Bakı üçün ümumilikdə bu, təəccüblü deyil. Qarabağ münaqişəsi başlayandan biz hələ də davam edən ikili standartların şahidi oluruq. Xocalı faciəsinin törədilməsində iştirak edən erməni silahlı birləşmələrinin və onların himayədarlarının əməlləri bütün beynəlxalq konvensiya və qətnamələrin kobud şəkildə pozulmasıdır. Onlar beynəlxalq hüquqa açıq-aşkar məhəl qoymayırlar. Buna baxmayaraq, onlardan heç biri hələ də bu qanlı faciəyə görə cavab verməyib.
AZƏRTAC xəbər verir ki, bunu Azərbaycan Respublikasının Qırğızıstandakı səfiri Lətif Qəndilov Xocalı soyqırımının 33-cü ildönümü ilə bağlı “Veçerniy Bişkek” qəzetinə müsahibəsində söyləyib.
“Ermənistanın keçmiş prezidenti Serj Sarqsyan britaniyalı jurnalistlər qarşısında öyünərək bunları etiraf edib: “Xocalıya qədər azərbaycanlılar elə bilirdilər ki, bizimlə zarafat etmək olar. Hesab edirdilər ki, ermənilər dinc sakinlərə əl qaldıra bilməzlər. Biz bu stereotipi dağıtdıq. Baxın görün nə baş verdi...” (Tomas de Vaal, “Qara bağça”, “BBC”).
Doğrudur, son illər tanınmış beynəlxalq təşkilatlar bu soyqırımı pisləyən müxtəlif qətnamələr, sənədlər qəbul edib, lakin bütün bunlar sözdən başqa bir şey olmadı. Soruşun, niyə? Yenə də ikili standartlar.
Xocalı hadisələrinin 33-cü ildönümündə Azərbaycan xalqı bir daha ümid və inam ilə beynəlxalq təşkilatlara, dünya xalqlarına və dövlətlərə müraciət edərək, həqiqət və ədaləti müdafiə etməyə, bu dəhşətli cinayəti pisləməyə və “müəllifləri” məsuliyyətə cəlb etməyə çağırırlar. Əks halda, bir müddət sonra bu canilər “qəhrəman” olacaqlar.
Onların bəziləri artıq Azərbaycanın ədalətli məhkəməsi qarşısında cavab verir, qalanları da gec, ya tez Xocalıda dinc sakinlərə qarşı soyqırımı törətdikləri üçün layiqli cəzalarına çatacaq, tarixin məhkəməsi qarşısında cavab verəcəklər.
Biz qisas hissi ilə yaşamırıq, lakin nasist cinayətkarlarının cəzasız qalmasına yol verilmədiyi kimi, nə qədər zaman keçsə də Xocalıda dinc əhaliyə qarşı soyqırımı törədənlər də cəzasız qalmamalıdır. İnsani ədalət naminə, bu soyqırımın planetimizin tarixində sonuncu olması üçün”, - deyə səfir “Veçerniy Bişkek” qəzetinin müxbirinin sualını cavablandırarkən söyləyib.
