Sağlamlıq imkanları məhdud uşaqlara göstərilən reabilitasiya yönümlü sosial xidmətlərə baxış olub

Əmək və əhalinin sosial müdafiəsi naziri Səlim Müslümov nazirliyin sosial sifarişi əsasında “Müşfiq” sağlamlıq imkanları məhdud uşaqlara yardım İctimai Birliyi tərəfindən müvafiq layihə çərçivəsində uşaqlara göstərilən reabilitasiya yönümlü sosial xidmətlərlə tanış olub.

Nazirliyin ictimaiyyətlə əlaqələr şöbəsindən AZƏRTAC-a bildiriblər ki, tədbir zamanı nazir ölkəmizdə sağlamlıq imkanları məhdud uşaqların reabilitasiya imkanlarının artırılmasının diqqətdə saxlanıldığını söyləyərək deyib: “Əmək və Əhalinin Sosial Müdafiəsi Nazirliyinin sosial sifarişləri əsasında ixtisaslaşmış QHT-lər tərəfindən icra olunan sosial xidmət layihələrinin böyük əksəriyyəti də bu məqsədə yönəlib. Hazırda nazirliyin sifarişi ilə müxtəlif təşkilatlar tərəfindən 70-dən çox sosial xidmət layihəsi icra olunur ki, onlardan 67 layihə məhz uşaqlarla bağlıdır. Eyni zamanda, həmin layihələrin sayı da ildən-ilə çoxalır. Məsələn, Əmək və Əhalinin Sosial Müdafiəsi Nazirliyinin sosial sifarişləri əsasında müvafiq təbəqədən olan uşaqlara reabilitasiya yönümlü sosial xidmətlərin göstərilməsi üzrə layihələrin sayı bu il ötən illə müqayisədə iki dəfədən çoxdur. Həmin layihələr çərçivəsində sosial xidmətlərlə əhatə olunan uşaqların sayı iki dəfədən çox artaraq 4046 nəfərə çatıb”.

Nazir qeyd edib ki, həmin layihələr çərçivəsində hazırda 13 rayonda uşaqların dövlət uşaq müəssisələrinə düşməsinin qarşısının alınması, çətin həyat şəraitində olan uşaqların və ailələrin sosial xidmətlərə çıxışının təmin məqsədilə günərzi xidmət mərkəzləri yaradılıb: “Həmçinin sosial sifarişlər üzrə layihələrə uyğun olaraq 23 rayonda sağlamlıq imkanları məhdud uşaqlara icma əsaslı sosial reabilitasiya xidmətləri mərkəzi, 22 rayonda isə sosial reabilitasiya xidmətləri mərkəzi, 2 surdoloji mərkəz, autizm sindromlu uşaqlar üçün 2 reabilitasiya mərkəzi və s. fəaliyyət göstərir. Müvafiq layihələr çərçivəsində sosial təhlükəli vəziyyətdə olan uşaqlar üçün sosial-psixoloji yardımın göstərilməsi, sağlamlıq imkanları məhdud uşaqların Portec metodikası ilə sosial reabilitasiyası, onların psixo-sosial dəstəklə təmin edilməsi, sağlamlıq imkanları məhdud uşaqlar və əlilliyi olan şəxslər arasında idman tədbirlərinin keçirilməsi, onların beynəlxalq yarışlarda iştirakına şərait yaradılması və digər istiqamətlərdə də işlər aparılır.”

Nazir daha sonra söyləyib: “Layihələr üzrə aparılan işlərə daim nəzarət həyata keçirilir. Nazirliyin sosial sifarişi əsasında “Müşfiq” sağlamlıq imkanları məhdud uşaqlara yardım İctimai Birliyi tərəfindən müvafiq layihə çərçivəsində 100 nəfərə qədər uşağa reabilitasiya yönümlü sosial xidmətlər göstərilir. Həmin təşkilat tərəfindən sağlamlıq imkanları məhdud uşaqların sosial reabilitasiyası sahəsində müvafiq layihə üzrə aparılan işləri, uşaqlara göstərilən xidmətlərin səviyyəsini müsbət dəyərləndirmək olar”.

“Müşfiq” sağlamlıq imkanları məhdud uşaqlara yardım İctimai Birliyinin sədri Validə Abbasovanın uğurlu iş təcrübəsi ilə seçildiyi və Prezident İlham Əliyevin 2016-cı il 1 mart tarixli Sərəncamı ilə “Tərəqqi” medalı ilə təltif edildiyi qeyd edilib.

Tədbirdə “Müşfiq” Sağlamlıq imkanları məhdud uşaqlara yardım İctimai Birliyi tərəfindən müvafiq layihə çərçivəsində uşaqlara göstərilən reabilitasiya yönümlü sosial xidmətləri nəzərdən keçirilib.