Ermənistanın baş naziri Nikol Paşinyan populist çıxışlarına davam edir. Manipulyasiyalarla beynəlxalq ictimaiyyəti çaşdırmağa çalışan, guya sülh tərəfdarı olduğunu və bu istiqamətdə "səy" göstərdiyini nümayiş etdirən baş nazir, əslində, xalqının hazır olmadığı sülhə, referenduma təsir edə bilmədiyini görür. Ona görə də belə çıxışlarda yenidən "sülh göyərçini"nə çevrilir.
Sosial Tədqiqatlar Mərkəzinin əməkdaşı Aqşin Kərimov "Azərbaycan" qəzetinə açıqlamasında bildirib ki, Ermənistanın baş naziri Nikol Paşinyan ölkəsinin qəbul etməli olduğu yeni siyasət və prioritetləri təsvir edir. O, əvvəlki illərdəkindən fərqli olaraq görünməmiş istiqamətlər ortaya qoymağa çalışır. "Paşinyan sülh gündəliyi üzrə Azərbaycanın tələb və şərtlərindəki bəzi məsələləri Ermənistan ictimaiyyəti üçün strukturlaşdırır. Lakin bunun situativ olduğu, Ermənistanın hər fürsətdə Azərbaycana qarşı revanş götürməsi ehtimalları rəsmi Bakını son dərəcə güclü xarici və müdafiə siyasətini izləməyə məcbur edir. Bu baxımdan Paşinyanın çıxışları və sülh tezisləri onun daxili vəziyyəti, regional və beynəlxalq situasiyalarla Azərbaycanın gündəmi arasında tərəddüdlər kimi şərh oluna bilər", - deyə ekspert bildirib.
O qeyd edib ki, Azərbaycan bu tərəddüdləri öz maraqlarına uyğun şəkildə yönləndirir. Paşinyanın bu məsələni Ermənistana dəstək olan dövlətlərin ambisiyalarına inteqrasiya etmək istəməsi bu ölkə üçün təhlükəli perspektiv yaradır. Paşinyan bunu bildiyindən Azərbaycanın sülh proqramındakı ştrixlərinə yaxın mövqelər səsləndirir. Digər tərəfdən isə baş nazir ölkədaxili hərəkatla üzləşmək, hakimiyyətinə təhlükələr yaranması risklərinə qarşı gediş edir. Bu gedişdə Paşinyanın öz hakimiyyətinin qorunması üçün Azərbaycandan təminatlar almaq istəkləri yer tuta bilər. Ehtimal ki, o, bu istəklərini Azərbaycandan verilən sülh və təhlükəsizlik siqnalları ilə sinxronlaşdıran məqama diqqət yetirir.
A.Kərimov vurğulayıb ki, hələlik Paşinyanın hakimiyyətdə olması Azərbaycan üçün məqbuldur: "Ancaq Azərbaycan sürprizlərə qarşı da strategiyasını formalaşdırır. Bu o deməkdir ki, Ermənistanda kimin hakimiyyətə gəlməsindən asılı olmayaraq, yeni iqtidar Azərbaycanın qələbəsini geri oxuda bilməyəcək. Azərbaycan bunun hüquqi bazalarını Paşinyan hakimiyyəti vaxtında formalaşdırır. Beləliklə, Azərbaycan Ermənistanın siyasi və təhlükəsizlik sektorlarına nüfuz edərək qəfil proseslərdəki manevr imkanlarını artırmış olur".
Ə.QARDAŞXANOVA,
"Azərbaycan"
