Kitaba, mütaliəyə marağın azalması indi cəmiyyəti rahatsız edən məsələyə çevrilmişdir. Amma nə yaxşı ki, bizim Siyəzəndə kitabsevərlər çoxdur. Kitab oxumaq ənənəsi Siyəzəndə, əsasən də rayonun kəndlərində davam edir.
Quba-Xaçmaz Regional Mədəniyyət İdarəsinin 9 saylı Sədan kənd kitabxanasında hətta vaxtaşırı müxtəlif tədbirlər də keçirilir. Kitabxanamız ətraf rayonlara və respublikamızın görməli yerlərinə səfərlər təşkil edir, ayrı-ayrı bölgələr arasında mədəni əlaqələri genişləndirir. Son bir ildə burada onlarla tədbir keçirilib. Şəhid ailələri ilə görüş, rayon yazarlarının kitablarının təqdimatı, Vətən müharibəsi qazilərinin evlərində ziyarət edilməsi, kəndin yaxşı oxuyan şagirdlərinin arasında bilik yarışmalarının keçirilməsi bunların yalnız bir neçəsidir.
Qazilərlə görüş maraq doğuran tədbirlərdən biridir. Qeyd edim ki, kəndin dörd gənci İkinci Qarabağ savaşında müxtəlif dərəcəli zədələr almışdır. Kənd kitabxanası kollektivinin təklifi ilə sakinlər onların bütün problemlərini öz üzərinə götürüblər. Ailəli olanların mal-qaralarının saxlanılmasına kömək göstərilir. Çətinlik yarananda sakinlər yığışaraq məsələni birlikdə həll edirlər. Qazilərimizin tək biri subaydır. Yaxın vaxtlarda o da ailə quracaq. Toyunda hamılıqla iştirak edəcəyik.
Rayonun qələm sahibləri ilə sakinlərin görüşü də maraqlı keçir. Deyim ki, sədanlılar şair təbiətli insanlardır. Kənd kitabxanasında keçirilən görüşdə qonaqlarla yanaşı, yerli ədəbiyyat həvəskarları da öz yaradıcılıq nümunələri ilə iştirakçıları tanış edirlər. Kəndin iki şairinin isə artıq 3 kitabı işıq üzü görüb.
Bu kəndin insanları elmə, təhsilə də çox meyillidirlər. Kitabxanada ali məktəb tələbələrinə yardım məqsədilə ayrıca fond yaradılıb. Fond ehtiyacı olanlara təhsillərini davam etdirmələri üçün yardım göstərir.
Kənd kitabxanasının ənənələrindən biri də tətil günlərində şagirdlərin respublikamızın tarixi yerlərinə səfərlərinin təşkilidir. Nəqliyyat məsələsini kəndin imkanlı adamları həll edirlər. Belə gəzintilərdən sonra hamı kənd kitabxanasına toplaşır, hər kəs öz təəssüratlarını bölüşür.
Bunları yazmaqla bildirmək istəyirəm ki, belə tədbirlər insanları birləşdirir. Məhz bunun nəticəsində sədanlıların çoxlu dostu var. Sədanlılar həm də dostcanlı, dostluğa etibarlı olan insanlardır.
Amin MURADZADƏ,
Siyəzən rayonunun Sədan kənd sakini
