Nəcib ənənəyə çevrilən “Soyuq əllər, isti ürək” yarmarkası artıq onuncu dəfədir ki, qapılarını paytaxt sakinlərinin üzünə açıb. Yeni il ovqatını, şəfqət duyğularını özündə təcəssüm edən bu layihədə həm əylənmək, həm də faydalı olmaq mümkündür.
Yarmarkanın təşkil olunduğu meydanda yaşanan izdiham xeyriyyə aksiyasına göstərilən böyük maraqdan xəbər verir. Bir tərəfdən isti şabalıd qoxusu, digər tərəfdən ləzzətli özbək plovunun ətri gəlir.
Pavilyonlardakı növbənöv, rəngbərəng şirniyyatlar insana gəl-gəl deyir.
AZƏRTAC-ın yarmarkanın keçirildiyi məkandan hazırladığı fotoreportajı təqdim edirik.
Fəvvarələr Meydanında fəaliyyət göstərən ənənəvi “Soyuq əllər, isti ürək” yarmarkası Bakıya əsl bayram əhvali-ruhiyyəsi gətirib.
Xeyriyyə yarmarkası bu dəfə həm də özünün 10 illik yubileyini qeyd edir. Bu münasibətlə bir neçə gün əvvəl Fəvvarələr Meydanında tanınmış müğənnilərin iştirakı ilə böyük konsert proqramı təqdim olunub. Yarmarka dekabrın 1-dən sakinlər üçün açıqdır və giriş sərbəstdir.
Hər il bu vaxtlar “Nargis” Fondunun təşkil etdiyi “Soyuq əllər, isti ürək” xeyriyyə yarmarkası öz adını tamamilə doğruldur. Axşam saat 19:00-dan başlayaraq buraya üz tutanlar arasında uşaqları da görmək olur. Meydanda onların əylənməsi üçün xüsusi oyun zonaları yaradılıb. Burada quraşdırılan taxta köşklərdə qonaqlara şirniyyat, ətriyyat, oyuncaq, yolka bəzəkləri təklif edilir.
Yanvarın 15-dək davam edəcək yarmarka əhali arasında “Bakının qış nağılı” kimi də tanınır. Təşkilatçıların məqsədi insanları sadəcə əyləndirməkdən, yaxud çal-çağırdan ibarət deyil. “Soyuq əllər, isti ürək” ölkənin hər yerindən “Nargis” Fonduna üz tutan onlarla ailə üçün bir ümid çırağıdır.
Bu ilki yarmarka böyük Yeni il yolkası, 64 böyük və 20 balaca ev, üç ədəd ikimərtəbəli restoran, fotozona, 4D Kinoteatr, müxtəlif əyləncə zonaları və digər tematik guşələrdən ibarətdir. İsti ürəkləri bir araya gətirən xeyriyyə yarmarkası təkcə yerli sakinlərin deyil, xarici qonaqların da marağına səbəb olur.
Ziyarətçilər burada eksklüziv suvenirlər, hədiyyələr əldə edir, münasib qiymətə qərbin və şərqin ləzzətli təamlarını dadır baxır, xatirə şəkilləri çəkdirir, sevdikləri ilə birgə əsl bayram ab-havası yaşayırlar. Hansı guşəyə üz tutursansa, böyük sevinclə qarşılanırsan. Sanki yarmarka Yeni il ərəfəsində insanları bir-birinə daha da yaxınlaşdır. Fotolarda bunu aydın görmək olar.
Yarmarka sponsorlarının maliyyə dəstəyi və satışdan əldə edilən bütün vəsait müxtəlif xəstəliklərdən əziyyət çəkən uşaqların müalicə və əməliyyat xərclərinin ödənməsinə sərf olunur.
Qışda əllərimiz soyuq olur, təki qəlblərimiz daim isti olsun.
jpg_1775126472.jpg)
