19 Aprel 2024 08:00
2004
SİYASƏT
A- A+

Qətiyyətin təntənəsi

 

Sülhməramlılar ərazilərimizi vaxtından əvvəl tərk edirlər

 

Ötən 20 il ərzində Azərbaycan hərtərəfli inkişaf mərhələsinə yüksələrək dünyanın sayılıb-seçilən ölkəsinə çevrilib, torpaqlarını işğaldan qurtararaq, suverenliyini tam təmin edərək onilliklərdir ki, milli hədəflərinə doğru gəldiyi çətin, sınaqlarla dolu, mübarizələrdən keçən yolunu zəfər zirvəsinə ucaldıb.
Xalqımız, dövlətimiz, ümumilikdə Azərbaycan adına qazanılan tariximizdəki bu ən möhtəşəm qələbələrin müəllifi isə Qalib Lider İlham Əliyevdir. Məhz Prezident İlham Əliyevin yürütdüyü müdrik siyasət, həyata keçirdiyi aktiv diplomatiya, atdığı məntiqli, əsaslandırılmış və düşünülmüş addımlar sayəsində milli maraqlarımız qətiyyətlə  təmin edilib. Azərbaycan işğal ölkəsindən zəfər ölkəsinə çevrilib, üçrəngli bayrağımız bütün torpaqlarımızda dalğalandırılıb, illər idi ki, Qarabağda qara yaraya çevrilmiş erməni separatizmi məhv edilib. 
2024-cü il fevralın 14-də keçirilən prezident seçkilərində Müzəffər Sərkərdə İlham Əliyev, öz təbirincə desək, Xankəndidə seçki qutusuna atdığı bülletenlə erməni separatçılarının tabutuna son mismarı vurub. Bütün bunlar isə, "Nəyi, necə, nə vaxt etmək lazımdır, bunu mən bilirəm. Yaxın tarix dəfələrlə bunu göstərib, həm siyasi müstəvidə, diplomatik müstəvidə, eyni zamanda döyüş meydanında. Nəyi ediriksə, dəqiqliklə edirik", - deyə bəyan edən Prezident İlham Əliyevin qarşısına qoyduğu milli məqsədlərə bir-bir çatmasının əyani təsdiqidir.  

 

Qətiyyətli siyasətin nəticəsi 

 

Prezident İlham Əliyevin ölkəmizlə bağlı əldə etdiyi bu misilsiz nailiyyətlər həm də Cənubi Qafqazda reallıqları tamamilə dəyişib, zamana uyğun yeni gerçəkliklər diktə edib. Bunlardan biri də Azərbaycan və Rusiya ali rəhbərliklərinin qərarı ilə Rusiya Federasiyasının sülhməramlı kontingentinin ölkəmizi zamanından əvvəl tərk etməsidir. Xatırladaq ki, 2020-ci il noyabrın 10-da Azərbaycan Prezidenti İlham Əliyev, Ermənistanın baş naziri Nikol Paşinyan və Rusiya Prezidenti Vladimir Putin tərəfindən üçtərəfli Bəyanat imzalanıb. Bəyanata əsasən bir vaxtlar erməni separatçılarının mövcud olduğu Qarabağda Rusiya Federasiyasının sülhməramlı kontingenti yerləşdirilmişdi. Həmçinin bəyanatda sülhməramlı kontingentin qalma müddətinin 5 il olduğu öz əksini tapmışdı. 
2023-cü ilin sentyabrında Azərbaycanın həyata keçirdiyi 23 saatlıq antiterror tədbirləri nəticəsində Qarabağdakı erməni separatçılarının mövcudluğuna son qoyuldu,  suverenliyimiz tam təmin edildi. Bununla həm faktiki olaraq Ermənistan tərəf kimi bu prosesdən tamamilə kənarda qaldı, həm də Rusiya sülhməramlılarının fəaliyyətinə  bölgədə ehtiyac qalmadı. Bu, rəsmi şəkildə də təsdiqini tapdı və vaxtından əvvəl Rusiya sülhməramlı kontingenti Azərbaycan ərazilərini tərk etməyə başladı. 
Xüsusi qeyd edək ki, Rusiya sülhməramlılarının ərazilərimizdən çıxarılmasında Prezident İlham Əliyevin şəxsi səyləri var. Hətta 10 noyabr Bəyanatında sülhməramlıların 2025-ci ilə qədər müvəqqəti olaraq yerləşdirilməsi maddəsinin əksini tapmasını məhz Prezident İlham Əliyev israr etmişdi. 
Sözügedən bəyanatda "müvəqqəti" şərtinin qoyulması və prosesin məntiqi sonluğuna çatdırılması dövlət başçısı İlham Əliyevin qətiyyətli siyasətinin nəticəsidir. 

 

Sülhməramlıların çıxarılması niyə ABŞ-ni qane etmir?!

