İtaliyanın Ədliyyə Nazirliyi həbsxanalarda həddən artıq sıxlığı azaltmaq üçün 10 minə qədər insanı və ya ölkənin məhbus kontingentinin təxminən 15 faizini azadlığa buraxa biləcəyini açıqlayıb.
AZƏRTAC nazirliyin çərşənbə axşamı yaydığı məlumata istinadla xəbər verir ki, təxminən 10 105 məhbus ev dustaqlığı və ya şərti cəza kimi azadlıqdan məhrumetmə cəzasına alternativ olan uyğun qətimkan tədbirlərinə məruz qalacaq.
Bu qərar məhkəmə hökmü qəti olan və apellyasiya şikayəti verilə bilməyən, cəzasının bitməsinə iki ildən az vaxt qalmış və son 12 ayda ciddi intizam pozuntusu törətməyən şəxslərə şamil ediləcək.
Nazirlik əlavə edib ki, terrorizm, mütəşəkkil cinayətkarlıq, zorlama, miqrant alveri və adam oğurluğu kimi ağır cinayətlərə görə cəza çəkən şəxslər həbsdə saxlanılacaq.
“World Prison Brief” təşkilatının məlumat bazasına görə, İtaliya Avropada həbsxanaların həddən artıq doluluq nisbəti üzrə ən pis ölkələrdən biridir. Burada cəzaçəkmə müəssisələrinin doluluq nisbəti təxminən 122 faiz təşkil edir. Belə ki, 100 faizdən yuxarı olan hər hansı bir rəqəm həbsxanaların öz imkanlarından artıq dolu olduğunu göstərir. Məlumat bazasına görə, Avropada yalnız Kipr və Fransa daha yüksək göstəricilərə malikdir.
İtaliyada intihar hallarının artması və kondisioneri olmayan təcridxanalarda yay temperaturunun yüksək olması ilə bağlı şikayətlərdən sonra məhbusların acınacaqlı durumu diqqət çəkib.
Bununla belə, məhbusların vaxtından əvvəl azad edilməsi siyasi baxımdan həssas bir addımdır və Ədliyyə Nazirliyi bunun bir gecədə baş verməyəcəyini açıqlayıb.
Bəyanatda deyilir ki, ayrı-ayrı işlər üzrə qərarların qəbuluna kömək etmək üçün həbsxanalar və şərti azadlığa buraxan hakimlərlə işləmək üçün işçi qrupu yaradılıb. Qrup həftəlik toplanacaq və sentyabr ayına qədər gördüyü işlər barədə hesabat verəcək.
