“Bu gün əminliklə deyə bilərik ki, Türkiyə ilə Azərbaycan arasında əməkdaşlıq təkcə ikitərəfli münasibətlərə deyil, həm də hər iki ölkənin nüfuzunun artmasına töhfə verən vahid fəaliyyət cəbhəsinin formalaşdırılmasına yönəlib. Bu, Afrikada da özünü büruzə verir və ümid edirəm ki, Türk dünyası adlı yeni güc mərkəzinin formalaşması üçün güclü təkan olacaq”, - deyə Uludağ Universitetinin İqtisadiyyat və idarəetmə fakültəsinin professoru sözlərini yekunlaşdırıb.
