Qızıl birinci...

Qeyri-neft məhsullarının ixracı 18 faiz artıb

İqtisadi İslahatların Təhlili və Kommunikasiya Mərkəzi (İİTKM) "İxrac icmalı"nın növbəti sayını təqdim edib. İcmala əsasən, cari ilin yanvar-aprel aylarında Azərbaycanın qeyri-neft sektoru üzrə ixracının dəyəri ötən ilin müvafiq dövrü ilə müqayisədə 18 faiz artaraq 1,1 milyard dollar təşkil edib. 

Bu dövrdə yeyinti məhsullarının ixracının dəyəri 12,1 faiz artaraq 300,8 milyon dollara bərabər olub. İxrac olunan kimya sənayesi məhsullarının dəyəri ötən ilin müvafiq dövrünə nisbətən 42,5, şəkər 25,8, qara metallar və onlardan hazırlanan məmulatlar 16,7, meyvə-tərəvəz 14,8, alüminium və ondan hazırlanan məmulatlar 9,8, pambıq iplik isə 5,3 faiz artıb. Cari ilin ilk dörd ayında ixrac olunan aqrar məhsullarında 14, aqrar-sənaye məhsullarında 7,9 faiz artım müşahidə olunub. Bütövlükdə aqrar və aqrar-sənaye məhsullarının birgə ixracında 12,2 faiz artım qeydə alınıb. 

Həmin dövr ixrac edilmiş qeyri-neft sektoruna aid malların siyahısında qızıl birinci, pomidor (tomat) ikinci, karbamid üçüncü olub. Aprel ayı ərzində isə ixrac edilmiş qeyri-neft sektoruna aid malların siyahısında yenə də qızıl birinci, pomidor ikinci yerdə qərarlaşıb. Üçüncü isə pambıq olub. 

Cari ilin ilk dörd ayında Rusiya Federasiyasına 321,4 milyon, Türkiyəyə 187,7 milyon, Gürcüstana 105,8 milyon, İsveçrəyə 100,5 milyon, Ukraynaya 63 milyon dollarlıq qeyri-neft məhsulları ixrac olunub. Cari ilin aprel ayında isə Rusiya Federasiyasına 88,5 milyon, Türkiyəyə 53,3 milyon, İsveçrəyə 30,9 milyon, Gürcüstana 25,1 milyon, Qazaxıstana 14,2 milyon dollar dəyərində qeyri-neft sektoruna aid məhsul satılıb.

Hesabat dövrü üzrə hazırlanmış qeyri-dövlət ixracatçı subyektlərin reytinqində ilk onluqda "MKT İstehsalat Kommersiya" MMC, "Azərbaycan İnterneyşnl Mayninq Kompani Limited Şirkəti"nin Azərbaycan Respublikasındakı nümayəndəliyi, "UNİTED ALLİANCE GROUP LTD" şirkətinin Azərbaycan Respublikasındakı filialı, "Baku Steel Company" QSC, "Avrora", "P-AQRO", "Export Stream" MMC-lər, "BİNƏ AQRO" QSC, "Sahdag Sy", "LEPIN LM" MMC-lər təmsil olunublar. Qeyri-neft sektoru üzrə ixrac əməliyyatlarında iştirak edən dövlətə məxsus olan şirkətlərin siyahısına isə ARDNŞ-nin Marketinq və İqtisadi Əməliyyatlar İdarəsi başçılıq edir. Daha sonra siyahıda "SOCAR Polymer" MMC, "AzerGold" QSC, "Azəralüminium" MMC, Azərbaycan Respublikası Dövlət Neft Şirkətinin Qaz İxrac İdarəsi, "Azərpambıq Aqrar Sənaye Kompleksi" MMC, "Azərbaycan Hava Yolları" QSC, "Azərenerji" ATSC, Naxçıvan MR Dövlət Energetika Xidməti, "Qaradağ Şüşə Zavodu" ASC yer alıblar.

Yanvar-aprel aylarında Azərbaycan Respublikasının Kosmik Agentliyi ("Azərkosmos") 5,6 milyon dollar dəyərində telekommunikasiya xidməti ixrac edib. "Azərkosmos"un xidmətlərindən istifadə edən ölkələrin sayı isə 40-dır. Aprel ayında isə "Azərkosmos" tərəfindən dünyanın 38 ölkəsinə 1,6 milyon dollar dəyərində xidmət göstərilib. İlin ilk dörd ayı ərzində "Azərkosmos"un peyk telekommunikasiya xidmətlərindən istifadə edən ölkələrin ilk beşliyində 1,5 milyon dollarla Birləşmiş Krallıq, 1,2 milyon dollarla Lüksemburq, 255 min dollarla Nigeriya, 238,6 min dollarla Misir və 238,5 min dollarla Türkiyə təmsil olunublar. 

Rüstəm KAMAL,

"Azərbaycan"