Misli Premyer Liqasının XV turu “Araz-Naxçıvan” və “Neftçi klubları üçün əlamətdar olub.
AZƏRTAC Peşəkar Futbol Liqasının rəsmi saytına istinadən xəbər verir ki, “Araz-Naxçıvan” Azərbaycan çempionatlarında 30-cu qələbəsini qazanıb. Elmar Baxşıyevin baş məşqçi olduğu komanda öz meydanında “Turan Tovuz”a 1:0 hesabı ilə qalib gəlib.
Naxçıvan təmsilçisi 30-cu qələbəsini 93-cü oyunda əldə edib. Bu qələbələrdən 19-u evdə, 11-i səfərdə qazanılıb.
“Araz-Naxçıvan”ın ilk uğuru 2000/2001-ci illər mövsümünə təsadüf edib. Muxtar Respublikanın təmsilçisi 2000-ci il avqustun 20-də səfərdə Quba “Şahdağ”ına 1:0 hesabı ilə qalib gəlib. Bununla da Naxçıvan klubu ölkə çempionatlarında 30 və daha çox qələbə qazanan 33-cü komanda olub.
“Neftçi” isə Azərbaycan çempionatlarında 20-ci dəfə böyük hesabla məğlub olub. “Ağ-qaralar” öz meydanında “Qarabağ”la görüşüb. Meydan sahibləri 0:3 hesabı ilə uduzublar. 1992-ci ildən ölkə çempionatlarının daimi iştirakçısı olan “Neftçi” 6 dəfə evdə, 14 dəfə səfərdə üç və ya daha çox top fərqi ilə uduzub. İlk belə məğlubiyyət 1992-ci il mövsümündə Sumqayıt “Xəzər”i ilə səfər matçına təsadüf edib – 0:3.
Bundan başqa “Zirə”nin futbolçusu Davit Volkov Azərbaycan çempionatlarında 50-ci qolunu vurub. O, XV turun “Sumqayıt”la görüşündə (4:1) het-trikə imza atıb. Futbolçunun matçdakı son topu yubiley – 50-ci olub.
Gürcüstanlı hücumçu buna Premyer Liqadakı 163-cü görüşündə çatıb. Volkov Azərbaycanda üç klubda forma geyinib. O, “Zirə”də 27, “Sabah”da 16, “Qəbələ”də 7 qola imza atıb. Bu nəticədən sonra forvard Azərbaycan çempionatları tarixində 50 və daha çox qol vuran 41-ci futbolçu olub.
XV tur daha bir legioner baş məşqçinin debütü ilə əlamətdar olub. Vasili Berezutski “Sabah”da debüt edib. Rusiyalı mütəxəssisin baş məşqçisi olduğu komanda “Səbail”ə 1:0 hesabı ilə qalib gəlib.
Berezutski Azərbaycan çempionatları tarixində 65-ci legioner baş məşqçi olub. Onadək 64 əcnəbi baş məşqçi və ya bu vəzifənin müvəqqəti icraçısı kimi komandasını meydana çıxarıb.
Berezutski Premyer Liqada 5-ci rusiyalı baş məşqçidir. Ona qədər Sergey Yuran “Simurq”da, Yuri Syomin “Qəbələ”də, Murad Musayev “Sabah”da çalışıbsa, Kurban Berdıyev hazırda “Turan Tovuz”a rəhbərlik edir.
19 (1)jpg_1771885865.jpg)
jpeg_1772484113.jpeg)
