İsti idman dəstinizi və xizəklərinizi hazırlayın, "ağ" təbiət sizi gözləyir
Azərbaycanda turizmin inkişafına göstərilən diqqət və verilən dəstək bu sektoru qeyri-neft iqtisadiyyatının aparıcı və gəlirli sahəsinə çevirib. O səbəbdən hazırda ölkəmizdə yüzlərlə müxtəlif istiqamətli turizm şirkəti fəaliyyət göstərir.
Son illər Azərbaycana gələn turistlərin sayında nəzərəçarpan artım da bununla bağlıdır. Rəsmi statistikaya görə, cari ilin 9 ayında Azərbaycana gələn xarici turistlərin sayı 29,1 faiz artıb. Rusiya, Türkiyə, Hindistan, Səudiyyə Ərəbistanı, Gürcüstan, Qazaxıstan, Pakistan, Birləşmiş Ərəb Əmirlikləri, Özbəkistan, Çin, Küveyt, Ukrayna, İtaliya, Polşa, Misir, Almaniya, Bəhreyn, Oman və Belarusdan gələn turistlərin sayında bu artım daha çoxdur. Elə bu statistik rəqəmlər deməyə əsas verir ki, Azərbaycanı turizm ölkələri sırasına aid etmək olar. Ölkəmizin zəngin təbiəti, Bakının özəlliyi, memarlıq möcüzələrinin çoxluğu, palçıq vulkanları, zəngin milli kulinariya, neft kurortu olan Naftalan, dünya irs siyahısına salınmış İçərişəhər və Şirvanşahlar Sarayı, Qız qalası, Qobustan Dövlət Tarix-Bədii Qoruğu, Hırkan meşələri, Xınalığın tarixi mənzərəsi, "İpək yolu" şəhəri Şəki, valehedici Xəzər dənizi və s. özəllikləri olan Azərbaycan da turizm diyarı olmayıb, hara olasıdır ki?!
Ölkəmizə gələn qonaqlar qədim tikililərlə yanaşı, əzəməti və möhtəşəmliyi ilə diqqəti cəlb edən Dövlət Bayrağı Meydanı, Bakı "Kristal zal"ı, "Gülüstan" sarayı, Heydər Əliyev Mərkəzi və "Alov qüllələri"ni görəndə təəccüblərini gizlədə bilmirlər. Bu sözləri regionlara səfər edən turistlər haqqında da demək olar. Şəkini, Qəbələni, Qubanı, Qusarı, cənub zonasını, qərb bölgəsini, son vaxtlarsa Şuşanı, Laçını gəzənlər Azərbaycanın təbiətinə valeh olduqlarını dönə-dönə dilə gətirirlər.
Hazırda qışın astanasındayıq. Baxmayaraq ki, Azərbaycanda qış fəsli son vaxtlar elə də sərt və şaxtalı keçmir, amma qış turizmi həvəskarlarının ölkəmizə gəlişi ilbəil artır. Qəbələdəki "Tufandağ", Qusardakı "Şahdağ" qış-yay turizm kompleksləri xizək həvəskarlarının sevimli istirahət məkanlarıdır. Dünyada ən mükəmməl layihələrdən olan Azərbaycanın ilk dağ-xizək kurortu "Şahdağ" digər istirahət mərkəzlərindən bənzərsizliyi ilə fərqlənir. Bu mərkəz ilboyu fəaliyyət göstərir. Dəniz səviyyəsindən 1300-2300 metr yüksəklikdə yerləşən "Şahdağ"ın ərazisi 2058 hektardır. Kompleksdə "Qaya" və "Zirvə" kimi hotellər fəaliyyət göstərir. Müasir tələblərə cavab verən "Tufandağ"a da yerli və xarici turistlərin, xüsusən körfəz ölkələrindən gələn qonaqların böyük marağı var.
Milli Məclisin deputatı, iqtisadçı Vüqar Bayramov deyir ki, qış turizmi Azərbaycanda turizm xidmətlərində yüksək paya malik olan istiqamətlərdəndir: "Daxili və gəlmə turizmdə qış turizminin payı getdikcə daha da artır. Nəzərə almaq lazımdır ki, ölkə ərazisində infrastruktur formalaşdırılıb, kifayət qədər imkanlar var və təbii ki, daha çox turistin cəlb edilməsi mümkündür. Digər tərəfdən isə qış turizminə marağın artması qlobal olaraq müşahidə edilir. Bu il də qış turizmi Azərbaycanda turizm gəlirlərində yüksək paya malik olacaq. Ümumiyyətlə, növbəti illərdə qış turizminin turizm sektorundakı payının artması gözlənilir. Xüsusilə də Qarabağ və Şərqi Zəngəzurda da qış turizminə üstünlük veriləcək".
Yeni ilə çox qalmayıb. Deməli, qış tətili yaxınlaşır və istirahət üçün bir neçə günlük fürsət olacaq. Tətil günlərində ölkə vətəndaşları istirahətlərini harada keçirəcəkləri barədə yəqin ki, indidən plan qurublar. O səbəbdən deyə bilərik ki, həmin günlər daxili turizm məkanlarına tələbat yüksək olacaq. Qalır bu tələbatı həm qiymət, həm də xidmət sarıdan qarşılamaq ki, bu da başqa mövzunun söhbətidir. Amma təkcə onu qeyd edək ki, regionlarımızda bu tələbi qarşılamaq üçün hər cür imkan olsa da, bəzən "fürsətdir" deyib çox qazanmaq istəyənlər qonaqların istirahətini burunlarından tökürlər.
Böyük Qafqaz dağlarında cənnət yaratmış Azərbaycanın qışı da möcüzədir. Avropa ilə Asiyanın qovşağında yerləşən Azərbaycanın bu möcüzəsindən, istər yerli olsun, istərsə də əcnəbi, kim zövq almırsa, özünü qınasın.
Züleyxa ƏLİYEVA,
"Azərbaycan"
jpg_1752835479.jpg)