 

Azərbaycan ilə Rusiya arasında olan münasibətlər sülhməramlıların ərazilərimizdən çıxarılmasından sonra daha da inkişaf edəcək. Artıq Qarabağ münaqişəsi həll olunub və bu vəziyyətdə həmin ərazidə qoşunlarını saxlamağın mənasız olduğunu Rusiya da anladığı üçün bu addım atıldı. Bu baxımdan artıq münasibətlərdən hərbi komponentin çıxarılması daha yaxşı əməkdaşlıq üçün imkanlar açır. İki ölkə liderinin şəxsi münasibətlərinin ölkələrarası əlaqələri gücləndirən xüsusi faktor olduğu da danılmaz gerçəklikdir. 
Ancaq Cənubi Qafqazda hadisələrin bu məcrada gedişi, sülhməramlıların ərazilərimizi tərk etməsi, konkret olaraq barış üçün bölgədə yaranan şərait başda ABŞ və Fransa olmaqla, Qərb dairələrini qane etmir. Bunu ABŞ Dövlət Departamentinin nümayəndəsinin sülhməramlıların çıxarılması ilə bağlı şərhində də aydın görmək mümkündür. Belə ki, Dövlət Departamentinin mətbuat katibinin müavini Vedant Patel Rusiya sülhməramlı kontingentinin "daha dinc və sabit Cənubi Qafqaz regionuna töhfə verdiyini göstərən heç nə görmədiklərini" deyərək, Rusiyanın "etibarsız müttəfiq olduğuna" vurğu edib. 
Gözlənildiyinin əksinə ABŞ-nin sülhməramlıların çıxarılmasını təqdir etmək əvəzinə, əks yöndə şərh etməsi Vaşinqtonun riyakarlığını bir daha ortaya qoyur. 
Təzada baxın, indiyədək dünyanın bütün bölgələrindən Rusiyanı sıxışdırmağa çalışan ABŞ Qarabağdakı sülhməramlıların Azərbaycandan çıxarılmasına əks mövqe ilə yanaşır. Məsələn: ABŞ dəfələrlə Rusiyanı Dnestryanı, Abxaziya və Cənubi Osetiyadan sülhməramlı kontingenti çıxarmağa çağırıb, 2022-ci ilin yanvarında KTMT qüvvələrinin Qazaxıstandan çıxarılmasını alqışlayıb, amma mövzu Azərbaycan olanda nədənsə ABŞ-dən eyni reaksiyanı görmürük... 
Hətta 2023-cü il sentyabrın 17-də İstanbulda Qarabağla bağlı gizli ABŞ-Rusiya-Aİ görüşünün timsalında ABŞ və Qərbin Azərbaycana qarşı hətta öz rəqibləri Rusiya ilə sövdələşməyə belə razı olduqları kimi riyakar və çirkin faktlar da var. 
Bütün bunlar onu göstərir ki, ABŞ, ümumilikdə isə qərəzli Qərb dairələri bölgədə münaqişənin başa çatmasını yox, əksinə, savaşın başlamasını istəyirlər. 
Lakin Azərbaycan öz milli maraqlarına təhdid olan bütün çirkin planları məhv etmək, məkrli ittifaqları darmadağın etmək gücündədir və bunu istər siyasi, istər diplomatik, istərsə də hərbi müstəvidə dəfələrlə sübut edib. 

Yasəmən MUSAYEVA, 
"Azərbaycan"

Digər Xəbərlər

QƏZETİN ÇAP VERSİYASI

XƏBƏR LENTİ Bütün xəbərlər

DİQQƏT ÇƏKƏNLƏR

ÇOX OXUNANLAR

OXUCU MƏKTUBLARI

NƏŞRLƏRİMİZ

BAŞ REDAKTORDAN

Hamımızın Azərbaycan adlı bir Vətəni var! Qoynunda dünyaya göz açdığımız, minbir nemətindən dadıb isti qucağında boya-başa çatdığımız bu əvəzolunmaz diyar azərbaycanlı adını qürur və iftixarla daşıyan hər kəs üçün müqəddəs və ülvidir.
Müzəffər Ali Baş Komandan İlham Əliyevin rəhbərliyi ilə Azərbaycan Ordusu Vətən müharibəsində zəfər çalaraq erməni işğalçılarını kapitulyasiyaya məcbur etdi, düşməni qovaraq ərazi bütövlüyünə nail oldu.
Bununla da Azərbaycan yeni inkişaf dövrünə qədəm qoydu.
Bu dövrdə dünyada mürəkkəb və ziddiyyətli proseslər davam etməkdədir!
Hələ də dünyada ədalətsizliklər mövcuddur!
Hələ də dünyada ikili standartlar var!
Hələ də dünyada güclülər zəiflərin haqqını tapdalamaq istəyir!
Odur ki, biz daima güclü olmalıyıq.
Güclü olmağın əsas şərti isə bizim birliyimizdir!
Dünyanın harasında yaşamağımızdan, hansı sahədə çalışmağımızdan asılı olmayaraq, əlbir və əlaqəli fəaliyyət göstərməyi bacarmalıyıq.
Azərbaycan naminə, onun dünyada yeri, yüksək nüfuzu uğrunda daim birlikdə mübarizə aparmalıyıq.
Yalnız bu halda anamız Azərbaycanı qoruya, yüksəldə və hamımız üçün qürur mənbəyinə çevirə bilərik.
Ulu yurdumuzun adını daşıyan "Azərbaycan" qəzeti də bu amala xidmət edir.
Əziz azərbaycanlılar! Sizi Azərbaycan naminə, övladlarımızın firavan və xoşbəxt gələcəyi uğrunda əlbir və əlaqəli fəaliyyətə çağırıram!

TƏQVİM / ARXİV

Video