10 ilə yaxındr ki, Abşeron rayonuna köçmüşük. Saray qəsəbəsində yer alıb ev tikmişik. Bura həm yoldaşımın iş yerinə yaxındır, həm də həyət evidir, hər cür rahatlığı var. Binəqədidə yaşayanda hər gün bir problemlə rastlaşırdıq. Bir gün su gəlmirdi, ertəsi gün işıqlar keçirdi, üçüncü gün qaz olmurdu.

Şükürlər olsun ki, buraların belə problemi yoxdur. Sağ olsun əlaqədar təşkilatlar vaxtaşırı reydlər edir, kommunal problemlərlə maraqlanır, olanlar operativ aradan qaldırılır.

Yaşadığımız Sevil Qazıyeva küçəsi birbaşa Sumqayıt istiqamətindəki əsas yola - Heydər Əliyev küçəsinə çıxır. Hər tərəf yaşıllıqdır. Çatışmayan küçəni təhlükəsiz keçmək üçün zolağın olmaması idi. Qonşuların yerli icra orqanına şikayətindən sonra bu problem də həll edildi.

Lakin sürücü-piyada təhlükəsi qalmaqda idi. Demək olar ki, hər gün piyadalar təhlükə ilə üzləşirdi. Bəzən sürücü məsuliyyətsizliyi, ya da piyada soyuqqanlığı hadisə ilə nəticələnirdi. Axşamlar belə hadisələr tez-tez olurdu. Yolun digər hissəsinə sağ-salamat keçəndə Allaha şükür edirdik.

Qərara gəldik ki, həmin yola işıqforun qoyulması ilə bağlı əlaqədar təşkilatlara müraciət edək. Məktub hazırlayıb göndərdik. Qısa zamanda nümayəndələr gələrək  şikayətlə yerindəcə tanış oldular. Allah köməkləri olsun. Heydər Əliyev küçəsinin ara yolları ilə çox kəsişdiyi yerdə işıqfor quraşdırıldı, piyadalar üçün zolaqlar salındı. İnanın ki, o zamandan bəri heç bir hadisə baş verməyib.

Pərvanə AĞAYEVA,

Abşeron rayonunun Saray qəsəbə sakini