Trans-Xəzər Beynəlxalq Nəqliyyat Dəhlizini (Orta dəhliz - red.) inkişaf etdirərək ölkələrimiz, əslində, qədim İpək yolunu yeni əsaslar üzərində dirçəldir.
AZƏRTAC xəbər verir ki, bunu Qazaxıstan Prezidenti Kasım-Jomart Tokayev "Mərkəzi Asiya - İtaliya" sammitində çıxışı zamanı bildirib.
"Ötən il bu dəhlizin Qazaxıstan ərazisindən keçən hissəsində konteyner daşımalarının həcmi 62 faiz artaraq 4,5 milyon ton təşkil edib. Üç il ərzində bu göstəricinin ikiqat artırılmasını hədəfləyirik", - deyə K.Tokayev bildirib.
Dövlət başçısının sözlərinə görə, Qazaxıstan Xəzər dənizi limanlarının modernləşdirilməsi və rəqəmsallaşdırılması, yük terminallarının tikintisi, nəqliyyat gəmilərinin birgə istehsalının təşkili istiqamətində sistemli addımlar atır.
"Bütün bunlar Trans-Xəzər dəhlizinin cəlbediciliyini artırır. Xüsusən nəzərə alaq ki, Çin ilə Avropa arasındakı quru yük daşımalarının 80 faizi Qazaxıstan ərazisindən keçir", - deyə K.Tokayev vurğulayıb. Qazaxıstan Prezidenti italiyalı tərəfdaşlarını dəhlizin inkişafında fəal iştirak etməyə dəvət edib və Orta dəhlizin Avropa nəqliyyat şəbəkəsinə və "Global Gateway" təşəbbüsünə inteqrasiyası məsələsində İtaliyanın dəstəyinə ümidvar olduğunu bildirib.
"Əminəm ki, birgə səylərlə Trans-Xəzər dəhlizini Xəzərdən Adriatikə qədər uzanan Asiya ilə Avropa arasında ən etibarlı və təhlükəsiz körpülərdən birinə çevirə bilərik", - deyə siyasətçi qeyd edib.
Orta dəhliz kimi tanınan Trans-Xəzər Beynəlxalq Nəqliyyat Dəhlizi Çin ilə Avropa ölkələrini Qazaxıstan, Xəzər dənizi, Azərbaycan, Gürcüstan və Türkiyə vasitəsilə birləşdirir.
jpg_1766066117.jpg)
