“İzvestiya” qəzeti ORMATEK (Rusiyada yuxu məhsulları, o cümlədən ortopedik döşəklər istehsal edən brend) ekspertlərinin araşdırmasına və klinik psixoloq Kristina Morozovanın açıqlamasına istinadən məlumat yayıb ki, rusiyalıların 63 faizi iş vaxtı ən azı bir dəfə yuxuya getdirlər. Respondentlərin 8 faizi bunun mütəmadi baş verdiyini bildirib. Sorğuda iştirak edənlərin 70 faizi isə yuxulu olduqlarını gizlətmək üçün işləyirmiş və ya həmsöhbətini diqqətlə dinləyirmiş kimi davranır.
Yuxululuq ən çox nahardan sonra (60 faiz), kompüter arxasında və ya sənədlərlə monoton iş zamanı (57 faiz) müşahidə olunur. Respondentlərin yarısı iş vaxtı mürgüləmək üçün sakit yer axtardığını bildirib. Onların 17 faizi boş kabinetdə və ya iclas otağında, digərləri isə istirahət otağında, anbarda, avtomobildə və hətta tualetdə yatmağa çalışıb.
Yuxusuzluğun əsas səbəbləri arasında erkən oyanmaq zərurəti (60 faiz), iş və ev işləri səbəbindən gec yatmaq (42 faiz) və gecə istirahətinin kifayət qədər olmaması (32 faiz) göstərilib. Yuxululuq iş məhsuldarlığına da təsir edir: respondentlərin 55 faizi diqqətini cəmləməkdə çətinlik çəkdiyini, 47 faizi isə daha yavaş işlədiyini bildirib.
Gümrahlaşmaq üçün sorğuda iştirak edənlərin 60 faizi gəzməyə çıxır, 45 faizi qəhvə və ya enerji içkiləri qəbul edir. Bununla belə, ekspertlər mütəmadi yuxululuq zamanı yalnız gün ərzində yorğunluqla mübarizə aparmağın deyil, gecə istirahətinin keyfiyyətinə də diqqət yetirməyin vacibliyini vurğulayırlar.
Klinik psixoloq Kristina Morozovanın sözlərinə görə, yuxu göstəricilərini mükəmməlləşdirməyə həddindən artıq çalışmaq ortosomniyaya , yəni ideal yuxu göstəricilərinə nail olmaqla bağlı obsesiv istəklə xarakterizə olunan pozuntuya səbəb ola bilər. Belə hallarda insanlar özlərini necə hiss etdiklərindən daha çox yuxu izləmə tətbiqlərinin göstərdiyi rəqəmlərə əsaslanırlar.
Züleyxa ƏLİYEVA,
“Azərbaycan”
31 - Copyjpg_1794009722.jpg)
314444444 - Copyjpg_1793831795.jpg)
