"Azərbaycan" qəzetinin 23 noyabr 2023-cü il tarixli sayında dərc edilmiş "Zəif külək əsən kimi..." sərlövhəli oxucu məktubunda Astara rayonunun dağ kəndlərinin, o cümlədən Hamarat, Bradi, Vov, Vənədi, Dzdipok kəndlərinin elektrik enerjisi təminatında fasilələrin yaranması ilə əlaqədar qaldırılmış problemin həlli istiqamətində tədbir görülməsi barədə müraciətə "Azərişıq" ASC-də baxılmışdır.
Bununla əlaqədar olaraq bildiririk ki, cəmiyyət yarandığı dövrdən Astara rayonunun elektrik şəbəkələrində bir sıra təmir, yenidənqurma və tikinti işləri yerinə yetirilmişdir. Belə ki, rayonun Kijəbə qəsəbəsində yerləşən 35/10-6 kV-luq 4+2,5 MVA gücündə yarımstansiya tam yenidən qurulmuş, Pensər kəndində 35/10 kV-luq 2x4 MVA gücündə "Pensər" yarımstansiyasında əsaslı təmir işləri aparılmış, Ərçivan qəsəbəsində 35/10 kV-luq "Ərçivan" yarımstansiyasında 2,5 MVA gücündə transformator 4 MVA gücündə transformatorla əvəz edilmiş, köhnə tipli 55 ədəd komplekt transformator məntəqəsi yenisi ilə əvəz olunmuş, 45 ədəd yeni güc mərkəzi yaradılmışdır. 5 km 35 kV-luq, 35 km 10 kV-luq və 270 km 0,4 kV-luq hava elektrik xətləri çəkilmiş və təmir olunmuşdur. Şahağacı, Diqo, Doli, Sekaşan, Lələkəpeştə, Avyerud, Sipiyyət, Şəvqu kəndlərinin 0,4 kV-luq elektrik şəbəkələri tam şəkildə, Ərçivan və Kijəbə qəsəbələrində, Pensər kəndində bu istiqamətdə işlər qismən yerinə yetirilmişdir. Hazırda yenidənqurma işləri Siyəkəran kəndində aparılmaqdadır.
Eyni zamanda bildiririk ki, məqalədə göstərilən kəndlərin elektrik şəbəkələrində mütəmadi olaraq təmir və bərpa işləri aparılır. Yenidənqurma işləri aparılmamış kəndlərin elektrik şəbəkələrinin yenidən qurulması "İnvestisiya Planı"na daxil edilməklə, bu istiqamətdə işlərin mərhələli şəkildə həyata keçirilməsi nəzərdə tutulmuşdur.
Qədir İSMAYILOV,
"Azərişıq" ASC-nin sədr müavini
