Əsas problem Rusiya və Ukrayna liderləri arasında şəxsi düşmənçilikdir
ABŞ Prezidentinin xüsusi elçiləri Cared Kuşner və Stiv Uitkoff Kiyevdə keçirilən mətbuat konfransında Rusiya və Ukrayna rəhbərliyi ilə apardıqları danışıqların nəticələri barədə məlumat veriblər. Hər üç tərəf danışıqları konstruktiv adlandırıb.
Növbəti addımlardan biri üçtərəfli görüş formatına qayıtmaq ola bilər. Kuşner hesab edir ki, bu istiqamətdə sürətli irəliləyiş üçün ümid var. Xüsusi nümayəndələr ABŞ Prezidenti Donald Trampın münaqişənin tez bir zamanda sülh yolu ilə həllinə sadiqliyini bir daha təkrarlayıblar və bunun "çox çətin bir vəzifə" olduğunu vurğulayıblar.
Uitkoff deyib ki, "biz bu münaqişəyə kinetik yox, diplomatik həll yolu axtarırıq. O, əlavə edib ki, "hər iki tərəf bir həll yoluna çatmalıdır". Uitkoffun sözlərinə görə, yaxın məqsəd tərəfləri danışıqlara qaytarmaq və yaxşı ünsiyyət kanalları yaratmaqdır: "Ümid edirəm ki, son 48 saat ərzində bu prosesə konstruktiv başlamışıq və əminik ki, yaxşı bir həll yolu tapılacaq".
Ukrayna Prezidenti Volodimir Zelenski Kiyevdə keçirilən üç raund danışıqları "yaxşı" və "konkret" adlandırıb. Onun sözlərinə görə, görüşdə Ukraynaya davamlı iqtisadi yardım, eləcə də hava hücumundan müdafiə, enerji sektoruna dəstək, Amerika mayeləşdirilmiş təbii qazının alınması ehtimalı, müharibədən sonrakı yenidənqurma məsələləri və təhlükəsizlik zəmanətləri müzakirə olunub. V.Zelenski müharibənin qışa qədər davam edəcəyi fikrini ifadə edib və Kiyevin Qərb tərəfdaşlarından qış yardım paketinə ehtiyacı olduğunu vurğulayıb: "Biz çox ümid edirik ki, Amerika tərəfdaşlarımızla razılığa gələ biləcəyik və müharibə qışa qədər davam edərsə, Avropa tərəfdaşlarımızın dəstəyinə güvənirik. Hələlik, görünür, vəziyyət belədir".
V.Zelenski həmçinin ABŞ Prezidentinin xüsusi nümayəndələri ilə Böyük Britaniya, Almaniya və Fransadan olan Avropa milli təhlükəsizlik müşavirləri arasında birgə görüş, eləcə də bu formatda işlərin yenidən başlamasının planlaşdırıldığı barədə məlumat verib.
Qeyd edək ki, xəbər verildiyi kimi, Uitkoff və Kuşner bazar günü, sentyabrın 6-da Ukrayna paytaxtına gəliblər. Bir gün əvvəl onlar Moskvada Rusiya Prezidenti Vladimir Putinlə üç saatdan çox görüş keçiriblər. Kuşner Putinlə görüşü "çox konstruktiv və mahiyyətli" adlandırıb və qeyd edib ki, onlar əvvəllər uğursuz olan ideyaları, eləcə də "davamlı sülhə" nail olmaq üçün zəruri elementləri müzakirə ediblər.
Kremldə görüşü konstruktiv, danışıqları isə "vaxtında və çox faydalı" adlandırıb. V.Putinin köməkçisi Yuri Uşakov isə danışıqları "son dərəcə səmimi" adlandırıb və Amerika tərəfinin nizamlanmanın mümkün yolları ilə bağlı bir sıra fikirlər təklif etdiyini bildirib. O, əlavə edib ki, ruslar amerikalılara Moskvanın Ukraynanın şərqinin qalan hissəsini ələ keçirə biləcəyinə əmin olduqlarını deyiblər.
Rizvan CƏFƏROV,
"Azərbaycan"
