"Fransa prezidentinin neokolonialist iddiaları və erməni sevgisi onu dünyada baş verən real siyasi proseslərdən uzaqlaşdırır. Bu gün Makron siyasi illüziya ilə məşğuldur, özünü deyəsən Napoleon hesab edir. Lakin onun Azərbaycanla bağlı radikal mövqeyi də daxil olmaqla, atdığı hər bir addım uğursuzluğa düçar olur. Əslində, "Le Fiqaro" qəzetində dərc olunan məqalə də bunu sübuta yetirir".
Bu fikirləri qəzetimizə açıqlamasında Milli Məclisin deputatı Hikmət Məmmədov deyib. Deputat söyləyib ki, Makronun Azərbaycana və ümumilikdə Cənubi Qafqaza münasibətdə sərgilədiyi bütün cəhdlərinin nəticəsiz qalmasının fərqində olması onda daxili aqressiya yaradır: "Əslində, 2020-ci ildən başlayaraq bu günə qədər davam edən Paris-Bakı münasibətləri Makronun məğlubiyyət silsiləsidir. Elə "Le Fiqaro" qəzeti də yayımladığı məqalə ilə bunu etiraf edir. Qəzet də təsdiqləyir ki, bu günə qədər Fransanın Cənubi Qafqazla bağlı təşəbbüslərinin heç biri baş tutmayıb. Həmçinin Makronun Avropada öz ətrafına tərəfdarlar toplamaq və digər beynəlxalq aktorları Azərbaycana qarşı yönəltmək cəhdləri uğursuzluğa düçar olub. Bir sözlə, Makronun siyasi fəaliyyəti başdan-ayağa uğursuzluq hekayəsidir. Bu baxımdan, "Le Fiqaro" qəzetində dərc olunmuş məqaləni Fransa prezidentinin boşa çıxmış cəhdlərinin hesabatı adlandırmaq olar".
Deputat vurğulayıb ki, tarixin indiki mərhələsində və beynəlxalq münasibətlər sisteminin məntiqi və paradiqması kontekstində hər bir ölkə digərinə hörmət etməyi bacarmalıdır: "Dövlətlər davranışlarını beynəlxalq hüququn norma və prinsiplərinə uyğunlaşdırmalıdırlar. Qarşısındakı rəqibinə və yaxud tərəfdaşına hörmət etməyi öyrənməlidirlər. Əks təqdirdə, nəticə etibarilə dünya siyasətində Makron Fransasının vəziyyətinə düşmək qaçılmazdır".
Hikmət Məmmədovun sözlərinə görə, həm intellektual, həm siyasi təcrübə, həm də siyasi qətiyyət baxımından Makronun bütün uğursuzluqları onun Azərbaycan Prezidentinə uduzması kimi də başa düşülə bilər: "Azərbaycan rasional davranaraq, Fransanın 2020-ci ildən başlayan sərt ritorikasına qarşı özünün əməkdaşlıq əlini uzatdı. Hətta 2022-ci ildə Azərbaycanla Fransa şirkətləri arasında yeni qaz müqaviləsi imzalandı. Lakin Fransa bu reallıqları nəzərə ala bilmədi və yenidən ənənəvi ampluasında ölkəmizə qarşı koalisiya formalaşdırmağa cəhd etdi. Və yenə də uduzdu. Emmanuel Makronun bundan sonrakı cəhdləri də uğursuzluğa məhkumdur".

Nəzrin QAFARZADƏ,
"Azərbaycan"