İşğaldan azad edilmiş ərazilərimizin dirçəlişi ümummilli məqsədimiz və vəzifəmizdir  

“Bu gün Azərbaycan xalqı  olaraq əsas missiyamız işğaldan azad edilmiş ərazilərimizin bərpa edilməsi, keçmiş məcburi köçkünlərimizin öz doğma yurdlarına qayıtmasını təmin etməkdən ibarətdir. Artıq o torpaqlara həyat qayıdır. Bir neçə il öncə Zəngilanın Ağalı kəndi Böyük Qayıdışın ilk müjdəsi oldu. Bundan sonra digər bir sıra yaşayış məntəqələrinə də qayıdış reallaşdırılıb.

Bu fikirləri Milli Məclisin deputatı Fatma Yıldırım deyib.

Deputat bildirib ki, işğaldan azad edilmiş ərazilərin bərpası və Böyük Qayıdışın təmin olunması yeni strateji mərhələdə Azərbaycanın əsas prioritetləri sırasında yer alır. Söhbət bütünlüklə dağıdılmış ərazilərin minalardan təmizlənməsindən, şəhər və kəndlərin bərpasından, zəruri infrastruktur qurulmasından gedir. Döyüş meydanında düşməni diz çökdürən və kapitulyasiyaya məruz qoyan qalib Azərbaycan bərpa və quruculuq işlərini də qısa müddətdə və yüksək səviyyədə həyata keçirmək əzmindədir. Ötən dövrdə reallaşdırılan layihələr onu deməyə əsas verir ki, respublikamız işğaldan azad olunmuş ərazilərin bərpası, soydaşlarımızın məskunlaşdırılması ilə bağlı qarşıya qoyulan vəzifələrin öhdəsindən layiqincə gələcək. Azərbaycan dövləti bu kimi amilləri nəzərə alaraq işğaldan azad edilmiş ərazilərin ölkənin digər bölgələrinə reinteqrasiyasına qısa müddətdə nail olunması üçün güclü siyasi iradə nümayiş etdirir.

Millət vəkilinin sözlərinə görə, hazırda Böyük Qayıdışla bağlı 2022-2026-cı illəri əhatə edən Dövlət Proqramı uğurla icra olunur. İşğaldan azad edilmiş ərazilərimizin bərpası üçün dövlət büdcəsindən kifayət qədər vəsait ayrılır. Azərbaycan bu işləri kənardan heç bir yardım olmadan, öz gücü ilə həyata keçirir. Hər il bu məqsədlə milyardlarla manat vəsait ayrılır. 

“İşğaldan azad edilmiş ərazilərimizin dirçəlişi  hər birimizin ümummilli məqsədimiz və vəzifəmizdir. “Böyük Qayıdış” məqsədimizə daha tez nail olmaq üçün güclərimizi birləşdirmək, görülən işlərə dəstək vermək olduqca önəmlidir. Dünya təcrübəsi də göstərir ki, postmüharibə dövründə yenidənqurma işlərinin daha tez və effektiv formada aparılması yalnız birlik və həmrəylik nəticəsində mümkündür.  Mən bu prosesdə Birinci vitse-prezidentimiz hörmətli Mehriban xanım Əliyevanın rəhbərlik etdiyi Heydər Əliyev Fondunun rolunu xüsusi qeyd etmək istəyirəm. Heydər Əliyev Fondu işğaldan azad edilmiş ərazilərdə dini, tarixi və mədəni abidələrin bərpasında və yenidən qurulmasında çox yaxından iştirak edir. Bu gün Şuşada, Ağdamda və digər ərazilərdə görülən işlər də buna əyani sübutdur. Bununla yanaşı, dövlətimizin başçısının Fərmanı ilə yaradılan Qarabağ Dirçəliş Fondu da işğaldan azad edilmiş ərazilərin bərpası və yenidən qurulması işinə öz töhfələrini verməkdədir. Qarabağ Dirçəliş Fondu yarandığı vaxtdan indiyə qədər bir sıra önəmli layihələr, təqdimatlar həyata keçirib. Biz qəti əminik ki, Azərbaycan dövləti və xalqı işğalçı erməni vandalların dağıtdığı bütün infrastrukturu yenidən bərpa edəcək, Qarabağ və Şərqi Zəngəzur yenidən Vətənimizin ən inkişaf etmiş dilbər guşələrindən birinə çevriləcək”,-deyə Fatma Yıldırım vurğulayıb.

Rəşad CƏFƏRLİ,

“Azərbaycan”