Obyektiv tənqidə subyektiv münasibət

Xatırladaq ki, qəzetimizin 2023-cü il 18 avqust tarixli sayında "Gözəlliyi gözdən salmayın" başlıqlı məqalə dərc olunmuşdur. Məqalədə Azərbaycan təbiətinin incilərindən olan Göygöl gölü ərazisindəki bəzi çatışmazlıqlardan, ziyarətçiləri razı salmayan nöqsanlardan bəhs edilmişdir.
Bu günlər, daha dəqiq desək,  2023-cü il noyabrın 13-də sözügedən məqalə ilə bağlı Ekologiya və Təbii Sərvətlər Nazirliyindən redaksiyamıza məktub daxil olmuşdur. Nazir müavini  Umayra Tağıyevanın imzaladığı məktubda bildirilir:
"Sizin təbiət ərazilərinə həssas münasibətinizi yüksək qiymətləndirir və göstərdiyiniz vətəndaş mövqeyinizə görə təşəkkür edirik.
Bildiririk ki, "Azərbaycan" qəzetinin 2023-cü il 18 avqust tarixli sayında dərc edilmiş "Gözəlliyi gözdən salmayın" sərlövhəli məqalədə göstərilənlər 10 saylı Regional Ekologiya və Təbii Sərvətlər İdarəsinin əməkdaşları tərəfindən nazirliyin Bioloji Müxtəlifliyin Qorunması Xidmətinin və Göygöl Milli Parkının mütəxəssislərinin iştirakı ilə yerində araşdırılmışdır. 
Göygöl Milli Parkının ərazisindəki yolların təmir edilməməsi, işıqlandırma sisteminin olmaması və buraxılış məntəqəsi barədə yazılanlar araşdırılarkən məlum olmuşdur ki, park ərazisində nəqliyyat vasitələrinin hərəkəti və turistlər üçün nəzərdə tutulmuş yollara asfalt, o cümlədən daş örtük çəkilmiş, park ərazisində işıqlandırma sistemi qənaətbəxş quraşdırılmışdır. Parkın buraxılış məntəqəsində isə əraziyə gələn turistlərin qeydiyyatı aparılır.
Göygöl gölünün kənarında cəngəlliyi xatırladan qamışlıq barədə yazılanlarla bağlı bildiririk ki, gölün kənarındakı cəngəlliyi xatırladan qamış bitkisindən ibarət ərazi təbii formalaşmış landşaftın tərkibinə aiddir.
Göygöl gölündə vaxtilə istifadə edilmiş, indi isə yararsız hala düşmüş qayıqlar barədə yazılanlar araşdırılarkən Milli Parkın balansında olmayan həmin qayıqların nazirliyin Nəqliyyat İdarəsinə təhvil verildiyi müəyyən edilmişdir.
Parkın ərazisində sanitar qovşağın olmaması barədə yazılanlarla bağlı bildiririk ki, parkda  6 yerdə sanitar qovşaq mövcuddur, onlardan 5-i hazırda işlək vəziyyətdədir. Bir sanitar qovşaq isə təmirlə əlaqədar fəaliyyət göstərmir və sanitar qovşaqlarda formalaşan tullantı suları ayrı-ayrılıqda  tikilmiş germetik beton şambolara axıdılır.
Turistlərin daşınmasında nəqliyyat probleminin olması barədə yazılanlar araşdırılarkən Azərbaycan Respublikası Nazirlər Kabinetinin 21.04.2015-ci il tarixli 114 saylı qərarına uyğun olaraq Göygöl-Maralgöl istiqamətində sərnişinlərin daşınması üçün Göygöl Milli Parkı ilə bağlanmış müqavilə əsasında 4 nəqliyyat vasitəsinin xidmət göstərdiyi müəyyən edilmişdir.
Parkın ərazisində olan iaşə obyektlərində xidmətin qənaətbəxş təşkil edilməməsi barədə yazılanlarla bağlı bildiririk ki, park ərazisinə gələn turistlərə xidmət göstərilməsi məqsədilə 5 iaşə təyinatlı köşk mövcuddur və köşklərdə fəaliyyət müqavilə şərtlərinə uyğun həyata keçirilir. Bundan əlavə, Göygöl gölünün yerləşdiyi 50 hektar ərazi 2019-cu ildən etibarən "Göygöl Lake Resort" MMC-yə istifadəyə verilib və iaşə xidmətləri MMC tərəfindən göstərilir. Turistlərin gölün kənarına daşınması turistlərin istəyi müqabilində həmin MMC-yə məxsus "Niva" markalı nəqliyyat vasitəsilə ödənişli  əsaslarla həyata keçirilir.
Araşdırma zamanı Göygöl Milli Parkının ərazisində ətraf mühitin mühafizəsi qanunvericiliyin tələblərinin pozulması faktlarına rast gəlinməyib. Xidmət keyfiyyətinin yüksək səviyyədə saxlanılması, ziyarətçi məmnunluğunun yüksəldilməsi, ərazidəki müqavilə əsasında fəaliyyət göstərən subyektlərə mütəmadi nəzarətin həyata keçirilməsi üçün park rəhbərliyinə xəbərdarlıq olunub.
