Məlum olduğu kimi, Prezident Donald Tramp ABŞ-nin müstəqilliyinin 250 illiyini qeyd etmək üçün planlaşdırılan şənliklərə paytaxtdakı Milli Xiyabanda keçirilən mitinqlə başlayıb.Tədbirdə hərbi təyyarələrin uçuşu, hərbi orkestrlərin çıxışı və prezidentin nitqi yer alıb.
"Bu gecə, müstəqilliyimizin 250 illiyinin astanasında dayanarkən bunu elan etməkdən məmnunam: Amerika geri döndü", - deyə Tramp mitinqdə bildirib.
ABŞ-nin əsasını qoyan sənəd - İstiqlal Bəyannaməsi 1776-cı ildə qəbul edildikdən bir neçə gün sonra Filadelfiyada ucadan oxunub. O vaxtdan bəri amerikalılar 4 iyulu ölkələrinin və ideallarının günü kimi qeyd edirlər.
Təxminən bir əsr əvvəl 4 iyul federal bayrama çevrilib. Amerikalı işçilərin əksəriyyəti bu günü ailə görüşləri, yerli paradlar, ziyafət məclisləri və atəşfəşanlıqla keçirərək istirahət edirlər.
Bu il ABŞ ölkənin 250 illiyini layiqincə qeyd etmək üçün rekord qıran atəşfəşanlıq və ölkə daxilində müxtəlif ölçülü tədbirlər keçirməklə möhtəşəm bir məclis planlaşdırır. İstiqlal Bəyannaməsinin orijinalı Vaşinqtondakı Milli Arxivdə saxlanılır və builki Müstəqillik Günündə binanın pilləkənlərində izdihama ucadan oxunacaq. Vaşinqtonda keçiriləcək tədbirlərdə atəşfəşanlıq da olacaq. Budəfəki tədbirin raketlərin sayına görə yeni rekord vuracağı və şəhərin ilk ABŞ prezidentlərinə və müharibə veteranlarına həsr olunmuş mərmər abidələrinin üzərindəki gecə səmasını işıqlandıracağı gözlənilir.
Ölkə bu il 250 illik yubileyini qeyd etdiyi üçün tədbirlər 4 iyuldan sonra da davam edəcək. Milli Xiyaban Amerika mətbəxini və mədəniyyətini nümayiş etdirəcək "Böyük Amerika dövlət sərgisi" ilə canlandırılacaq. Sərgidə Alyaskadan buz heykəlləri, Havaydan hula rəqsi və Men ştatından xərçəng ruletləri da daxil olmaqla ABŞ-nin 50 ştatını təmsil edən xüsusi ekspozisiyalar nümayiş etdiriləcək. Həmçinin ABŞ Botanika Bağında bütün 50 ştatdan gətirilən güllər sərgilənəcək. Bunlardan əlavə, ölkə daxilində məktəb nəfəsli orkestrlərinin, yerli siyasətçilərin və yerli icmalar tərəfindən yaradılan platformaların paradları insanları küçələrə çıxaracaq. Digər bayram tədbirləri müxtəlif turnirlərindən tutmuş sərgilərə, canlı konsertlərdən tarix seminarlarına qədər həm yeni, həm də köhnə Amerika mədəniyyətini əhatə edəcək.
Yubiley çərçivəsində əsas tədbirlər Vaşinqtonda kulminasiya nöqtəsinə çatacaq. Proqrama rekord sayda atəşfəşanlıq nümayişləri, möhtəşəm dövlət yarmarkaları, musiqi festivalları və xüsusi idman yarışları daxildir.
Bir sözlə, ABŞ-nin 250 illik yubileyi amerikalılar üçün əylənmək və ölkənin təməlini qoyan prinsiplər və onların davamlı dəyəri üzərində düşünmək üçün bir fürsət olacaq.
Rizvan HİLALOĞLU,
"Azərbaycan"
