İslamofobiya təkcə dini kimliyə qarşı yönəlmiş qərəzli münasibət deyil, o, həm də gənc nəslin psixologiyasına, cəmiyyətə inteqrasiyasına və gələcəyinə birbaşa təsir göstərən ciddi sosial problemdir. Gənclər bu nifrət atmosferində böyüyür, bəzən öz kimliklərindən utanmaq, gizlətmək, ya da cəmiyyətin qəbul etdiyi “uyğun” forma almaq məcburiyyətində qalırlar.
AZƏRTAC xəbər verir ki, bunu Beynəlxalq Din və Diplomatiya Mərkəzinin prezidenti və baş icraçı direktoru Martine Miller “İslamofobiya: Qərəzin ifşa olunması və stiqmaların dağıdılması” adlı beynəlxalq konfrans çərçivəsində təşkil edilən “Gənclərin inklüzivliyə doğru çağırışı: Qərəzə və yanılmaya qarşı mübarizə” mövzusunda panel iclasda deyib.
Onun sözlərinə görə, belə gənclər yalnız zərərçəkən tərəf deyil, həm də dəyişiklik yaradan olmalıdırlar. Onlar öz icmalarının səsi olmalı, kimliklərini qorumaqla yanaşı, ictimai müzakirələrdə fəal iştirak etməli, yeni ideyalar və təşəbbüslərlə çıxış etməlidirlər.
“Bu prosesdə gənclər bir-biri ilə, qeyri-müsəlman həmyaşıdları ilə və ən əsası dini liderlərlə və ictimai xadimlərlə birlikdə çalışmalıdırlar. Bu əməkdaşlıq həm maarifləndirmə prosesini gücləndirə bilər, həm də İslamın əsl mahiyyətini daha geniş kütlələrə çatdırar. Gənclər bu məsələyə yaradıcı və müasir formada yanaşmalıdırlar. Sosial şəbəkələr, sənət, kino, podkastlar, ictimai debatlar – bütün bu vasitələr onların əlində güclü platformaya çevrilə bilər. Çünki bu gün dəyişiklik yaratmaq üçün təkcə akademik bilik deyil, mədəni təsir gücü də lazımdır”, - deyə Martine Miller əlavə edib.
jpg_1748340668.jpg)