Redaksiyadan: Göründüyü kimi, nazirliyin cavab məktubunda əməkdaşımızın Göygöl gölü ərazisində görüb qələmə aldığı nöqsanlar hamısı bir-bir, bənd-bənd təkzib edilir. Bu təkzibləri təkzib etməzdən öncə nazirliyin adıçəkilən məqaləyə, hətta təxminən 3 ay sonra olsa belə, cavab verməsini (hər halda 2023-cü il oktyabrın 10-da imzalanmış məktub redaksiyamıza noyabrın 13-də daxil olmuşdur) rəsmi dövlət qəzetinə hörmət və ehtiram kimi qəbul etdiyimizi nəzərə çatdırırıq. Bu ondan xəbər verir ki, Ekologiya və Təbii Sərvətlər Nazirliyi ölkəmizdə ətraf mühitin qorunması üçün  daxili mənbələrinin məlumatlarından savayı, KİV-də yayılan faktlara da biganə qalmır. Media qurumu olaraq biz də bundan məmnunuq.
O ki qaldı "Gözəlliyi gözdən salmayın" məqaləsindəki faktların təkzib olunmasına, bu, yumşaq desək, günəşi danmağa bənzəyir. Əvvəla ona görə ki, məqalədə qeyd edilən faktlar əməkdaşımızın gözü ilə gördükləri, qulağı ilə eşitdikləridir. Üstəlik, o, gördüklərini fotokamerasına köçürüb və həmin şəkillər qəzetimizdə dərc edilib. Fotofaktları isə təkzib etmək mümkün deyil. İkincisi də, bu nöqsanları görən, onun çətinliklərini yaşayan təkcə əməkdaşımız deyil. Bir biləydiniz məqalənin dərcindən sonra redaksiyamıza, yazının müəllifinə olunan çoxsaylı zənglərdə Göygölə yolu düşənlər nələr deyirdilər. Belə görünürdü ki, biz hələ ərazidəki mövcud nöqsanların, şair demişkən, heç dörddə-birini yazmamışıq.
Qınanılası deyildilər. Yüz kilometrlərlə yol qət edib təbiətin Göygöl kimi  möcüzəsini görmək istəyən yerli və ya xarici ziyarətçinin nə marağına ki, göldəki qayıqlar hansı idarənin balansındadır. O istəyir ki, qayıqda gölü gəzsin, əlini onun suyuna toxundurub ləzzətini alsın. Yaxud ziyarətçinin nə işinə ki, Göygöl gölünün yerləşdiyi 50 hektar ərazi nə vaxtdansa hansısa MMC-yə istifadəyə verilib və ərazidəki iaşə xidmətlərini də həmin MMC göstərir. Heç  gölün ərazisində  aşağı-yuxarı müştəri daşıyan avtomobilin də həmin MMC-yə məxsus olması qonaqları, türklər demiş,  ilgiləndirmir. 
Bəs biz nə yazmışdıq? Yazmışdıq ki, gölün sahilindəki kafedə bir-iki stəkan  sadə çay içmək qonaqlara 5 manata başa gəlir. Əgər sanitar qovşaqlıq işin olsa, ərazidə tapmayacaqsan və məcbur olub 300-400 metrlik sərt yoxuşu piyada qalxmalı olacaqsan. Bunun üçün fiziki imkanın yoxdursa, yenə bir o qədər pulundan keçib MMC-nin avtomobilindən istifadə edəcəksən. Nazirliyin cavabında dolayısı yolla bütün bunlar təsdiqlənmirmi?! Elə isə bunun nəyi təkzib oldu?
Biz hələ cavab məktubunda gölün kənarında cəngəlliyi xatırladan qamışlığın təbii formalaşmış landşaftın tərkibinə aid olduğunu bildirildiyinin üstünə getmirik. Bircə onu deyirik ki,  Göygöl kimi qonaq-qaralı ərazidə təbii landşafta da nəzarət olunmalı, lazım gələrsə, əl gəzdirilməlidir, ən azından, cəngəlliyə çevrilməməsi üçün. Yeri gəlmişkən qeyd edək ki, məmur ekoloqlar bunu yaxşı bacarırlar. Uzağa getməyək, elə adıçəkilən məqalədə yazıldığı kimi, Hacıkənd-Göygöl yolu üstündə çox təbii landşaftlar məhv edilərək yerində kababxanalar tikilib, təbii ki, məmur ekoloqların "xeyir-dua"sı ilə. Amma nədənsə, nazirliyin cavab məktubunda həmin fakt təkzib olunmayıb. Buna da şükür.
Nəhayət, sözümüzün canı, istədiyimizin mayası odur ki, hansısa kütləvi informasiya vasitəsi düzgün, qərəzsiz tənqid verirsə, ona obyektiv yanaşılsın, 3 aydan sonra subyektiv təkzib vermək əzəvinə, göstərilən nöqsanların aradan qaldırılması üçün operativ tədbirlər görülsün.