Rauf Məmmədov sayca 6-cı dəfə Azərbaycan çempionu oldu
Şahmat üzrə Azərbaycan çempionatına yekun vurulub. Yarışın son günündə həlledici qarşılaşmaların tay-brek görüşləri baş tutub. İlk iki partiyada qalibi müəyyənləşdirə bilməyən cütlər yenidən lövhə arxasına keçiblər.
Kişilərin mübarizəsində iki dəfə heç-heçə edən Rauf Məmmədovla Şəhriyar Məmmədyarov Azərbaycan çempionu titulu üçün növbəti dəfə üz-üzə gəliblər. Tay-brekdə rəqibindən üstün olan Məmmədov qələbə qazanaraq birinci yeri tutub. Bu, onun 6-cı Azərbaycan çempionluğu olub.
Qadınların yarışında isə hərəyə bir qələbə qazanan Günay Məmmədzadə ilə Gövhər Beydullayeva qalib adı uğrunda mübarizə aparıblar. Daha inamlı çıxış edən Məmmədzadə çempion tituluna yiyələnib. Bürünc uğrunda görüşdə isə Gülnar Məmmədova Ülviyyə Fətəliyevanı məğlub edərək, mükafatçılar arasında yer alıb.
Şahmat üzrə Azərbaycan çempionatının qalibi olan Rauf Məmmədov deyib ki, çempionluğu atasına həsr edir: "Şokdayam, çünki tarixi Azərbaycan çempionatında qələbə qazanmaq çətin idi. Mənim üçün inanılmaz nəticədir. Çempionluğu ötən il rəhmətə gedən atama həsr edirəm. Onun dünyadan köçməsinin bir ili tamam oldu. Həmişə Azərbaycan çempionatında iştirak etməyimi istəyirdi".
Qrossmeyster yarımfinalda Teymur Rəcəbov, finalda isə Şəhriyar Məmmədyarovla duelləri dəyərləndirib: "Bu cür şahmatçıları məğlub etmək, əlbəttə, çox çətindir. Bir az da bəxt lazımdır. Şükür Allaha ki, bəxtim gətirdi. Həm Teymur, həm də Şəhriyarla oyun çətin keçdi".
Şahmatçı qarşıdakı planlar barədə sualı da cavablandırıb: "Hələlik dincəlmək istəyirəm. Çünki çox çətin yarış oldu. Daha sonra bu barədə düşünəcəyəm".
"Azərbaycan"
jpg_1741951825.jpg)
