"Azərbaycan" qəzetinin 27 noyabr 2022-ci il tarixli sayında dərc edilmiş "Bərbad vəziyyətdə olan yola görə kəndimizə avtobus işləmir" və "Su problemimiz həll edilmir" sərlövhəli məktublarla əlaqədar bildiririk ki, Mollacəlilli kəndinə gedən avtomobil yolu "24 №-li Yol İstismarı" MMC-nin balansında olmaqla, uzunluğu 5 kilometrdən ibarət çınqıl örtüklüdür. 
Mütəmadi olaraq yolda təmir işləri aparılır, lakin vətəndaşların tələbi yolun asfalt örtüklü olmasıdır. Bununla əlaqədar bildiririk ki, Göygöl-Mollacəlilli avtomobil yolunun asfalt-beton örtüklə yenidən tikilməsi Azərbaycan Respublikası regionlarının iqtisadi inkişaf planına salınmış və vəsait ayrıldıqda işlərin icrası təmin olunacaqdır. 
Hacıməlik qəsəbəsinin su problemi ilə əlaqədar bildiririk ki, qəsəbə Gəncə-Göygöl magistral su xəttindən hər gün fasiləsiz verilməklə içməli su ilə təmin olunur. Yaşayış məntəqəsində mərkəzləşmiş şəbəkə olmadığına görə müvafiq sayda fərdi evlərin arasında quraşdırılmış bulaqlar vardır ki, qəsəbə sakinləri həmin bulaqlar vasitəsilə qrafik əsasında içməli sudan istifadə edirlər. Əhaliyə  göstərilən xidmətlərə görə ödəniş sakinlər tərəfindən ödənilmədiyi üçün noyabr ayında Göygöl Sukanal Sahəsi tərəfindən adıgedən qəsəbə üzrə içməli suyun verilməsi dayandırılmış, ilk olaraq şəhid və qazi ailələrinə, bir də debitor borcu olmayan abonentlərə xüsusi təyinatlı su maşınları vasitəsilə içməli su paylanmışdır. Debitor borc əhali tərəfindən qismən ödənildiyi üçün qəsəbəyə suyun verilməsi tam şəkildə bərpa edilmişdir.
Qeyd edirik ki, rayonun kənd və qəsəbələrinə yeni su və kanalizasiya xəttinin çəkilməsi və sayğacların quraşdırılması ilə bağlı tərəfimizdən aidiyyəti üzrə "Azərsu" Açıq Səhmdar Cəmiyyətinə müraciət edilmişdir.

Elvin PAŞAYEV,
Göygöl Rayon İcra Hakimiyyətinin başçısı