Ölkə problemlər içərisindədir, baş nazir isə 2 milyon dollarlıq saat taxır
Məğlub Ermənistanı idarə edən şəxslər ölkədə korrupsiya və rüşvət sistemini daim genişləndirmələri ilə də seçilirlər. Bu xüsusda erməni mediasında kifayət qədər maraqlı məlumatlar yer alıb və indiki baş nazir Nikol Paşinyanın əməllərinə xüsusi diqqət yetirilir. Məsələn, qeyd olunur ki, 5 il bundan əvvəl heç nəyi olmayan Nikol Paşinyan və ailəsi ötən müddət ərzində Ermənistanda ən varlı insanlara çevriliblər.
Postmüharibə dövründə əhalinin gəlirlərinin azalmasına, iş yerlərində ixtisarlara və müəssisələrin bağlanmasına baxmayaraq, bu, baş nazirin rifahına təsir etməyib.
"4rd.am" nəşri yazır ki, Rusiyaya qarşı çıxaraq Qərbin kölgəsində gizlənən Paşinyanın ölkənin ən kasıb baş naziri sayıldığı günlər keçdi. 2018-ci ilin yazında o, Ermənistanın yüksək vəzifəli rəsmilərinin etika komitəsinə bir bəyannamə təqdim edib - bir il üçün qazancı təqribən 16 min dollardır, eyni zamanda bu məbləğin 12 min dolları deputat maaşı hesab olunur: "Məlum oldu ki, Paşinyan və həyat yoldaşının xarici aktivləri, bank hesabları və ya qiymətli kağızları yoxdur. Bununla yanaşı, Ermənistan hökumətinin başçısı heç bir daşınmaz əmlaka sahib deyil. Ermənistanın birinci xanımı Anna Hakopyanın 2018-ci ilin əvvəlində vergi vəsaiti 1000 dollar təşkil edib və ilin sonuna qədər bu məbləğ dəyişməyib".
Qeyd olunur ki, bir vaxtlar "korrupsiyaya bulaşsam, Ermənistan vətəndaşlarını məni meydanda asmağa çağırıram", - deyən Paşinyanın ailəsinin ABŞ-də malikanə alması ilə bağlı məlumatlar yayılıb: "Baş nazirin tərəfdarları bunun qarayaxma kampaniyası olduğunu deyirlər. Lakin biz də Ermənistandakı korrupsiya və yoxsulluğa qarşı mübarizə aparan Nikol Paşinyanın taxdığı 2 milyon dollara "Patek Phillippe" saatının fotosuna baxaraq gözlərimizə inanırıq".
Son günlərdə diqqət mərkəzində olan məsələlərdən biri də Paşinyanın komandasının dövlət büdcəsinə mütəmadi olaraq vurduğu ziyandır. Belə ki, yeni yaradılmış Ermənistan Xarici Kəşfiyyat Xidmətinin rəhbəri Kristine Qriqoryan vəzifəyə gəldikdən sonra mütəmadi olaraq layihələrini təsdiq üçün hökumətə təqdim edir.
Qeyd edilib ki, bununla Qriqoryan büdcədən yalnız xidmət işçiləri üçün və ya xidmətin ehtiyaclarını ödəmək üçün əlavə pul tələb edir. Məsələn, Xarici Kəşfiyyat Xidməti sahəsində təcrübəsi sıfır olan Qriqoryan dərhal hökumətin təsdiqinə təqdim edilən layihələrdən birincisi ilə tələb edib ki, xidmət işçilərinin mükafatlandırma fondu artırılsın. Hətta əsaslandırmayıb ki, hansı nəticəyə görə xidmət işçilərinə belə bir imtiyaz verilməlidir? Onun tələbi yerinə yetirilib və Xarici Kəşfiyyat Xidmətinin əməkdaşlarının mükafatı maaşın 10 faizi həcmində deyil, daha çox olacaq. Lakin Qriqoryan bununla kifayətlənməyib və hökumətin noyabrın 23-də keçirilən iclasının açıqlanmayan məsələlərindən biri ilə yenidən pul, bu dəfə hökumətin ehtiyat fondundan 8,5 milyon dram tələb edib. Layihəyə əsasən, Xarici Kəşfiyyat Xidmətinin cari fəaliyyətini təmin etmək məqsədilə 2023-cü il dövlət büdcəsində nəzərdə tutulmayan və prioritet hesab edilən xərclərin maliyyələşdirilməsi üçün həmin məbləğə ehtiyac var. Yenə də bunların hansı prioritet xərclər olduğu layihədə qeyd olunmayıb.
Bunların fonunda bütün sferalarda yaranan və gündən-günə dərinləşməkdə olan problemlərdən yaxın perspektivdə xilas üçün əhalidə heç bir ümid yoxdur. Bunu şərtləndirən əsas səbəblərdən biri kimi, baş nazir seçildikdən sonra verdiyi bütün vədlərə əməl etməyən Nikol Paşinyan iqtidarının konkret plan və proqramlara malik olmamasıdır. Digər səbəbi isə hakimiyyətdə yer alan bəzi vəzifəli şəxslərin səlahiyyətlərindən sui-istifadə edərək, korrupsiya və rüşvətxorluqla məşğul olmalarıdır.
Elçin CƏFƏROV,
"Azərbaycan"
