Ukrayna üçün təhlükəsizlik zəmanətləri hazırlanır
Parisdə 30-dan çox ölkənin daxil olduğu “İstəklilər koalisiyası”nın iclası keçirilib. Avropa Komissiyasının rəhbəri Ursula fon der Lyayen, Avropa İttifaqı Şurasının prezidenti Antonio Kosta, həmçinin Finlandiya prezidenti, Böyük Britaniya, Belçika, Danimarka, Niderland və Polşanın baş nazirləri Fransanın paytaxtına gəliblər. Koalisiyanın qalan üzvləri videobağlantı vasitəsilə iclasa qoşulublar. Görüşdə Ukrayna lideri Volodimir Zelenski və ABŞ prezidentinin xüsusi nümayəndəsi Stiv Uitkoff şəxsən iştirak ediblər.
İspaniyanın Baş naziri Pedro Sançes təyyarədəki nasazlıq səbəbindən Fransa paytaxtına gəlməyib.
İclasda NATO-nun baş katibi Mark Rutte və Avropa və digər qitələrdən iyirmiyə yaxın dövlətin rəhbərləri, o cümlədən Kanadanın Baş naziri Mark Karni, Yaponiyanın Baş naziri Şiqeru İşiba, Avstraliyanın Baş naziri Entoni Albanese, həmçinin Yeni Zelandiyanın Baş naziri Kristofer Lakson onlayn iştirak ediblər.
Sammitdən əvvəl Fransa Prezidenti Emmanuel Makron Zelenski ilə görüşüb və Ukrayna üçün təhlükəsizlik zəmanətlərinin hazırlanmasının tamamlandığını bildirib.
Makronun dediyinə görə, “İstəklilər koalisiyası”na daxil olan dövlətlərdən 26-sı atəşkəs və ya tamhüquqlu nizamlanma əldə edildikdən sonra Ukraynaya hərbi kontingentin göndərilməsində iştirak etməyə hazır olduqlarını təsdiqləyib.
"Münaqişənin bitdiyi gün təhlükəsizlik zəmanətləri qüvvəyə minəcək", - Fransa Prezidenti bir daha əmin edib.
O əlavə edib ki, “daha bir neçə ölkə öz mövqeyini nəzərdən keçirməkdə davam edir”. Belə ki, alman rəsmiləri Bundesverin belə bir əməliyyat keçirə biləcəyinə şübhə ilə yanaşıblar. Eyni zamanda, İtaliya və Polşa artıq birmənalı olaraq qoşun göndərilməsinin əleyhinə çıxış ediblər.
Almaniyanın “Der Spiegel” qəzeti yazır ki, hərbi kontingentin göndərilməsi barədə qərar qəbul olunarsa, “İstəklilər koalisiyası”nın masada üç variantı olacaq. Birincisi, sülh sazişinə əməl etmək üçün monitorinq missiyasının tətbiqi. Lakin Kiyev bu perspektivə o qədər də həvəsli deyil, çünki müşahidəçilər mümkün hərbi əməliyyatlarda iştirak edə bilməyəcəklər. Həddindən artıq yüksək xərclər və Ukraynada Qərb qoşunlarının olmasına qarşı olan Rusiya Federasiyasının mövqeyi səbəbindən tamhüquqlu kontingentin tətbiqi son vaxtlar qeyri-real hesab olunur.
KİV-in fikrincə, ən çox ehtimal olunan ssenari Ukrayna ərazisində Qərb təlimatçılarının ukraynalı əsgərlərə təlim keçməsidir. Aİ və Böyük Britaniya hazırda öz ərazilərində ukraynalı əsgərlərə təlim keçmək üçün ayrı-ayrılıqda əməliyyatlar keçirir.
Paris görüşünün iştirakçıları ABŞ Prezidenti Donald Trampa zəng edib, o, söhbət zamanı Avropanın Rusiya neftini almaqda davam etməsindən narazılığını bildirib , həm də bununla bağlı Çinə təzyiq etməyə çağırıb.
Eyni zamanda Trampın xüsusi nümayəndəsi Stiv Uitkoff Avropa ölkələrini Rusiya neftini Hindistan vasitəsilə almağa davam etdiklərinə görə qınayıb.
CNN telekanalının xəbərinə görə, ABŞ Kiyevə təhlükəsizlik zəmanətinin verilməsində iştirak edəcək.
Ukrayna Prezidentinin Aparatının rəhbəri Andriy Yermak görüş barədə məlumat yayıb: "Əsas vəzifə Ukrayna üçün təhlükəsizlik təminatları ilə bağlı dövlət başçılarının razılaşmalarının əməli şəkildə həyata keçirilməsidir. Onlar səmada, dənizdə və quruda, eləcə də kiberməkanda güclü və təsirli olmalıdır. Biz həmçinin sanksiyalar təzyiqinin gücləndirilməsini, Rusiya tərəfindən oğurlanmış ukraynalı məhbusların və uşaqların geri qaytarılmasını müzakirə etdik".
Xatırladaq ki, bu günlərdə Çinə səfəri zamanı Vladimir Putin “əgər Ukrayna böhranı sülh yolu ilə həll edilə bilməzsə, Rusiya qarşıya qoyulan bütün vəzifələri güc yolu ilə həll etməyə hazırdır”,- deyə vurğulayıb. O qeyd edib ki, Rusiya Silahlı Qüvvələri bütün istiqamətlərdə uğurla irəliləyir, Ukrayna Ordusu isə genişmiqyaslı əməliyyatlar keçirə bilmir və ancaq sərhədlərini saxlamağa çalışır.
Son məlumata görə, Vladivostokda Şərq İqtisadi Forumunun plenar iclasındakı çıxışından sonra Vladimir Putin yenidən Ukraynadakı müharibədən danışıb və
bir daha bəyan edib ki, Volodimir Zelenski ilə birbaşa təmaslarda o qədər də məna görmür, lakin onlara hazırdır. Rusiya prezidentinin fikrincə, belə bir görüşü keçirmək üçün ən yaxşı yer Moskva olardı.
"Dedim ki, mən çox məna görmürəm. Niyə? Çünki əsas məsələlərdə Ukrayna tərəfi ilə razılaşmaq praktiki olaraq mümkün olmayacaq", - Putin bildirib.
Məsələn, onun sözlərinə görə, ərazilərlə bağlı müqavilələrin bağlanmasında hüquqi və texniki çətinliklər var.
Putin bildirib ki, bu cür razılaşmalar referendumda təsdiqlənməlidir, lakin bunun üçün Ukraynada hərbi vəziyyətin aradan qaldırılması lazımdır.
Rizvan CƏFƏROV,
“Azərbaycan”
