Papa XIV Leonun sentyabrın sonunda Fransaya səfəri zamanı təhlükəsizliyin təmin olunması üçün 15 min polis, jandarm, mobil qüvvə əməkdaşı və “Sentinelle” əməliyyatında iştirak edən hərbçi cəlb ediləcək. Hazırda səfərə qarşı konkret terror təhlükəsi müəyyən edilməyib.
AZƏRTAC xəbər verir ki, Fransanın daxili işlər naziri Loran Nünez Papa XIV Leonun səfəri ilə əlaqədar müstəsna təhlükəsizlik tədbirləri görüləcəyini açıqlayıb.
Təhlükəsizlik qüvvələrinin sayı sentyabrın 25-26-da maksimuma çatacaq. Təxminən 14 min əməkdaş Parisdə, daha 1000 nəfər isə Lurdda xidmət aparacaq. Papa papamobillə hərəkət edərkən onun ətrafında piyadalarla hərəkət edən polis əməkdaşlarından ibarət xüsusi mühafizə halqası yaradılacaq. Onların əsas vəzifəsi izdiham arasında şübhəli və qeyri-adi hərəkətləri vaxtında aşkar etmək olacaq.
Səfər çərçivəsində kütləvi tədbirlərin miqyası təhlükəsizlik baxımından xüsusi diqqət tələb edir. “Stade de France” stadionunda keçiriləcək gecə mərasimində təxminən 80 min nəfərin, ertəsi gün isə Konkord meydanı – Yelisey çölləri prospektindəki messada 500 min insanın iştirakı gözlənilir.
Lurddakı ziyarətgahın 150 minə yaxın insanı qəbul edəcəyi, Metzdə isə katedralın ətrafına on minlərlə şəxsin toplaşacağı bildirilir.
Loran Nünez bildirib ki, kəşfiyyat xidmətləri hazırda Papanın səfərinə qarşı konkret terror təhdidi müəyyən etməyib. Eyni zamanda, ifrat sol və ya ifrat sağ qruplardan zorakılıq təhlükəsi, eləcə də Papanın və Katolik Kilsəsinin mövqelərinə etiraz məqsədilə planlaşdırılan xüsusi aksiyalar barədə məlumat aşkarlanmayıb.
