Cari ilin yanvar-noyabr aylarında Azərbaycanda sənaye müəssisələri və bu sahədə fəaliyyət göstərən fərdi sahibkarlar tərəfindən 57,5 milyard manatlıq sənaye məhsulları istehsal edilib.
Həmin dövrdə qeyri-neft-qaz sektorunda sənaye məhsulları istehsalı 5 faizə yaxın artıb. Bu, Prezident İlham Əliyev tərəfindən qeyri-neft-qaz sektoru istiqamətində aparılan islahatların real nəticəsidir. Başqa sözlə, həmin sektorda sahibkarlığın inkişafına yaradılan münbit şərait səmərəsiz qalmayıb.
Dövlət Statistika Komitəsindən verilən məlumata görə, 11 ayda ümumilikdə neft-qaz sektoru üzrə məhsul istehsalı 2,1 faiz azalıb, qeyri-neft-qaz sektorunda isə 4,8 faiz artıb.
Sənaye məhsullarının 60,6 faizi mədənçıxarma, 33 faizi emal, 5,4 faizi elektrik enerjisi, qaz və buxar istehsalı, bölüşdürülməsi və təchizatı, 1 faizi su təchizatı, tullantıların təmizlənməsi və emalı sektorlarında istehsal olunub. Mədənçıxarma sektorunda əmtəəlik neft hasilatı 4,7 faiz azalsa da, əmtəəlik qaz hasilatı 1,1 faiz artıb.
Emal sektorunda əczaçılıq məhsullarının istehsalı 94,9, ağacın emalı və ağacdan məmulatların istehsalı 60,9, kompüter, elektron və optik məhsulların istehsalı 49,9, toxuculuq sənayesi məhsullarının istehsalı 27,1, rezin və plastik kütlə məmulatlarının istehsalı 13,7, tütün məmulatlarının istehsalı 13,2, qida məhsullarının istehsalı 9,8, neft məhsullarının istehsalı 9,6, kimya sənayesi məhsullarının istehsalı 8,7 faiz artıb.
Artım həmçinin elektrik enerjisi, qaz və buxar istehsalı, bölüşdürülməsi və təchizatı, eləcə də su təchizatı, tullantıların təmizlənməsi və emalı sektorlarında qeydə alınıb, müvafiq olaraq 0,9 və 3,3 faiz.
Dövlət tərəfindən özəl sektora göstərilən dəstək sayəsində qeyri-neft sənayesi üzrə məhsul istehsalında aparıcı mövqe sahibkarlara məxsusdur. Belə ki, cari ilin 11 ayında sənaye məhsulları istehsalının 70 faizdən çoxu özəl sektorun payına düşüb. İqtisadiyyat nazirinin birinci müavini Elnur Əliyev bununla bağlı demişdir: "Xüsusilə sənayenin inkişafı ölkə iqtisadiyyatının rəqabət qabiliyyətinin artırılması baxımından prioritetdir". Elnur Əliyev həmçinin vurğulamışdır ki, ölkəmizdə inklüziv sahibkarlığın inkişafı, qadınların biznes təşəbbüslərinin reallaşdırılmasına şərait yaradılıb. Bunun nəticəsidir ki, cari ilin 9 ayında qadın sahibkarlarımızın sayı artaraq 339 minə yaxınlaşıb.
Azərbaycanda qeyri-neft-qaz sənayesinin inkişafında iqtisadi zonalar xüsusi çəkiyə malikdir. Həm istehsal, həm də ixracda artam statistikanın çoxu bu sahənin payına düşür. Təkcə cari ilin yanvar-sentyabr ayları sənaye zonalarında istehsal olunan məhsulların ixracında 17 faiz artım qeydə alınıb.
Sahibkarlığa verilən dövlət dəstəyi sənaye zonalarına investisiya qoyuluşunu da artırıb. Bu ilin 9 ayında ölkə üzrə sənaye zonalarına yatırılan ümumi investisiyanın həcmi 8 milyard manatdan çox olub. Həmin dövrdə qeyri-neft-qaz məhsullarının ixracının təqribən 30 faizi sənaye zonalarının payına düşüb.
Elnur Əliyev qeyd edib ki, rəqəmsal iqtisadiyyatın dövlət tərəfindən prioritetləşdirilməsi şəraitində özəl sektorun yeni tələblərə uyğunlaşması vacib şərtdir: "Bu istiqamətdə İqtisadiyyat Nazirliyinin tabeliyində 4SİM tərəfindən sahibkarlıq subyektlərinin rəqəmsal transformasiyasına dəstək göstərilir, "Sənaye 4.0" proqramı icra olunur. Bu stimullaşdırıcı mexanizmlərlə yanaşı, KOBİA tərəfindən sahibkarlıq subyektlərinə bazarlara çıxış, bilik və bacarıqların artırılması, qrant proqramları, innovativ sahibkarlığın dəstəklənməsi, klasterləşmə istiqamətlərində də dəstək göstərilir".
Rüstəm KAMAL,
"Azərbaycan"
jpg_1766670470.jpg)
