2020-ci ilin noyabr Zəfəri ilə 28 illik Qarabağ həsrətimizə son qoyuldu. Ali Baş Komandan İlham Əliyevin rəhbərliyi altında ordumuz ildırım sürəti ilə Qarabağı və Şərqi Zəngəzuru erməni işğalından azad etdi.
Azərbaycanın işğaldan azad edilən rayonlarından biri də Ağdamdır. Ağdam barlı, bərəkətli torpağı, iqtisadi potensialı ilə həmişə digər rayonlardan fərqlənmişdir. Hələ sovetlər dönəmində rayonumuzda üzümçülük, taxılçılıq, heyvandarlıq, eləcə də yerli sənayenin bir çox sahələri geniş inkişaf etmişdir. 
Təəssüf ki, işğal zamanı cənnətməkan Ağdamımız yerləyeksan olundu, "Qafqazın Xirosiması"na çevrildi. Amma "yaman günün ömrü az olar" deyiblər. Bu gün Qarabağda, Şərqi Zəngəzurda abadlıq, bərpa işlərinə start verilib, "ağıllı" kənd, şəhər layihələri çərçivəsində hər yerdə quruculuq işləri aparılır. 
Əlbəttə, belə bir məsuliyyətli işlərin öhdəsindən gəlmək üçün ilk növbədə səriştəli kadrlar lazımdır. Ağdam Rayon İcra Hakimiyyətinin başçısı Vaqif Həsənov da məhz belə kadrlardandır. O, bu vəzifəyə təyin olunduğu gündən üzərinə düşən işin öhdəsindən bacarıqla gəlir. Vaqif müəllim özü ilə Ağdama sanki yeni nəfəs, yeni məmur-vətəndaş münasibəti gətirmişdir. Mən V.Həsənovun Mahrızlı və Evoğlu kəndlərinin sakinləri ilə görüşündə bunun bir daha şahidi oldum. O, görüş iştirakçılarının hər birini diqqətlə dinləyir, xüsusən şəhid ailələri və qaziləri rahatsız edən məsələlərin həlli üçün yerindəcə konkret göstərişlər verirdi. Bilirəm ki, onun mütəmadi olaraq keçirdiyi səyyar görüşlərdə sakinlərin müraciətlərinə bu cür həssaslıqla yanaşır. Ona görə də ağdamlılar onun görüşünə böyük ümidlə gəlirlər. Vaqif müəllimsə sadəcə  çalışır ki, heç kimin problemi həll edilməmiş qalmasın. 

Əbülfət MUSTAFAYEV,
Birinci Qarabağ müharibəsi veteranı