Prezident İlham Əliyevin və Birinci vitse-prezident Mehriban Əliyevanın avqustun 11-də Naxçıvana səfəri çərçivəsində bir sıra mühüm sosial obyektlərin açılışlarında və təməlqoyma mərasimində iştirak etmələri ölkə rəhbərliyinin muxtar respublikanın sosial-iqtisadi inkişafını hər zaman diqqətdə saxladığının bariz nümunəsidir. Naxçıvanda həyata keçirilən irimiqyaslı layihələrin, eləcə də bu istiqamətdə işlərin gələcəkdə də davam etdirilməsinin nəzərdə tutulması Naxçıvanın sosial-iqtisadi inkişafını sürətləndirəcək və naxçıvanlıların sosial rifahının yüksəldilməsinə böyük təkan verəcək.
Bakı Dövlət Universitetinin kafedra müdiri, professor Kamilə ƏLİYEVA qəzetimizə açıqlamasında deyib ki, Prezident İlham Əliyevin Sərəncamına əsasən Naxçıvanın enerji, nəqliyyat, təhsil və bir çox sahələrinin inkişafına maliyyə vəsaitinin ayrılması muxtar respublikanın regionun geoiqtisadi mərkəzinə çevrilməsinə yönəlmiş bir addımdır: “Dövlət başçısı Naxçıvana səfəri çərçivəsində Azərbaycan Televiziyasına verdiyi müsahibəsində Naxçıvanın Azərbaycanla yanaşı regionun nəqliyyat mərkəzinə çevriləcəyini xüsusi vurğuladı. Coğrafi cəhətdən Azərbaycanın əsas hissəsi ilə quru əlaqəsinin olmaması muxtar respublikanın təhlükəsizliyini ön plana çıxarır. Ölkə başçımızın Əlahiddə Ordunun yaradılmasını, yeni komanda qüvvələrinin formalaşdırılmasını və ən müasir hərbi texnika ilə təmin edilməsini xüsusi vurğulaması isə göstərir ki, Naxçıvanın müdafiə qabiliyyəti dövlətimizin strategiyasının fundamental istiqamətlərindən biri olaraq qalır. Prezident Naxçıvanın hərbi təhlükəsizliyi ilə yanaşı, enerji təhlükəsizliyinin də təmin olunmasının olduqca vacib bir amil olmasını da xüsusi vurğuladı”.
Ekspert qeyd edib ki, muxtar respublikada Sənaye Parkının yaradılması və onun tərkibində 300 meqavat gücündə İstilik Elektrik Stansiyasının inşası barədə qərar olduqca önəmli bir addımdır. Naxçıvanda bərpaolunan enerji sahəsində böyük layihələr reallaşdırılıb. Belə ki, inşa edilmiş Günəş Elektrik Stansiyasının gücünün ən azı 500 meqavat, gələcəkdə isə 1000 meqavata çatdırılması “yaşıl enerji” siyasətinin uzunmüddətli və dayanıqlı olmasından xəbər verir, eyni zamanda, enerji ixracını da reallaşdırır. “Yaxın zamanda Naxçıvanın qonşu ölkələrə enerji ixrac edəcəyi önəmli bir hadisə olacaq. Ötürücü xətlərin çəkilişindən sonra Naxçıvandan Türkiyə və İranla yanaşı, Avropaya da “yaşıl enerji” ixrac olunacaq ki, bu da Azərbaycanın “yaşıl enerji” ixracı coğrafiyasını daha da genişləndirəcək. Azərbaycan dünyada neft və qaz ixrac edən ölkə kimi tanınsa da, qısa zamanda Avrasiya məkanında “yaşıl enerj”i ixracatçısı olan vacib dövlət kimi tanınacaq. Bu məsələdə Naxçıvan enerji strategiyamızın mühüm bir hissəsi olacaq”, – deyə o əlavə edib..
K.Əliyeva bildirib ki, müasir dünyada səmərəli nəqliyyat xəritəsi strateji bir amil kimi qiymətləndirilir. Bu baxımdan Naxçıvan olduqca əlverişli coğrafi mövqedə yerləşir. Prezident İlham Əliyev müsahibəsində Naxçıvanın Şərq-Qərb, Şimal-Cənub nəqliyyat dəhlizlərinin kəsişməsində yerləşdiyindən böyük imkanlara malik olması barədə də fikirlər səsləndirdi. Şərqlə Qərbi birləşdirən Orta dəhlizin bir hissəsi olan Zəngəzur dəhlizi məhz Naxçıvandan keçir və bu marşrut Avropa ilə Asiyanı birləşdirən iqtisadi cəhətdən ən səmərəli nəqliyyat yoludur. “Horadiz-Ağbənd avtomobil yolu isə demək olar ki, hazırdır və dəmir yolunun Ermənistan sərhədinə qədər çəkilməsi, eyni zamanda, Naxçıvan dəmir yol infrastrukturunun bərpasına başlanması Azərbaycanın öz üzərinə götürdüyü öhdəliyi yerinə yetirməsinin sübutudur. Ermənistan da öz ərazisindən keçən dəmir yolu infrastrukturunu yaratmağa təşəbbüs göstərməlidir”, – deyə o bildirib.
Naxçıvan dəmir yolunun yaxın gələcəkdə yükdaşıma qabiliyyətinin 15 milyon tona çatdırılması barədə Prezident İlham Əliyevin söylədiyi fikirlərin mühüm iqtisadi mesaj olduğunu deyən ekspert vurğulayıb ki, yükdaşımanın həcminin artırılması tək Naxçıvan və Azərbaycanın deyil, ümumilikdə Avrasiya məkanının iqtisadi tərəqqisinə xidmət edəcək. Avropa İttifaqı nümayəndələrinin Naxçıvana səfərləri də, təşkilatın Naxçıvan dəmir yol layihəsinə böyük maraq göstərdiklərini sübut edir.
K.Əliyeva deyib ki, Naxçıvan, həmçinin qədim tarixi köklərə malik, bəşəriyyətin mənəvi irs xəzinəsinə daxil edilən məbədləri qoruyub saxlayan, Azərbaycan xalqının mədəni irsini yaşadan, eyni zamanda, dünyaya dahi şəxsiyyətlər bəxş edən bir diyardır: “Bu diyar Heydər Əliyev kimi bir şəxsiyyəti Azərbaycana bəxş edib. Heydər Əliyev müstəqil Azərbaycanın qurucusu olmaqla yanaşı, ölkəmizin nüfuzunu dünyada qaldıran dahi liderdir”.
Ekspert sonda vurğulayıb ki, Prezident İlham Əliyevin Naxçıvana səfəri, oradan verdiyi mesajlar bu bölgənin yaxın zamanda Avrasiyanın geosiyasi və geoiqtisadi mərkəzinə çevriləcəyindən xəbər verir.
Əsmər QARDAŞXANOVA,
“Azərbaycan”
