Ukraynalıların yarıdan çoxu Volodimir Zelenskiyə etimad göstərir. Halbuki, Donald Trampın fikrincə, son aylarda Ukrayna Prezidentinin reytinqi aşağı düşüb.
AZƏRTAC bu barədə Kiyev Beynəlxalq Sosiologiya İnstitutunun (KIIS) keçirdiyi sorğunun məlumatlarına istinadla xəbər verir.
2025-ci ilin fevral ayının birinci yarısına olan məlumata görə, ukraynalıların 57 faizi Zelenskiyə inanır, əhalinin 37 faizi isə ona etibar etmir. Güvən və etibarsızlıq nisbəti müsbət 20 faizdir.
2024-cü ilin dekabrında respondentlərin 52 faizi ona güvəndiyi, 39 faiz isə etibar etmədiyi bildirmişdi və inam-etimadsızlıq balansının müsbət 13 faiz olduğu 2024-cü ilin dekabrında keçirilən son sorğudan sonra etimad rəqəmləri bir qədər yaxşılaşıb.
KIIS-in direktor müavini Anton Qruşetskinin qeyd etdiyi kimi, Prezident Zelenskiyə “cəmiyyətdə kifayət qədər yüksək səviyyədə etimad göstərilir və üstəlik, o, legitimliyini qoruyur”. Onun fikrincə, demokratik cəmiyyət üçün indiki etimadın olması çox yaxşı nəticədir.
Qruşetski əlavə edib: “Əgər ayrı-ayrı beynəlxalq tərəfdaşlar və müttəfiqlər mümkün sülh danışıqları kontekstində Prezidentin legitimliyindən narahatdırlarsa və seçkilərdə israr etməyi məqsədəuyğun hesab edirlərsə, Ukrayna vətəndaşlarının öz nöqteyi-nəzərindən bununla bağlı heç bir problem yoxdur. İndiki Prezident və hökumət çətin danışıqlar aparmaq üçün tamamilə legitimdir və seçkilər Ukrayna müharibəsi bitdikdən, ən azı ölkənin etibarlı təhlükəsizlik zəmanəti almasından sonra keçirilməlidir”.
Kiyev Beynəlxalq Sosiologiya İnstitutu (KIIS) 4-9 fevral 2025-ci il tarixlərində 1000 respondent arasında sorğu keçirib. Anketlərə Ukrayna hakimiyyəti tərəfindən müvəqqəti nəzarət olunmayan ərazilərin sakinləri daxil edilməyib (eyni zamanda, respondentlərin bəziləri işğal olunmuş ərazilərdən köçmüş məcburi köçkünlərdir). Bununla yanaşı, 24 fevral 2022-ci il tarixindən sonra xaricə səfər etmiş vətəndaşlarla da sorğu keçirilməyib.
Bundan əvvəl ABŞ Prezidenti Donald Tramp Volodimir Zelenskinin reytinqinin cəmi 4 faiz olduğunu bildirmişdi. O demişdi: “İndi Ukraynada elə bir vəziyyət yaranıb ki, orada uzun müddətdir seçkilər olmayıb. Orada hərbi vəziyyət elan edilib. Etiraf etmək mənim üçün nə qədər kədərli olsa da, hazırda Ukrayna liderinin dəstəyi 4 faizdir”.
