Görüşdə Vətənimizin ərazi bütövlüyü və suverenliyi uğrunda canından keçmiş şəhidlərin əziz xatirəsi ehtiramla yad edilib, onların ailələrinə göstərilən dövlət qayğısının əhəmiyyəti vurğulanıb.
Masallı Rayon İcra Hakimiyyətinin başçısı Araz Əhmədov bildirib ki, Azərbaycan Respublikasının Prezidenti İlham Əliyevin şəhid ailələrinə və müharibə iştirakçılarına göstərdiyi yüksək diqqət və qayğı dövlət siyasətinin mühüm istiqamətlərindən biridir. Şəhid ailələrinin sosial-məişət məsələlərinin həlli, onların problemlərinin diqqətdə saxlanılması və dövlət qayğısı ilə əhatə olunması istiqamətində ardıcıl tədbirlər həyata keçirilir.
Araz Əhmədov Prezident İlham Əliyevin tapşırıq və tövsiyələrinə uyğun olaraq şəhid ailələri ilə mütəmadi görüşlərin keçirildiyini, onların müraciət və qayğılarının həssaslıqla qarşılandığını qeyd edib. Bu diqqət və qayğının növbəti nümunəsi kimi Azərbaycan Respublikası Prezidentinin köməkçisi Anar Ələkbərovun Masallıdan olan şəhid anaları ilə keçirdiyi görüşün xüsusi əhəmiyyət daşıdığı vurğulanıb.
Bildirilib ki, Anar Ələkbərovun şəhid anaları ilə görüşü dövlətin şəhid ailələrinə olan yüksək ehtiramının və onların daim diqqət mərkəzində saxlanıldığının bariz ifadəsidir. Görüş zamanı şəhid analarının qayğı və düşüncələrinin dinlənilməsi, onlarla səmimi söhbət aparılması dövlət rəhbərliyinin şəhid ailələrinə göstərdiyi diqqətin mühüm göstəricilərindən biri kimi qiymətləndirilib.
Rayon icra hakimiyyətinin başçısı şəhid anaları ilə söhbət zamanı onların gündəlik qayğıları, sosial-məişət məsələləri və qarşılaşdıqları çətinliklərlə maraqlanıb, səsləndirilən müraciətlərin diqqətdə saxlanılacağını bildirib.
Şəhid anaları göstərilən diqqət və qayğıya görə minnətdarlıqlarını ifadə ediblər. Onlar ölkə rəhbərliyi tərəfindən şəhid ailələrinə göstərilən yüksək ehtiramı, eləcə də Masallı Rayon İcra Hakimiyyəti tərəfindən onların daim diqqətdə saxlanılmasını yüksək qiymətləndiriblər. Şəhid anaları bildiriblər ki, onların müxtəlif məsələlərlə bağlı müraciətlərinə həssaslıqla yanaşılır, problemlərinin həlli istiqamətində müvafiq tədbirlər görülür. Onlar şəhid ailələrinə göstərilən dövlət qayğısının hər zaman özlərini mənəvi cəhətdən dəstəklədiyini qeyd edərək bu diqqətə görə təşəkkürlərini çatdırıblar.
Görüşdə şəhidlərin keçdiyi şərəfli döyüş yolunun, onların Vətən qarşısında göstərdikləri qəhrəmanlığın gələcək nəsillərə çatdırılmasının vacibliyi də vurğulanıb. Qeyd olunub ki, şəhidlərin əziz xatirəsi Azərbaycan xalqının yaddaşında daim yaşayacaq, onların ailələrinə və yaxınlarına göstərilən diqqət və qayğı bundan sonra da davam etdiriləcək.
Seyran CAVADOV,
"Azərbaycan"
677jpg_1790033437.jpg)
